Некемия 13:1—31
13 Ошол күнү элге Мусанын китебинен окуп беришти.+ Алар ал китептен Амондун тукумдарынын, мааптыктардын+ эч качан чыныгы Кудайга сыйынган элдин мүчөсү боло албай турганын билишти.+
2 Анткени алар ысрайылдыктарга нан менен суу бербей коюшкан, кайра, аларды каргаш үчүн Биламды жалдашкан.+ Бирок Кудайыбыз анын каргышын батага айланткан.+
3 Мыйзамда жазылгандарды угары менен ысрайылдыктар бөтөн жерликтердин тукуму болгондордун* баарын өздөрүнөн бөлө башташты.+
4 Кудайыбыздын ибадатканасындагы кампаларга+ жооптуу дин кызматчы Элиашип+ Тобиянын+ тууганы болчу.
5 Ал Тобияга чоң кампаны берип коюптур. Мурун ал жерде тартуу кылынган дан азыктары, ладан*, ар кандай буюмдар, эгиндин, жаңы шараптын, майдын+ ондон бир бөлүгү — лебилерге,+ ырчыларга, дарбазачыларга берилген ондуктар — жана дин кызматчыларга берилген тартуу сакталчу.+
6 Ал убакта мен Иерусалимде эмес болчумун, анткени Бабыл падышасы Артакшаштанын+ башкаруусунун отуз экинчи жылында+ падышага кайтып барган элем. Бирок бир нече убакыт өткөндөн кийин кайра падышадан суранып,
7 Иерусалимге келдим. Иерусалимге келгенде Элиашиптин+ чыныгы Кудайдын үйүнүн короосундагы кампалардын бирин Тобияга+ берип жаман иш кылганын билдим.
8 Буга аябай ачууланып, Тобиянын буюмдарынын баарын сыртка ыргытып таштадым.
9 Анан кампаларды тазалатып, чыныгы Кудайдын үйүндө+ колдонулган буюмдарды, тартуу кылынган дан азыктары менен ладанды кайра ал жакка киргиздим.+
10 Андан сырткары, лебилерге тийиштүү үлүшү берилбей калганын,+ ошон үчүн лебилер менен ырчылар кызматын таштап, ар кимиси өз талаасына кетип калганын билдим.+
11 Ошондуктан башчыларга:+ «Эмнеге чыныгы Кудайдын үйүн таштап койдуңар?!»+ — деп катуу айттым. Анан лебилерди чогултуп, кайра өз кызматтарына койдум.
12 Ошондо бүт жүйүттөр эгиндин, жаңы шараптын, майдын ондон бир бөлүгүн+ кампаларга алып келе башташты.+
13 Анан дин кызматчы Шелемияны, көчүрмөчү Садокту, Педая деген лебини кампаларга жооптуу кылып дайындадым. Аларга Матаниянын уулу Закурдун уулу Ханан жардам берчү. Баары ишеничтүү кишилер эле. Аларга бир туугандарына тийиштүү үлүшүн бөлүштүрүп берүү тапшырылды.
14 Оо, Кудайым, ушул кылганымдын баарын эстей көр!+ Менин берилгендигимди*, сенин үйүң үчүн, үйүңдөгү кызмат үчүн кылгандарымды унута көрбө.+
15 Ошол күндөрү Жүйүт жериндегилердин дем алыш күнү+ жүзүм тебелеп жатканын, ошондой эле эгинин, шарабын, жүзүмүн, анжирин жана башка нерселерин эшектерине артып алып, Иерусалимге алып келишкенин көрдүм. Анан аларга алып келген азык-түлүгүн ошол күнү сатпагыла деп эскерттим*.
16 Иерусалимде жашаган тирликтер да балыгын жана башка нерселерин алып келип, дем алыш күнү+ жүйүттөргө сатып жүрүштү.
17 Ошондо аттуу-баштуу жүйүттөргө катуу эскертип: «Бул эмне кылганыңар? Эмнеге дем алыш күндү арамдап жатасыңар?
18 Ата-бабаларыңар да ушинткендиктен, Кудайыбыз бизге жана бул шаарга ушул алааматтын баарын жибербеди беле?! Силер болсо дем алыш күндү+ арамдап, анын Ысрайылга төгүлгөн каарын ого бетер күчөтүп жатасыңар»,— дедим.
19 Дем алыш күндүн алдында кеч кирип, Иерусалимдин дарбазаларына көлөкө түшө баштаганда, дарбазаларды жаап, дем алыш күн өткүчө кайра ачпагыла деп буйрук кылдым. Анан дем алыш күнү эч ким эч кандай жүк алып кирбеши үчүн, кызматчыларымдын айрымдарына дарбазаларды кайтартып койдум.
20 Ошондуктан соодагерлер менен ар кандай нерселерди саткан башка кишилер эки жолу Иерусалимдин сыртына түнөп калышты.
21 Ошондо аларга: «Эмнеге бул жерге түнөп жатасыңар? Дагы ушинте турган болсоңор, көргүлүктү көрөсүңөр!» — деп эскерттим. Ошондон тартып алар дем алыш күнү келбей калышты.
22 Дем алыш күндү ыйык тутуш үчүн,+ мен лебилерге дайыма тазаланып келип, дарбазаларды кайтаргыла деп буйрук кылдым. Оо, Кудайым, ушул ишимди да эске алып, мени аяй көр. Анткени сенин сүйүүң улуу, туруктуу.+
23 Ошол күндөрү жүйүттөрдүн Амондун тукумдарынан, азоттуктардан,+ мааптыктардан+ аял алганын да билдим.+
24 Алардын балдарынын жарымы азоттуктардын тилинде, жарымы башка элдердин тилинде сүйлөйт экен. Эч кимиси жүйүттөрдүн тилин билбейт экен.
25 Мен ал жүйүттөргө катуу айтып, урушуп, айрымдарын уруп,+ чачтарын жулуп, Кудайды оозанып карганышын талап кылдым. Анан: «Алар менен кыз алышып, кыз беришпегиле.+
26 Ысрайылдын падышасы Сулайман ошолордун айынан күнөөгө батпады беле. Андай падыша бир да элде болгон эмес.+ Кудай аны жакшы көргөн,+ ошондуктан бүт Ысрайылга падыша кылып дайындаган. Бирок бөтөн жерлик аялдар аны да күнөөгө батырышкан.+
27 Силер болсо ошону билип туруп, бөтөн жерликтерден аял алып, Кудайыбыздын мыйзамын бузуп жатасыңар. Ушундай жаман ишке барганга кантип батындыңар?!»+ — дедим.
28 Башкы дин кызматчы Элиашиптин+ уулу Жоаданын+ уулдарынын бири бет-орондук Санбалаттын+ күйөө баласы болчу, ошондуктан аны кууп жибердим.
29 Оо, Кудайым, аларды жазала, анткени алар дин кызматчылыкты арамдашты, дин кызматчылар+ жана лебилер+ менен түзүлгөн келишимди бузушту.
30 Мен элди бөтөн жерликтердин бардык терс таасиринен арылттым. Дин кызматчылар менен лебилердин ар бирине аткара турган милдетин бөлүштүрүп бердим.+
31 Кимиси кайсы убакта отун+ алып келерин, кимиси биринчи түшүмдү алып келерин бөлүштүрдүм.
Оо, Кудайым, кылгандарымды эстеп, мага жакшылык кыла көр.+
Шилтемелер
^ Же: «атасы же энеси бөтөн элден болгондордун».
^ Же: «туруктуу сүйүүмдү».
^ Же балким: «сатпагыла деп ошол күнү эскерттим».
