Некемия 6:1—19
6 Менин дубалды тургузуп бүткөнүм,+ анын ураган жерлеринин толугу менен оңдолуп бүткөнү Санбалатка, Тобияга,+ арабиялык Гешемге+ жана калган душмандарыбызга да маалым болду (бирок ал убакта дарбазанын эшиктерин орното элек болчумун).+
2 Ошондо Санбалат менен Гешем мага: «Кел, Оно+ өрөөнүндөгү бир айылдан жолугалы»,— деп айттырып жиберишти. Бирок, чынында, алардын арам ою бар болчу.
3 Ошондуктан аларга кишилерди жөнөтүп: «Мен чоң иш менен алек болуп жатам, бара албайм. Эгерде силерге бара турган болсом, иш токтоп калат»,— деп айттырып жибердим.
4 Алар мени төрт жолу ушинтип чакыртышты, төрт жолу тең ушинтип жооп бердим.
5 Ошондо Санбалат мени чакырыш үчүн бешинчи жолу кызматчысын жөнөттү. Анын колунда мөөр басылбаган ачык кат бар экен.
6 Ал катта: «Элдер сени менен жүйүттөрдү көтөрүлүш чыгарганы жатат деп айтып жатышат.+ Гешем+ да ушинтип айтып жатат. Дубалды ошон үчүн куруп жаткан турбайсыңарбы. Айтылган кептерге караганда, аларга падыша болоюн деген оюң бар экен.
7 Анан дагы бүт Иерусалим боюнча: „Жүйүттүн өз падышасы бар!“ — деп жар салганга пайгамбарларды да дайындап коюптурсуң. Муну падышага сөзсүз жеткиришет. Ошондуктан, кел, кеңешели»,— деп жазылыптыр.
8 Бирок мен ага: «Айткандарыңдын баары калп. Мунун бардыгын оюңан чыгарып жатасың»,— деп айттырып жибердим.
9 Душмандарыбыздын баары: «Алардын ындыны өчүп, ишти аягына чыгара албай калышат»+ — деп, бизди коркутканга аракет кылып жатышты. Бирок мен Кудайымдан кайрат беришин сурап тилендим.+
10 Мехетабелдин небереси, Делаянын уулу Шемаяныкына барсам, үйүндө бекинип отуруптур. Ал мага: «Чыныгы Кудайдын үйүнөн, ибадаткананын ичинен, жолугуп, эшигин бекитип алалы. Анткени сени өлтүргөнү жатышат, сени өлтүргөнү түндө келишет»,— деди.
11 Бирок мен: «Мендей адам кантип качсын? Анын үстүнө, мендей адам ибадатканага кирсе, тирүү калмак беле?+ Жок, мен ал жакка кирбейм»,— дедим.
12 Анан ал пайгамбарды Кудай жибербегенин түшүндүм. Көрсө, аны мени алдаш үчүн Тобия менен Санбалат+ жалдаган экен.
13 Алар аны мени коркутуш үчүн жалдашыптыр. Эгер коркуп, күнөө кылсам, мени айыптап, жаманатты кылганга шылтоо табылмак экен.
14 Ошон үчүн: «Оо, Кудайым, Тобия+ менен Санбалатка кылган иштерине жараша тиешесин бер. Ноадия деген пайгамбар аялды да, мени кайра-кайра коркутканга аракет кылган башка пайгамбарларды да жазалай көр»,— деп тилендим.
15 Акыры, элул* айынын жыйырма бешинчи күнү дубал тургузулуп бүттү. Ал 52 күндүн ичинде тургузулду.
16 Бүт душмандарыбыз муну укканда жана тегерегибиздеги элдер муну көргөндө аябай уят болушту.+ Алар бул иштин Кудайыбыздын жардамы менен бүткөнүн түшүнүштү.
17 Ошол күндөрү жүйүттөрдүн аттуу-баштуу кишилери+ Тобияга көп кат жазышчу. Тобиядан да аларга кат келип турчу.
18 Анткени ал Арахтын+ уулу Шеханиянын күйөө баласы болгондуктан, көп жүйүттөр аны колдогонго ант беришкен эле. Ошондой эле анын уулу Жахонан Берекиянын уулу Мешуламдын+ кызын алган болчу.
19 Алар Тобияны мага көп макташчу, менин айткандарымды болсо ага жеткирип турушчу. Тобия өзү болсо мени коркутуш үчүн кат жөнөтүп турду.+
Шилтемелер
^ Б15 тиркемесин кара.
