Падышалар 1-китеп 20:1—43
20 Сириянын+ падышасы Бенадат+ бүт аскерин, аттары менен согуш арабаларын чогултуп, 32 падыша менен бирге Самарияга+ барды да, аны курчоого алып,+ чабуул коё баштады.
2 Анан ошол шаардагы Ысрайылдын падышасы Ахапка+ кабарчыларын жөнөтүп: «Бенадат мындай дейт:
3 „Сенин күмүшүң да, алтының да меники, аялдарың менен уулдарыңдын мыктылары да меники“»,— деп айттырып жиберди.
4 Ысрайылдын падышасы ага: «Улуу урматтуу падышам, сен айткандай, мен да, мага таандык нерселер да бүт сеники»,— деди.+
5 Бир нече убактан кийин кабарчылар кайра келип: «Бенадат мындай дейт: „Мен сага: “Күмүшүң менен алтыныңды, аялдарың менен уулдарыңды мага бересиң”,— деп айттырып жибергем.
6 Эртең ушул убактарда кызматчыларымды жиберем, алар сенин үйүңдү да, кызматчыларыңдын үйлөрүн да тинтип, бүт кымбат баалуу нерселериңди алып кетишет“»,— дешти.
7 Ошондо Ысрайылдын падышасы өз жериндеги аксакалдардын бардыгын чакырып: «Көрдүңөрбү, мунун арам ою бар! Аялдарың менен уулдарыңды, күмүшүң менен алтыныңды бересиң дегенде, макул болбодум беле»,— деди.
8 Ошондо бүт эл, бүт аксакалдар: «Аны укпа, айтканына макул болбо»,— дешти.
9 Ошондуктан ал Бенадаттын кабарчыларына: «Улуу урматтуу падышама: „Кулуң биринчи жолку айткандарыңды аткарат, бул жолкусун болсо аткара албайт“,— деп айтып баргыла»,— деди. Кабарчылар анын сөзүн падышага айтып барышты.
10 Бенадат ага кабарчыларын дагы жөнөтүп: «Көрөсүң, Самария талкалангандан кийин, калган топурагынан кылкылдаган жоокерлериме бир уучтан да тийбей калат! Эгер тие турган болсо, анда мени кудайлар катуу жазаласын!» — деп айттырып жиберди.
11 Ысрайылдын падышасы болсо: «Ага: „Курал-жарагын тагынып жаткан киши жеңиш менен кайтып келип, аларды чечип жаткансып мактанбасын“,— деп айтып койгула»,— деди.+
12 Чатырда башка падышалар менен ичип отурган Бенадат муну укканда кишилерине: «Камдангыла!» — деди. Алар шаарга чабуул жасаганга камданып, даяр болуп туруп калышты.
13 Ошондо Ысрайылдын падышасы Ахапка+ бир пайгамбар келип: «Жахаба мындай дейт: „Жер жайнаган бул аскерди көрдүңбү? Бүгүн булардын баарын колуңа салып берем, ошондо менин Жахаба экенимди билесиң“»,— деди.+
14 Ахап: «Ким аркылуу салып берет?» — деп сурады. Ал: «„Дубан башчыларынын жардамчылары аркылуу салып берем“,— деп жатат Жахаба»,— деди. Ахап кайра: «Салгылашты ким баштайт?» — деп сурады. Ал: «Сен»,— деди.
15 Ахап дубан башчыларынын жардамчыларын эсептеп чыкты, алардын саны 232 болду. Анан согушка жарактуу ысрайылдыктарды эсептеди. Алардын саны 7 000 болду.
16 Алар түштө, Бенадат менен ага жардамга келген 32 падыша чатырларда ичип отурушканда, шаардан чыга башташты.
17 Адегенде дубан башчыларынын жардамчылары чыкты. Ошондо Бенадат эмне болуп жатканын билип келгенге кишилерин жиберди. Алар кайра келип: «Самариядан кишилер чыгып келатат»,— деп айтышты.
18 Ал: «Багынып бергени чыгып келатышса да, согушканы чыгып келатышса да, тирүүлөй колго түшүргүлө»,— деди.
19 Дубан башчыларынын жардамчылары шаардан чыккандан кийин, артынан аскерлер чыгып,
20 баары душмандарын өлтүрө башташты. Ошондо сириялыктар качып жөнөштү,+ ысрайылдыктар алардын артынан түшүштү. Сириянын падышасы Бенадат да атына минип, бир нече атчан менен чогуу качып кетти.
21 Ысрайылдын падышасы чыгып, алардын атчандары менен согуш арабаларын талкалап жатты. Ошентип, сириялыктарга катуу сокку урду.
22 Бир нече убакыт өткөндөн кийин Ысрайылдын падышасына баягы пайгамбар+ келип: «Барып, аскериңди чыңда. Анан эмне кылышты ойлонуп көр.+ Себеби Сириянын падышасы эмки жылдын башында* сага дагы кол салат»,— деди.+
23 Сириянын падышасына кызматчылары: «Алардын Кудайы — тоонун Кудайы, алар бизди ошон үчүн жеңип алышты. Эгер алар менен түздүктө согушсак, жеңип алабыз.
24 Сиз мындай кылыңыз: эми аскерди башкарганга падышалардын ордуна+ башкаруучуларды коюңуз.
25 Канча аскериңиз кырылса, кайра ошончо аскер топтоңуз. Канча атыңыздан, канча согуш арабаңыздан айрылсаңыз, кайра ошончо ат, ошончо араба чогултуңуз. Анан алар менен түздүктө согушалы, ошондо сөзсүз жеңебиз»,— дешти. Падыша алар айткандай кылды.
26 Жылдын башында Бенадат сириялыктарды чогултуп, ысрайылдыктар менен согушуш үчүн Апекке+ барды.
27 Ысрайылдыктар да чогулуп, керектүү нерсенин баарын камдап алып, сириялыктар менен согушканы барышты. Анан сириялыктардын тушуна жайгашканда алардын жер жайнаган аскерине салыштырмалуу эчкинин кичинекей эки тобундай эле болуп калышты.+
28 Ошондо Ысрайылдын падышасына баягы чыныгы Кудайдын кишиси келип: «Жахаба мындай дейт: „Сириялыктар: “Жахаба — түздүктүн Кудайы эмес, тоонун Кудайы”,— деп айтышкандыктан, мен бул сансыз элди колуңа салып берем,+ ошондо менин Жахаба экенимди билесиңер“»,+— деди.
29 Ошентип, алар 7 күн маңдай-тескей турушту. Жетинчи күнү согуш башталып, ысрайылдыктар бир күндүн ичинде эле сириялыктардын 100 000 жөө аскерин өлтүрүштү.
30 Калгандары Апек+ шаарына качып киришти. Аман калган ошол 27 000 кишини ал жерден дубал басып калды. Бенадат болсо шаарга качып кирип, бир үйдүн түпкү бөлмөсүнө жашынып калды.
31 Кызматчылары ага: «Биз Ысрайылдын падышаларын ырайымдуу* деп укканбыз. Ошон үчүн бизге уруксат этсеңиз, белибизге таар* курчанып, башыбызга жип байлап, Ысрайылдын падышасына баралы. Мүмкүн, жаныңызды аман калтырар»,— дешти.+
32 Анан белдерине таар курчанып, баштарына жип байлап, Ысрайылдын падышасына барышты да: «Кулуңуз Бенадат: „Суранам, мени өлтүрө көрбө“,— деп жатат»,— дешти. Ысрайылдын падышасы: «Ал тирүү бекен? Ал — менин бир тууганым*»,— деди.
33 Бенадаттын кызматчылары муну жакшылыктын жышааны катары кабыл алышты. Алар Ахаптын чын көңүлдөн айтып жатканын түшүнүп: «Ооба, Бенадат сиздин бир тууганыңыздай эле»,— дешти. Ахап: «Барып, аны мага алып келгиле»,— деди. Бенадат келгенде, Ахап аны өзүнүн арабасына отургузду.
34 Бенадат ага: «Атам сенин атаңан тартып алган шаарлардын баарын сага кайтарып берем. Атам мурун Самарияда каалаган көчөсүндө базар ачкандай эле, сен да базар ачыш үчүн Дамасктан каалаган көчөлөрүңдү тандап ал»,— деди.
Ахап: «Эгер ушундай келишим түзө турган болсок, сени коё берем»,— деди.
Анан келишим түзгөндөн кийин аны коё берди.
35 Жахабанын буйругу боюнча, пайгамбарлардын*+ бири экинчисине: «Мени урчу»,— деди. Бирок тиги болбой койду.
36 Ошондо ал: «Жахабанын айтканын аткарбай койгонуң үчүн жанымдан кетериң менен арстанга жем болосуң»,— деди. Анан тиги анын жанынан кеткенден кийин, алдынан арстан чыгып, аны жара тартты.
37 Андан кийин пайгамбар башка бир кишиге барып: «Мени урчу»,— деди. Ал аны уруп, жарадар кылып койду.
38 Анан пайгамбар барып, жолдун боюнда падышаны күтүп турду. Башкалар тааныбашы үчүн, көзүн таңып алды.
39 Падыша өтүп баратканда, ага: «Кулуңуз катуу салгылаш болуп жаткан жерден келди. Ошол жакта жүргөндө бир киши мага бир туткунду алып келип: „Муну кайтарып тур. Эгер качып кетсе, ордуна өзүң өлөсүң+ же 34 килограмм* күмүш төлөп бересиң“,— деди.
40 Анан кулуңуз бир иштер менен алектенип жатканда, тиги туткун качып кетиптир»,— деди. Падыша ага: «Анда күнөө өзүңдө турбайбы, эми жазасын тартасың»,— деди.
41 Пайгамбар шак көзүндөгү таңууну алып салды. Ошондо падыша анын пайгамбарлардын бири экенин тааныды.+
42 Пайгамбар ага: «Жахаба мындай дейт: „Мен өлүмгө өкүм кылган кишини коё бергениң үчүн,+ анын ордуна өзүң өлөсүң,+ анын элинин ордуна сенин элиң кырылат“»,+— деди.
43 Ысрайылдын падышасы көңүлү чөгүп, кайгырган бойдон Самарияга,+ үйүнө кетти.
Шилтемелер
^ Б. а. эмки жазда.
^ Же: «сүйүүсү туруктуу».
^ Салт боюнча, аны кайгырганда, күйүт тартканда жана башка ушул сыяктуу учурларда кийишчү же колдонушчу.
^ Бул жердеги еврей сөзү даражасы бирдей кишиге карата да колдонулат.
^ Сөзмө-сөз: «пайгамбар уулдарынын». Бул сөз айкашы чогуу атайын таалим алган же чогуу кызмат кылган пайгамбарлардын тобун билдириши мүмкүн.
^ Сөзмө-сөз: «1 талант». Б14 тиркемесин кара.
