Падышалар 1-китеп 3:1—28
3 Сулайман Мисирдин* падышасы фараонго күйөө бала болду. Ал анын кызын+ алып, Дөөтүнүн шаарына+ алып келди. Сулайман өзүнүн үйүн,+ Жахабанын үйүн,+ Иерусалимдин дубалын+ куруп бүткүчө, аялы ошол жерде жашады.
2 Ал убакта Жахабанын ысмына арналган үй али курула элек болгондуктан,+ эл курмандыктарын бийик жерлерде*+ чалчу.
3 Сулайман Жахабаны жакшы көргөндүктөн атасы Дөөтүнүн осуяттарын аткарып жашады. Бирок курмандыктарды бийик жерлерде чалып, аларды ошол жакта өрттөчү.+
4 Бир күнү Сулайман падыша курмандык чалганы Гибонго барды, себеби сыйына турган негизги бийик жер ошол жакта болчу.+ Ал ошол курмандык жайында бүтүндөй өрттөлчү курмандыкка 1 000 мал чалды.+
5 Сулайман Гибондо жүргөндө, Жахаба түн ичинде ага түшүндө: «Айт, сага эмне берейин?» — деди.+
6 Сулайман ага: «Менин атам, кулуң Дөөтү, сага берилип, адил болуп, сенин алдыңда таза жүрөк менен жүргөндүктөн, сен аны улуу сүйүүңө бөлөдүң*. Анын тактысында отура турган уул берип, атамды абдан жакшы көрөрүңдү ушу күнгө чейин көрсөтүп келатасың*.+
7 Жахаба Кудайым, мен али жаш*, тажрыйбасыз болсом да, сен мени, өзүңдүн кулуңду, атам Дөөтүнүн ордуна падыша кылдың.+
8 Кулуң өзүң тандап алган сан жеткис, көптүгүнөн санап бүткүс элиңди+ башкарып жатат.
9 Элиңе сот жүргүзүшү үчүн,+ жакшы менен жаманды ажырата алышы үчүн,+ кулуңа сага бүт жүрөгү менен баш ийгенге жардам бере көр. Болбосо бул сансыз* элиңе кантип сот жүргүзө алат?» — деди.
10 Сулаймандын ушуну сураганы Жахабага жакты.+
11 Ошондуктан ага: «Узак өмүр, байлык же душмандарыңдын өлүмүн тилебей, сот иштерин териштиргенге акылмандык* сураганың үчүн,+
12 өтүнүчүңдү орундатам.+ Сага акылмандык, түшүнүк* берем.+ Сендей адам сага чейин болгон эмес, сенден кийин да болбойт.+
13 Мен сага сен сурабаган нерсени да+ — байлык менен атак-даңкты да+ — берем, көзүң тирүү кезде сендей падыша болбойт.+
14 Эгер атаң Дөөтүдөй болуп көрсөтмөлөрүм менен осуяттарымды аткарып, менин жолумда жүрсөң,+ өмүрүңдү да узун кылам»,— деди.+
15 Сулайман ойгонуп, аян алганын түшүндү. Ал Иерусалимге келип, Жахабанын келишим сандыгынын алдына барып, бүтүндөй өрттөлчү курмандыктар менен тынчтык курмандыктарын+ чалды жана кызматчыларынын баарын чакырып, той өткөрдү.
16 Күндөрдүн биринде падышанын алдына 2 сойку аял келди.
17 Алардын бири: «Мырзам, биз бул экөөбүз бир үйдө жашайбыз. Мен төрөгөндө, бул үйдө болчу.
18 Мен төрөгөндөн 3 күн өткөндөн кийин, бул да төрөдү. Үйдө бизден башка эч ким жок болчу, экөөбүз эле болчубуз.
19 Түндө уктап жатып бул аял баласын басып өлтүрүп алыптыр.
20 Анан түн ортосунда туруп, күңүңүз уктап жатканда, менин баламды өзүнүн койнуна салып, өзүнүн өлүп калган баласын болсо менин койнума салып коюптур.
21 Эртең менен туруп, баламды эмизейин десем эле — өлүп калыптыр. Бирок жакшылап карасам, менин балам эмес экен»,— деди.
22 Ошондо берки аял: «Жок, тирүү бала меники, өлүп калганы сеники!» — деди. Тиги аял болсо: «Жок, өлүп калган бала сеники, тирүү бала меники»,— деди. Ошентип, экөө падышанын алдында талашып жатышты.
23 Акырында падыша: «Бул аял: „Тирүү бала меники, өлүп калганы сеники!“ — десе, мунусу болсо: „Жок, өлүп калган бала сеники, тирүү бала меники!“ — деп жатат»,— деди да,
24 анан: «Кылыч алып келгиле»,— деди. Кылыч алып келишкенде,
25 ал: «Тирүү баланы бөлө чаап, жарымын буга, жарымын болсо мунусуна бергиле»,— деди.
26 Ошондо тирүү баланын энесинин жүрөгү кабынан чыгып кете жаздап, падышага: «Мырзам! Тирүү баланы буга эле бергиле, өлтүрө көрбөгүлө»,— деп жалбарып жиберди. Берки аял болсо: «Мага да жок, сага да жок болсун! Бөлө чапкыла!» — деди.
27 Ошондо падыша: «Баланы өлтүрбөгүлө, тиги аялга бергиле. Баланын энеси — ошол»,— деди.
28 Падыша чыгарган бул өкүм жөнүндө бүт ысрайылдыктар угуп, аны аябай сыйлап* калышты.+ Анткени Кудайдын ага сот өкүмдөрүн чыгарганга акылмандык бергенин түшүнүштү.+
Шилтемелер
^ Египеттин.
^ Же: «улуу туруктуу сүйүүңө бөлөдүң».
^ Же: «атама улуу туруктуу сүйүүңдү көрсөтүп келатасың».
^ Же: «жаш бала».
^ Сөзмө-сөз: «оор».
^ Же: «түшүнүк».
^ Сөзмө-сөз: «акылдуу, түшүнүктүү жүрөк».
^ Сөзмө-сөз: «падышадан коркуп калышты».
