Петирдин 1-каты 2:1—25
2 Ошондуктан ар кандай жамандыктан,+ алдамчылыктан, эки жүздүүлүктөн, көрө албастыктан, заар сөздөрдөн арылгыла.
2 Жаңы төрөлгөн ымыркай+ сүттү эңсегендей, силер да Кудайдын Сөзүндөгү таза сүткө табитиңерди арттыргыла. Аны менен азыктанганыңардын аркасында өсүп-жетилип, куткарыласыңар.+
3 Мырзабыздын боорукер экенин сезип* көргөн болсоңор, ошенте аласыңар.
4 Силер ага — адамдар жаратпай койгон,+ бирок Кудай тандап алып, жогору баалаган тирүү ташка+ — ишенгендиктен,
5 тирүү таштар болуп эсептелген силерден Кудайдын ыйык руху менен үй тургузулуп жатат.+ Ал үй, силер Иса Машаяк аркылуу Кудайга жаккан+ каймана маанидеги* курмандыктарды+ тартуу кыла турган ыйык дин кызматчылардын тобун түзүшүңөр үчүн, тургузулуп жатат.
6 Себеби Ыйык Жазмада: «Мен Сионго тандалган ташты — пайдубалдын бурчуна коюла турган кымбат баалуу ташты — коюп жатам. Ага ишенген бир да адамдын көңүлү эч качан калбайт»,— деп айтылат.+
7 Демек, ага ишенгендер, силер үчүн ал — кымбат баалуу таш; ал эми ишенбегендер үчүн андай эмес. Ыйык Жазмада ошол таш жөнүндө: «Куруучулар жаратпай койгон+ таш бурчка коюла турган негизги таш болуп калды»,— делген;+
8 ал — «адамдар чалына турган таш, жолунда бөгөт боло турган таш».+ Алар Кудайдын сөзүнө баш ийбегендиктен чалынып жатышат. Андай адамдар акыры ошону көрмөк.
9 Ал эми силер «тандалган элсиңер, падышалык кыла турган дин кызматчыларсыңар, ыйык элсиңер,+ Кудайдын өзгөчө элисиңер*».+ Силерди караңгылыктан өзүнүн ажайып жарыгына чакырган+ Кудайдын «укмуш сонун сапаттарын* бардык жерде жарыялаш» үчүн+ тандалгансыңар.
10 Бир кездерде Кудайдын эли эмес элеңер, азыр анын элисиңер;+ ал силерге кайрымдуулук кылган эмес эле, эми болсо кылып жатат.+
11 Азыркы дүйнөдө келгиндер жана убактылуу тургундар катары жашап жаткан+ сүйүктүү бир туугандарым, силерди өзүңөргө каршы күрөшкөн+ денеңердин каалоолорун аткарбаганга үндөйм.+
12 Башкалардын арасында жүрүм-турумуңар мындан ары да үлгүлүү болсун.+ Ошондо алар силерди жаман иш кылышат деп айыпташса да, жакшы иштериңерди көрүп,+ Кудай текшерген күнү аны даңкташат.
13 Адамдар орноткон бийликтин баарына Мырзабыз үчүн баш ийгиле:+ жогорку абалды ээлеген падышага+ болобу
14 же ал жаман иш кылгандарды жазалаганга, жакшы иш кылгандарды мактаганга дайындаган башкаруучуларга болобу, баарына баш ийгиле.+
15 Себеби Кудай силердин жакшы иштерди кылып, акылсыз адамдардын куру сөздөрүнө бөгөт коюшуңарды* каалайт.+
16 Силер эркин адамдарсыңар,+ бирок эркиндигиңерди жаман иш кылыш үчүн* эмес,+ Кудайдын кулдары катары пайдалангыла.+
17 Адамдардын баарын урматтагыла,+ Кудай кошкон бир туугандарыңардын баарын сүйгүлө,+ Кудайдан корккула,+ падышага урмат көрсөткүлө.+
18 Кызматчылар* кожоюндарын, боорукер жана акыл-эстүүлөрүн гана эмес, көңүлүнө жагыш кыйын болгондорун да урматтап, баш ийишсин.+
19 Анткени адам Кудайдын алдында абийирин таза сактагысы келгендиктен кыйынчылык тартып, адилетсиз түрдө азап чегип жатса, бул Кудайга жагат.+
20 Эгерде күнөө кылганыңар үчүн таяк жеп, ошого чыдап жатсаңар, мунун эмнеси мактоого татыктуу?+ Ал эми жакшы иш кылганыңар үчүн азап чегип жатсаңар, бул Кудайга жагат.+
21 Чынында, Кудай силерди ушул үчүн тандап алган. Себеби Машаяк да силер үчүн азап тартып,+ анын изи менен так басканга аракет кылышыңар үчүн, силерге үлгү калтырган.+
22 Ал бир да күнөө кылган эмес,+ оозунан бир да жалган сөз чыккан эмес.+
23 Аны сөз менен кордошкондо,+ эч кимисин кордогон эмес.+ Азап тарттырышканда,+ эч кимисин коркуткан эмес, анын ордуна, адилеттүү Сотко үмүт арткан.+
24 Күнөөдөн арылып, Кудайга жаккандай* жашашыбыз үчүн, ал устунга кадалып,+ биздин күнөөлөрүбүздү өзү көтөргөн*.+ «Силер анын жарааттарынын аркасында айыктыңар».+
25 Анткени силер адашкан койлордой элеңер,+ азыр болсо жаныңардын сактоочусуна, кайтаруучусуна*+ кайрылып келдиңер.
Шилтемелер
^ Же: «татып».
^ Же: «Кудайдын ыйык рухунун жетеги менен тартуу кылына турган».
^ Же: «сапаттары менен иштерин».
^ Же: «менчигисиңер».
^ Же: «оозун басышыңарды».
^ Же: «жаман иштерди жаап-жашырыш үчүн; акташ үчүн».
^ Же: «Кулдар».
^ Же: «адил иштерди кылыш үчүн».
^ Сөзмө-сөз: «өзүнүн денесинде көтөргөн».
^ Же: «өмүрүңөрдүн көзөмөлчүсүнө, койчусуна».
