Римдиктерге 12:1—21
12 Ошондуктан, бир туугандарым, Кудай ырайым кылып жаткандыктан, силерден өтүнөм: денеңерди+ Кудайга тирүү, ыйык,+ ага жага турган курмандык катары бергиле. Ошентип, ыйык кызматыңарды акыл жөндөмүңөрдү колдонуп аткаргыла.+
2 Мындан ары өзүңөрдү бул дүйнөнүн* калыпташына жол бербегиле.+ Анын ордуна, Кудайдын эркин түшүнүп, анын жакшы, жагымдуу*, жеткилең экенине ынанышыңар үчүн, акылыңарды жаңыртып, өзгөргүлө.+
3 Кудай мага ырайым кылгандыктан, силерди буга үндөйм: өзүңөр жөнүндө тийиштүүдөн артык ойлобогула.+ Анын ордуна, акыл-эстүү болуп, ар бириңер Кудай берген ишенимиңерге жараша өзүңөр жөнүндө туура ойдо болгула.+
4 Денебиздин мүчөлөрү көп болсо да,+ баары бирдей иш аткарбайт.
5 Ошол сыяктуу биз да көп болгонубуз менен, Машаяк менен биримдикте бир денени түзөбүз, ал эми өз-өзүнчө алганда, өз ара биригип турган мүчөлөрбүз.+
6 Кудай ырайымдуу болгондуктан,+ бизге ар кандай жөндөм* берген. Ошондуктан пайгамбарлык кылуу жөндөмүнө ээ болсок, Кудай берген ишенимибизге жараша пайгамбарлык кылалы;
7 башкаларга кызмат кылуу жөндөмүнө ээ болсок, кызмат кылалы; кимге окутуу жөндөмү берилсе, окутсун;+
8 кимге башкаларга дем-күч бергенге жөндөм берилсе, дем-күч берсин*;+ ким бир нерсесин башкалар менен бөлүшсө, берешендик менен бөлүшсүн;+ ким жетектесе, бүт ынтасы менен жетектесин;+ ким кайрымдуулук кылса, кубанып кылсын.+
9 Сүйүүңөр таза болсун*.+ Жамандыкты жек көрүп,+ жакшылык кылганга умтулгула.
10 Бири-бириңерди бир тууганыңардай жакшы көрүп, назик сезимдерди туйгула. Бири-бириңерди озунуп урматтагыла.+
11 Жалкоо болбогула*,+ мээнеткеч* болгула. Кудайдын ыйык рухунун таасири менен ынталуу болгула.+ Жахабага кулдарындай кызмат кылгыла.+
12 Үмүтүңөрдү ойлоп кубангыла. Кыйынчылыкка кабылганда туруктуу болгула.+ Кудайдан дайыма тиленгиле.+
13 Колдо бар нерсеңерди Кудайдын элинин арасындагы муктаж болгон адамдар* менен бөлүшкүлө.+ Дайыма меймандос болгула.+
14 Силерди куугунтуктагандарга батаңарды бергиле.+ Каргабагыла, батаңарды бергиле.+
15 Кубангандар менен кубангыла, ыйлагандар менен ыйлагыла.
16 Өзүңөрдү кандай ойлосоңор, башкаларды да ошондой ойлогула. Өзүңөр жөнүндө жогору ойдо болбогула, тескерисинче, өзүңөрдү төмөн койгула.+ Акылдуусунбагыла.+
17 Жамандыкка жамандык кылбагыла.+ Бардык адамдардын көз алдында жакшы деп эсептелген иштерди кылгыла.
18 Колуңардан келишинче, бардыгы менен тынчтыкта болгула.+
19 Сүйүктүү бир туугандарым, өч албагыла, баарын Кудайга койгула*.+ Анткени Ыйык Жазмада: «„Өчтү мен алам, тиешесин мен берем“,— дейт Жахаба»,— деп жазылган.+
20 «Душманың ачка болсо, тойгуз; суусап турса, суусунун кандыр. Ошондо анын жүрөгүн жибитесиң»*.+
21 Жамандыкка жеңилбегиле, жамандыкты дайыма жакшылык менен жеңгиле.+
Шилтемелер
^ Же: «туура».
^ Сөзмө-сөз: «белек».
^ Же: «акыл-насаат айтканга жөндөм берилсе, акыл-насаат айтсын».
^ Же: «эки жүздүү болбосун».
^ Же: «Ишиңерди кечеңдетпегиле».
^ Же: «тырышчаак; ынталуу».
^ Же: «Кудайдын каарына орун бергиле».
^ Сөзмө-сөз: «башына чок үйөсүң».
