Римдиктерге 15:1—33
15 Биз, ишеними күчтүүлөр, ишеними алсыздардын алсыздыктарын көтөрүшүбүз керек.+ Өзүбүзгө жакканды эле кылбашыбыз керек.+
2 Анын ордуна, ар бирибиз башканын пайдасын көздөп, дем-күч бериш үчүн ага жакканды кылалы.+
3 Анткени Машаяк да өзүнө жакканды эле кылган эмес.+ Бул жөнүндө Ыйык Жазмада: «Сага акарат кылгандардын акарат сөздөрү мага тийди»,— деп жазылган.+
4 Дем-күч берип, туруктуу+ болгонго жардам берген Ыйык Жазма аркылуу үмүткө+ ээ болушубуз үчүн, мурун жазылгандын баары бизге насаат катары жазылган.+
5 Кудай силерге туруктуулук берип, сооротуп-жубатсын, Машаяк Исадай ой жүгүрткөнгө жардам берсин.
6 Ошондо Мырзабыз Иса Машаяктын Кудайын жана Атасын биримдикте, бир үндөн даңктайсыңар.+
7 Кудай даңкталышы үчүн, Машаяк силерди кабыл алгандай,+ силер да бири-бириңерди жылуу кабыл алгыла.+
8 Силерге Машаяктын сүннөткө отургузулгандарга кызмат кылганын айткым келет.+ Ал ошентип кызмат кылып, Кудайдын ишеничтүү экенин жана анын алардын ата-бабаларына берген убадаларына толук ишенсе болорун тастыктаган.+
9 Ошондой эле ал Кудайды кайрымдуулугу үчүн башка элдер да даңкташы үчүн кызмат кылган.+ Ыйык Жазмада бул тууралуу: «Ошондуктан элдердин арасында сени даңктайм, ысмыңды даңазалап ырдайм»,— деп жазылган.+
10 Дагы бир жеринде: «Элдер, Кудайдын эли менен бирге кубангыла»,— делген.+
11 Ошондой эле: «Бардык улуттар, Жахабаны даңктагыла, бардык элдер аны даңкташсын»,— деп айтылган.+
12 Ышая пайгамбар да: «Жышайдын урпактарынан бирөө чыгат*,+ ал көп элдерди башкарат.+ Элдер ага үмүт артышат»,— деген.+
13 Силерге үмүт берген Кудай ага таянганыңар үчүн силерди зор кубаныч менен тынчтыкка бөлөсүн. Ошондо анын ыйык рухунун жардамы менен үмүткө бай болосуңар.+
14 Бир туугандарым, силердин жакшылык кылганга дилгир экениңерге, жетиштүү билим алганыңарга жана бири-бириңерге акыл-насаат айта аларыңарга шектенбейм.
15 Ошентсе да айрым маселелер жөнүндө силерге ачык жазып жатам. Буларды Кудай мага ырайым кылгандыктан эсиңерге салып жатам.
16 Ал ырайым кылгандын аркасында мен башка элдер үчүн Машаяк Исанын кызматчысы болуп, Кудайдын жакшы кабарын жарыялап жүрөм.+ Бул ыйык ишке башка элдер Кудайдын ыйык руху аркылуу ыйыкталышы жана Кудай аларды тартуу катары кабыл алышы үчүн катышып жатам.+
17 Ошондуктан Машаяктын жолдоочусу болгонума, Кудайга кызмат кылып жатканыма кубанам.
18 Мен өзүм кылган эч бир нерсе жөнүндө айтканга батынбайм. Башка элдер Машаякка баш ийиши үчүн, ал мен аркылуу эмнелерди кылса жана айтса, ошолор жөнүндө гана айтам.
19 Ал элдер Кудайдын ыйык руху менен жасалган керемет-жышаандардан+ улам да баш ийишти. Ошентип, мен Иерусалимден Илирикке чейинки аймакты кыдырып, Машаяк жөнүндөгү жакшы кабарды толугу менен* жарыяладым.+
20 Башка бирөө баштаган ишти улантпаш үчүн* жакшы кабарды Машаяктын ысмы белгилүү болгон жерлерде жарыялабайм деп чечип алгам.
21 Анткени Ыйык Жазмада: «Аны ал жөнүндө кабары жоктор билишет*, ал жөнүндө уга электер түшүнүшөт»,— деп жазылган.+
22 Ошо себептен да силерге көп жолу баргым келип, бирок бара албай калдым.
23 Эми болсо бул аймактарда мен бара элек жерлер калган жок, анын үстүнө, силерге көп* жылдан бери баргым келип жүрөт.
24 Ошон үчүн Испанияга баратып силер менен көрүшүп, жаныңарда бир аз убакыт болом деп үмүттөнөм. Андан кийин кайра жолго чыкканда мени бир аз узатып коёрсуңар.
25 Бирок азыр бир туугандарыбызга жардам бериш үчүн* Иерусалимге барганы жатам.+
26 Анткени Македония менен Ахаядагылар колунда болгон нерселеринен Иерусалимдеги жакыр боордошторубуз үчүн чын ниеттен тартуу чогултуп беришти.+
27 Ооба, алар муну чын ниеттен кылышты. Бирок, чынында, өздөрү аларга карыз болчу, себеби Иерусалимдеги боордошторубуз Кудайдан алган нерселерин алар менен бөлүшүшкөн. Ошон үчүн алар колунда болгон нерсесин Иерусалимдегилер менен бөлүшкөнгө милдеттүү.+
28 Аларга чогултулган тартууну жеткирип бергенден кийин Испанияга баратып силерге тие кетем.
29 Силерге Машаяктын мол баталары менен барарымды билем.
30 Бир туугандарым, биз Мырзабыз Иса Машаякка ишенгендиктен жана Кудайдын ыйык рухунун жардамы менен бири-бирибизди жакшы көргөндүктөн, силерден Кудайдан мен үчүн жалындуу тиленип тургула деп суранам;+ өзүм да тиленип жатам.
31 Жүйүт жериндеги Исага ишенбегендердин колунан куткарылышым үчүн,+ Иерусалимдеги Кудайдын эли* мен алып барган тартууну жакшы кабыл алышы үчүн тиленгиле.+
32 Ошондо, Кудай кааласа, силерге кубанычым ашып-ташып барам да, бири-бирибизди кубаттап, сергитебиз.
33 Тынчтыктын булагы болгон Кудай баарыңар менен болсун.+ Оомийн.
Шилтемелер
^ Сөзмө-сөз: «Жышайдын тамыры пайда болот».
^ Же: «кылдат».
^ Сөзмө-сөз: «Башка бирөө тургузган пайдубалдын үстүнө курбаш үчүн».
^ Же: «көрүшөт».
^ Же: «бир нече».
^ Же: «ыйыктарга кызмат кылыш үчүн».
