Римдиктерге 7:1—25
7 Бир туугандарым, Мыйзам адамга ал тирүү кезде гана үстөмдүк кыларын билбейсиңерби? Муну Мыйзамды билген силерге айтып жатам.
2 Мисалы, күйөөсү бар аял күйөөсү тирүү кезде ага мыйзам боюнча байланган болот. Ал эми күйөөсү өлүп калса, анын мыйзамынан* бошотулат.+
3 Ошондуктан күйөөсү тирүү кезде башкага турмушка чыкса, ойноштук кылган болот.+ Бирок күйөөсү өлүп калса, аял анын мыйзамынан бошотулгандыктан башка кишиге турмушка чыкса, ойноштук кылган болбойт.+
4 Анын сыңарындай, бир туугандарым, силер да Машаяктын курмандыкка чалынган денеси аркылуу Муса пайгамбардын Мыйзамынан бошотулдуңар. Мунун аркасында башка бирөөгө — тирилтилген Машаякка+ — таандык болуп калдыңар.+ Ошон үчүн эми Кудайга кызмат кылып, жемиш бере алабыз.+
5 Күнөөлүү табиятыбыз боюнча жашап жүргөнүбүздө, бизге өлүмгө алып бара турган жаман каалоолорубуз үстөмдүк кылчу.+ Муну Мыйзам ачыкка чыгарды.
6 Азыр болсо бизди чектеп турган Мыйзам үчүн өлүп, анын бийлигинен бошотулдук.+ Ошонун аркасында Кудайга мурдагыдай жазуу түрүндөгү мыйзамдар боюнча эмес,+ жаңыча, тактап айтканда, ыйык рухунун жетеги менен кызмат кылып, анын кулу боло алабыз.+
7 Анда эмне демекчибиз? Мыйзамда кемтик барбы?* Жок, такыр андай эмес! Эгер Мыйзам болбосо, күнөө деген эмне экенин билмек эмесмин.+ Мисалы, Мыйзамда: «Көз артпагыла»,+— деп айтылбаса, көз арткан туура эмес экенин билмек эмесмин.
8 Бирок күнөө ошол осуяттын негизинде менде көз артуунун ар кандай түрүн пайда кылды. Себеби мыйзам жокто күнөө өлүк болчу.+
9 Мыйзам жок кезде мен тирүү болчумун. Ал эми Мыйзам пайда болгондо, күнөө тирилди, мен болсо өлдүм.+
10 Ошондо өмүргө алып барышы керек болгон осуяттын+ өлүмгө алып барарын билдим.
11 Себеби күнөө осуяттан пайдаланып мени азгырып, осуят аркылуу мени өлтүрдү.
12 Ошондуктан Мыйзамдын өзү ыйык, осуят да ыйык, адил жана жакшы.+
13 Анда, эмне, мени жакшы нерсе* өлтүрдүбү? Жок, такыр андай эмес! Мени күнөө өлтүрдү. Мыйзам өзү жакшы, бирок ал мени күнөө өлтүргөнүн айкын кылды.+ Ошентип, осуят күнөөнүн канчалык жаман экенин ачык көрсөттү.+
14 Биз билгендей, Мыйзамды Кудай өзүнүн ыйык руху аркылуу берген, мен болсо күнөөгө кулчулукка сатылган пендемин.+
15 Эмне кылып жатканымды өзүм түшүнбөйм. Анткени кылгым келген нерсени кылбайм да, жек көргөн нерсемди кылам.
16 Мыйзамдын жакшы экенине кошулам, бирок кылгым келбеген нерсени дагы деле кылып келем.
17 Чынында, аны мен эмес, ичимде жашаган күнөө кылып жатат.+
18 Менде, башкача айтканда, денемде жакшы нерсе жашабайт, анткени жакшылык кылгым келет, бирок кыла албайм.+
19 Кылгым келген жакшы нерсени кылбайм да, кылгым келбеген жаман нерсени кайра-кайра кылам.
20 Эгер кылгым келбеген нерсени кылып жатсам, анда аны мен эмес, ичимде жашаган күнөө кылып жатат.
21 Ушундан улам мындай бир нерсени* байкадым: туура нерсени кылгым келгенде, ичимдеги нерсе жамандыкка түртүп турат.+
22 Жүрөгүмдүн түпкүрүндө Кудайдын мыйзамынан рахат алам*,+
23 ал эми денемде башка мыйзам бийлик кыларын көрүп турам. Бул мыйзам акылымдагы мыйзамга каршы күрөшүп,+ мени денемдеги күнөөнүн мыйзамына туткун кылып келет.+
24 Мен бир байкуш адаммын! Мени ушундай өлүмгө* алып бараткан денеден ким куткарат?
25 Мени Мырзабыз Иса Машаяк аркылуу Кудай куткарат, ошон үчүн ага ыраазымын! Ооба, акылым — Кудайдын мыйзамынын кулу, ал эми денем — күнөөнүн мыйзамынын кулу.+
Шилтемелер
^ Же: «бийлигинен».
^ Сөзмө-сөз: «Мыйзам күнөөбү?»
^ Б. а. Кудайдын Мыйзамы.
^ Сөзмө-сөз: «мыйзамды».
^ Же: «Кудайдын мыйзамын чындап жакшы көрөм».
^ Тукум кууп өткөн күнөөнүн кесепети болгон өлүм жөнүндө сөз жүрүп жатат.
