Сандар 10:1—36
10 Жахаба Мусага мындай деди:
2 «Күмүштөн балка менен согуп эки сурнай+ жаса. Аларды жамаатты чогултуш үчүн жана чатырларды чечкенге белги бериш үчүн колдон.
3 Эки сурнай тең тартылганда, сенин жаныңа, жолугушуу чатырынын кире беришине бүт жамаат чогулсун.+
4 Ал эми алардын бирөө эле тартылганда, жаныңа башчылар, Ысрайылдагы миң сандаган кишилердин башчылары, чогулат.+
5 Сурнай үзүк-үзүк тартылганда, чыгыш тараптагы+ кошуундар жолго чыгышы керек.
6 Сурнай экинчи ирет үзүк-үзүк тартылганда, түштүк тараптагы+ кошуундар жолго чыгышы керек. Ал топтордун ар бири жолго чыгарда, сурнай үзүк-үзүк тартылсын.
7 Ал эми жамаатты чогултканда сурнай үзүк-үзүк тартылбасын.+
8 Сурнайларды дин кызматчылар, Арундун уулдары, тартышы керек.+ Бул — өзүңөр да, укум-тукумуңар да түбөлүккө аткарышыңар керек болгон көрсөтмө.
9 Эгер силерди кысымга алган душманыңарга каршы согуша турган болсоңор, элди согушка чакырып сурнай тарткыла.+ Ошондо Жахаба Кудайыңар үнүңөрдү угуп, душмандарыңардан куткарат.
10 Кубанычтуу күндөрүңөрдө,+ майрамдарда,+ ар бир айдын башында бүтүндөй өрттөлчү курмандыктарыңар менен+ тынчтык курмандыктарыңарды+ чалганда сурнай тарткыла. Ошондо Кудайыңар силерди эстеп, назарын салат. Мен Жахабамын, силердин Кудайыңармын».+
11 Экинчи жылдын экинчи айынын жыйырманчы күнүндө+ келишим сандыгы турган ыйык чатырдын үстүндөгү булут жогору көтөрүлдү.+
12 Ошондо ысрайыл эли бекитилген тартип+ боюнча Синай чөлүнөн чыгып, булут Паран+ чөлүнө токтогонго чейин, жол жүрүштү.
13 Алар Жахаба Муса аркылуу айткан тартип боюнча биринчи жолу жолго чыгышты.+
14 Биринчи болуп Жүйүт уруусу башчылык кылган 3 уруудан турган топ чыкты*. Жүйүт уруусунун башчысы Аминадаптын уулу Нахшон+ болчу.
15 Исахар уруусундагылардын тобуна Зуардын уулу Нетанел+ башчылык кылды.
16 Забулун уруусундагылардын тобуна Хелондун уулу Элиап+ башчылык кылды.
17 Ыйык чатыр чечилгенден кийин,+ аны ташыганга дайындалган Гершондун урпактары+ менен Мераринин урпактары+ жолго чыгышты.
18 Андан кийин Рубейин уруусу башчылык кылган 3 уруудан турган топ жолго чыкты. Рубейин уруусунун башчысы Элисурдун+ уулу Шедур болчу.
19 Шымон уруусундагылардын тобуна Зуришадайдын уулу Шелумиел+ башчылык кылды.
20 Гат уруусундагылардын тобуна Деуилдин уулу Элиасап+ башчылык кылды.
21 Андан кийин ыйык жайдагы буюмдарды көтөрүп жүргөнгө дайындалган Кааттын урпактары+ жолго чыгышты. Алар баргыча, жолугушуу чатыры тургузулуп бүтүп калмак.
22 Андан кийин Эпрайым уруусу башчылык кылган 3 уруудан турган топ жолго чыкты. Эпрайым уруусунун башчысы Амиюттун уулу Элишама+ болчу.
23 Менаше уруусундагылардын тобуна Педатсурдун уулу Гамалиел+ башчылык кылды.
24 Бенжемин уруусундагылардын тобуна Гидонинин уулу Абидан+ башчылык кылды.
25 Андан кийин Дан уруусу башчылык кылган 3 уруудан турган топ жолго чыкты. Алар бүт кошуунду арт жагынан кайтарып баратышты. Дан уруусунун башчысы Амишадайдын уулу Ахиезер+ болчу.
26 Ашыр уруусундагылардын тобуна Охрандын уулу Пагиел+ башчылык кылды.
27 Напталы уруусундагылардын тобуна Энандын уулу Акира+ башчылык кылды.
28 Ысрайылдыктар өздөрүнүн топтору менен ушундай тартипте жолго чыгышчу.+
29 Муса кайнатасы мидиандык Ребулдун*+ уулу Хобапка: «Биз Жахаба берем+ деген жерге баратабыз. Биз менен жүр,+ ошондо сага да жакшы болот, анткени Жахаба ысрайыл элине батасын берип, колдоп жүрөрүн убада кылган»,— деди.+
30 Бирок ал: «Жок, силер менен барбайм. Мен өз жериме, өз туугандарыма барам»,— деди.
31 Ошондо Муса: «Биз менен эле барчы, сен чатырларыбызды чөлдүн кайсы жерине тиксе болорун жакшы билесиң да. Бизге жол көрсөтүп бере аласың.
32 Биз менен барсаң,+ Жахаба бизге кандай жакшылык кылса, биз да сага ошондой жакшылык кылабыз»,— деди.
33 Ошентип, алар Жахабанын тоосунан жөнөп,+ 3 күн жол жүрүштү. Эл эс алып алышы үчүн, Жахабанын келишим сандыгын+ көтөргөндөр ылайыктуу жер издеп, 3 күн бою алардын алдында баратты.+
34 Жолго чыгышканда, Жахабанын булуту+ күндүзү алардын үстүндө болуп, жетектеп баратты.
35 Келишим сандыгын көтөргөндөр жолго чыккан сайын, Муса: «Оо, Жахаба, ордуңан тур!+ Душмандарың туш тарапка чачырап кетсин, сени жек көргөндөр сенден качсын»,— дечү.
36 Ал эми эс алганы токтогондо: «Оо, Жахаба, ордуңа кайтып келип, миң-миңдеген сансыз ысрайыл эли+ менен бол»,— дечү.
