Сандар 18:1—32
18 Анан Жахаба Арунга мындай деди: «Сен, уулдарың, укум-тукумуң ыйык жайга каршы жасалган бардык күнөөлөр үчүн жооп бересиңер.+ Дин кызматчылыкка тиешеси бар кайсы бир мыйзам бузулганда да сен уулдарың менен жооп бересиң.+
2 Өзүң менен кошо Леби уруусундагыларды, атаңдын уруусундагыларды, алып кел. Алар сага жардам беришсин, келишим сандыгы турган чатырдын алдында+ сага,+ уулдарыңа кызмат кылышсын.
3 Алар сенин алдыңдагы жана жолугушуу чатырына тиешелүү милдеттерин аткарышсын.+ Бирок ыйык жайга тиешелүү нерселер менен курмандык жайына жакындашпасын, болбосо алар да, силер да өлүп каласыңар.+
4 Алар сага жардам берсин, жолугушуу чатырындагы иштерди кылып, чатырга тиешелүү милдеттерин аткарышсын, башка эч ким* силерге жакындабасын.+
5 Мен мындан ары ысрайыл элине каарданбашым үчүн,+ ыйык чатырга, курмандык жайына+ тиешелүү милдеттериңерди аткаргыла.+
6 Ысрайыл элинин ичинен лебилерди, туугандарыңарды, алып, силерге белек катары бердим.+ Алар жолугушуу чатырына байланышкан иштерди аткарыш үчүн Жахабага кызмат кылганга берилди.+
7 Сен менен уулдарың дин кызматчы катары курмандык жайына жана көшөгөнүн* артындагы кызматка* тиешелүү милдеттериңерди аткарышыңар керек;+ силерге тапшырылган кызмат — ушул.+ Дин кызматчылыкты силерге белек катары берем. Ыйык жайга силерден башка ким жакындаса, өлүм жазасына тартылсын».+
8 Жахаба Арунга дагы мындай деди: «Мага алынып келген тартууларга сен көзөмөл кыласың.+ Ысрайыл эли алып келген бардык ыйык нерселердин бир бөлүгүн сага, уулдарыңа түбөлүккө үлүш катары берем.+
9 Абдан ыйык деп эсептелген өрттөлчү тартуулардын ичинен булар сеники болот: эл мага алып келген тартуулардын баары, анын ичинде дан азыктарынан алынып келген тартуу,+ күнөө үчүн курмандык,+ айып үчүн курмандык.+ Булар сени менен уулдарың үчүн аябай ыйык нерсе болот.
10 Буларды ыйык жерде жешиң керек.+ Эркектердин баары жесе болот. Булар сен үчүн ыйык нерсе болушу керек.+
11 Ысрайылдыктардын чайпалта турган бардык курмандыктары,+ алар менен чогуу башка тартуулары да сеники болот.+ Аларды сага, уулдарың менен кыздарыңа түбөлүккө үлүш катары берем.+ Аларды үйүңдөгү таза кишинин баары жесе болот.+
12 Эл Жахабага алып келе турган биринчи түшүмдүн баарын:+ майдын, жаңы шараптын, эгиндин эң жакшысын сага берем.+
13 Эл Жахабага жеринде өскөн ар бир нерсенин биринчи түшүмүнөн алып келет. Алар сеники болот.+ Алардан үйүңдөгү таза кишинин баары жесе болот.
14 Ысрайылда Кудайга арналган* нерсенин баары сеники болот.+
15 Ысрайыл элинин Жахабага алып келе турган тундарынын баары:+ тун балдары да, малынын биринчи төлү да сеники болот. Бирок тун балдарды да,+ адал эмес малдын биринчи төлүн да кунун төлөп сатып алышың керек.+
16 Аларды бир айдан жогоркулардын баасына жараша кунун төлөп сатып алышың керек: ыйык жердин чен-өлчөмү менен, 5 күмүш акча*+ беришиң керек. Алардын ар биринин салмагы 11 граммга* барабар.
17 Биринчи туулган эркек музоону, козуну, улакты гана кунун төлөп сатып алба,+ алар ыйык. Алардын канынан курмандык жайына+ чачыратып, майын болсо Жахабага арналган жыты жагымдуу өрттөлчү тартуу катары өрттөшүң керек.+
18 Эти болсо сеники болот. Малдын чайпалта турган курмандык катары алынып келген төшү, оң саны сыяктуу эле ал эт сеники болот.+
19 Ысрайыл эли Жахабага алып келе турган ыйык тартуулардын баарын сага,+ сени менен бирге уул-кыздарыңа түбөлүккө үлүш катары бердим.+ Бул — Жахаба менен сенин жана тукумдарыңдын ортосунда түзүлгөн эч качан бузулбай турган келишим*».
20 Жахаба Арунга дагы мындай деди: «Ысрайыл жеринде сенин үлүшүң болбойт, алардын арасынан сага жер бөлүнүп берилбейт.+ Ысрайыл элинин арасында сенин үлүшүң мен болом, сага өзүм кам көрөм.+
21 Жолугушуу чатырындагы кызматы үчүн Лебинин урпактарына Ысрайылдагы бардык нерсенин ондон бир бөлүгүн+ үлүшкө берем.
22 Күнөөлүү болуп, өлүп калбашы үчүн ысрайылдыктар мындан ары жолугушуу чатырына жакын барбасын.
23 Жолугушуу чатырындагы кызматты лебилер аткарышат, алар элдин күнөөсү үчүн жооп беришет.+ Ысрайыл элинин арасында алардын үлүш жери болбойт. Бул — силерге, укум-тукумдарыңарга түбөлүккө берилген көрсөтмө.+
24 Ысрайыл элинин Жахабага алып келе турган ондуктарын* лебилерге үлүш катары берем. „Ысрайыл элинин арасында алардын үлүш жери болбойт“,— деп ошон үчүн айткам».+
25 Анан Жахаба Мусага мындай деди:
26 «Лебилерге мындай деп айт: „Ысрайыл элинен мен силерге үлүш катары берген ондуктарды алып,+ ондон бир бөлүгүн тартуу катары Жахабага бергиле.+
27 Тартуу катары алып келген ошол даныңар,+ шарабыңар же майыңар өз кырманыңардан, жүзүм сыккычыңардан же май сыккычыңардан алып келген тартуудай эле эсептелет.
28 Ошентип, силер да ысрайыл элинен алган ондуктардын баарынан Жахабага тартуу алып келесиңер. Жахабага таандык ал тартууларды дин кызматчы Арунга бергиле.
29 Силерге алып келишкен тартуулардын баарынан, эң жакшыларынан, ыйык нерсе катары Жахабага тартуу бересиңер“.+
30 Анан лебилерге мындай де: „Алган тартууларыңардын эң жакшысын Кудайга тартуу кылгандан кийин калганы өзүңөрдүкү болот. Алар өз кырманыңардан алынган дан, жүзүм сыккычыңардан алынган шарап же май сыккычыңардан алынган май сыяктуу эле болот.
31 Аны өзүңөр да, үй-бүлөңөр да каалаган жериңерде жесеңер болот, анткени ал — жолугушуу чатырындагы кызматыңардын акысы.+
32 Эң жакшысын тартуу кылгыла, ошондо күнөөлүү болбойсуңар. Өлүп калбашыңар үчүн ысрайыл элинин ыйык нерселерин арамдабагыла“».+
Шилтемелер
^ Б. а. Арундун тукумунан болбогон киши.
^ Сөзмө-сөз: «нерсеге».
^ Б. а. Ыйыктын ыйыгын тосуп турган көшөгө.
^ Б. а. Кудай үчүн бөлүнүп, ага биротоло берилген, кайра кунун төлөп сатып ала албай турган нерсенин баары.
^ Сөзмө-сөз: «5 шекел күмүш». 1 шекел = 11,4 грамм. Б14 тиркемесин кара.
^ Сөзмө-сөз: «20 герага». 1 гера = 0,57 грамм.
^ Сөзмө-сөз: «туз келишими».
