Сандар 20:1—29
20 Биринчи айда бүт ысрайыл жамааты Зин чөлүнө барып, Кадешке+ жайгашты. Ошол жерде Мириям+ көз жумуп, ошол жерге коюлду.
2 Ичкенге суу жок болгондуктан,+ бүт жамаат Муса менен Арунга каршы чыгыш үчүн чогулду.
3 Алар Мусаны урушуп:+ «Жахаба бир туугандарыбызды өлтүргөндө эле өлүп калсак эмне!
4 Жахабанын элин бул чөлгө эмнеге алып келдиңер? Эми өзүбүз да, малыбыз да өлөбүз.+
5 Эмнеге бизди Мисирден алып чыгып, куураган ушул жерге алып келдиңер?+ Бул жерде эч нерсе өспөйт экен, эгин да, анжир да, жүзүм да, анар да, атүгүл суу да жок экен»,— дешти.+
6 Муса менен Арун чогулган элдин жанынан кетип, жолугушуу чатырынын кире беришине барып, жүзтөмөндөп жыгылышты. Ошондо аларга Жахабанын даңкы көрүндү.+
7 Анан Жахаба Мусага:
8 «Таягыңды алып, агаң Арун экөөң бүт жамаатты чогулткула да, алардын көзүнчө аскага буйрук бергиле, ошондо андан суу чыгат. Ошентип, жамааттын да, малдын да суусунун кандыргыла»,— деди.+
9 Жахаба буйрук кылгандай, Муса анын алдынан таягын алды да,+
10 Арун экөө жамаатты асканын жанына чогултушту. Анан Муса элге: «Козголоңчулар, уккула! Эмне, ушул аскадан силерге суу чыгарып берелиби?» — деди.+
11 Андан соң колун көтөрүп, таягы менен асканы эки жолу чапты эле, суу атырылып чыкты. Ошондо жамаат да, мал да суу иче баштады.+
12 Кийинчерээк Жахаба Муса менен Арунга: «Мага ишенериңерди көрсөтпөгөнүңөр үчүн жана ысрайыл элинин алдында мени даңктабаганыңар* үчүн, бул элди мен аларга бере турган жерге силер алып барбайсыңар»,— деди.+
13 Бул — Мерибадагы* суу,+ ошол жерде ысрайыл эли наалып, Жахабага каршы чыккандыктан, ал аларга өзүнүн ыйык экенин көрсөткөн.
14 Анан Муса Кадештен Эдомдун падышасына мындай деп айттырганы кабарчыларды жиберди:+ «Боордошуң, ысрайыл эли,+ мындай дейт: „Сен башыбызга түшкөн кыйынчылыктардын баарын билесиң.
15 Ата-бабаларыбыз Мисир жерине барышкан эле.+ Биз ал жерде көп жыл жашадык.+ Бирок мисирликтер ата-бабаларыбызга да, бизге да жаман мамиле кылышты.+
16 Акыры Жахабага жалбарганыбызда,+ ал үнүбүздү угуп, периштесин жиберип,+ бизди Мисирден алып чыкты. Азыр биз сенин аймагыңа чектеш жайгашкан Кадеш шаарында турабыз.
17 Жериң аркылуу өтүп кетишибизге уруксат эт. Талааларың менен жүзүмзарларыңды аралабайбыз, кудуктарыңдан суу ичпейбиз. Жериңден өтүп кеткиче чоң жолдон* оңго да, солго да бурулбайбыз“».+
18 Бирок Эдомдун падышасы: «Менин жерим аркылуу өтпөйсүңөр, болбосо силерге каршы кылыч көтөрүп чыгам»,— деди.
19 Ысрайыл эли ага: «Биз чоң жол менен эле өтөбүз. Эгер өзүбүз же малыбыз сууңдан ичсек, төлөп беребиз.+ Бизге эч нерсенин кереги жок, өтүп кетсек эле болду»,— деди.+
20 Бирок Эдомдун падышасы: «Өтпөйсүңөр»,— деп койду.+ Анан аларга каршы көп эли, күчтүү аскери менен чыкты.
21 Ошентип, Эдомдун падышасы ысрайыл элин өзүнүн жеринен өткөзбөй койду. Ошондуктан ысрайыл эли ал жактан кетип калды.+
22 Бүт ысрайыл жамааты Кадештен чыгып, Ор тоосуна+ барды.
23 Эдомго чектеш жайгашкан Ор тоосунда Жахаба Муса менен Арунга:
24 «Силер Мерибада суу жөнүндөгү буйругумду аткарбай койгондуктан,+ мен ысрайыл элине бере турган жерге Арун барбайт, ал ата-бабаларындай эле көз жумат.+
25 Ошон үчүн Арун менен уулу Элазарды Ор тоосуна алып чык.
26 Анан Арундун үстүндөгү дин кызматчынын кийимин+ чечип, уулу Элазарга+ кийгиз. Арун ошол жактан көз жумат»,— деди.
27 Муса баарын Жахаба айткандай кылды. Алар бүт жамааттын көзүнчө Ор тоосуна чыгышты.
28 Анан Муса Арундун үстүндөгү кийимин чечип, уулу Элазарга кийгизди. Арун ошол тоонун башында көз жумду.+ Муса менен Элазар болсо тоодон түшүштү.
29 Ошондо бүт ысрайыл жамааты Арундун өлгөнүн билип, аны жоктоп 30 күн ыйлады.+
Шилтемелер
^ Сөзмө-сөз: «ыйыктабаганыңар».
^ Мааниси: «уруш; чыр-чатак; талаш».
^ Сөзмө-сөз: «падышанын жолунан».
