Сандар 30:1—16
30 Андан кийин Муса ысрайыл элинин уруу башчыларына+ мындай деди: «Жахаба мындай дейт:
2 эгер кайсы бир киши Жахабага бир нерсени кыларын айтып убада берсе+ же кайсы бир ишти кылбай турганын айтып ант ичсе,+ анда сөзүнө турсун,+ оозунан чыккандын бардыгын аткарсын.+
3 Эгер атасынын үйүндө жашап жаткан кыз Жахабага кайсы бир нерсени кылам деп убада берсе же кайсы бир ишти кылбай турганын айтып ант ичсе,
4 атасы анын убадасын же антын укса, бирок каршы болбосо, кыз берген убадасы менен антынын баарын аткарышы керек.
5 Ал эми атасы анын убадасын же антын уккан күнү аларды аткарганга тыюу салып койсо, кыз аларды аткарбай эле койсо болот. Атасы тыюу салгандыктан, Жахаба аны кечирет.+
6 Эгер кыз ант ичкенден кийин же ойлонбой туруп кандайдыр бир убада бергенден кийин күйөөгө чыкса,
7 күйөөсү ал жөнүндө уккан күнү каршы болбосо, анда ал берген убадасынын же антынын баарын аткарышы керек.
8 Ал эми күйөөсү ал тууралуу уккан күнү аткарганга тыюу салса, анын антын же ойлонбой туруп берген убадасын жокко чыгара алат.+ Ошон үчүн Жахаба ал аялды кечирет.
9 Эгер жесир калган же ажырашып кеткен аял ант берсе, айткандарынын баарын аткарышы керек.
10 Эгер аял күйөөсү бар болуп туруп Кудайга кайсы бир нерсени кылам деп убада берсе же кайсы бир ишти кылбай турганын айтып ант ичсе,
11 күйөөсү бул жөнүндө угуп, каршы болбосо же тыюу салбаса, аял берген убадасынын же антынын баарын аткарышы керек.
12 Ал эми күйөөсү анын берген убадасын болобу же кайсы бир ишти кылбайм деп берген антын болобу, уккан күнү аткарганга тыюу салып койсо, аял аларды аткарбай эле койсо болот.+ Күйөөсү аларды жокко чыгаргандыктан, Жахаба аны кечирет.
13 Күйөөсү аялынын убадасын же кайсы бир нерседен баш тартам деп берген антын беките да алат, жокко чыгара да алат.
14 Эгер бир нече күн өткөндөн кийин деле күйөөсү каршы болбосо, аялынын берген убадасынын же антынын баарын бекиткен болот. Алар жөнүндө уккан күнү каршы болбогондуктан аялынын бардык антын бекиткен болот.
15 Эгер ал жөнүндө уккан күндөн бир нече убакыт өткөндөн кийин аларды аткарганга тыюу салса, аялынын күнөөсү үчүн жооптуу болот.+
16 Булар — күйөөсү менен аялы, атасы менен анын үйүндө жашап жаткан кызы жөнүндө Жахабанын Мусага берген мыйзамдары».
