Сепания 2:1—15
2 Чогулгула, уят-сыйытты билбеген эл,+ чогулгула.+
2 Өкүм ишке аша электе,Күн шамал учурган топон сыяктуу өтүп кете электе,Жахаба силерге кайнаган каарын төгө электе,+Жахабанын каары төгүлө турган күн келе электе,
3 Жер бетиндеги бардык момундар*,Жахабанын адилеттүү мыйзамдарын аткаргандар,Ага кайрылгыла,+Дайыма адилдикке умтулгула, момун* болгула.
Балким, каары төгүлгөн күнү Жахаба силерди жашырып* калар.+
4 Анткени Газа шаары аңгырап бош калат,Ашкелон ээн талаага айланат.+
Азоттун* тургундарын чак түштө кууп чыгышат,Экрон түп-орду менен жок кылынат.+
5 «Деңиздин жээгинде жашагандардын, керейтиликтердин,Башына каран түн түшөт!+
Жахаба силерге каршы өкүм чыгарды.
„Оо, Канаан, пелиштиликтердин жери, сени кыйратам,Бир да тургунуң жок ээн каласың“.
6 Деңиз жээгиндеги жер болсо жайытка айланат,Ал жерде койчулар үчүн кудуктар, койлор үчүн таш короолор болот.
7 Ал жер Жүйүттүн аман калган урпактарына тиет;+Алар ошол жерде азыктанып-тоюнушат,Кечкисин Ашкелондогу үйлөрдө жатышат.
Себеби Жахаба Кудайы аларга көңүл буруп*,Туткунга кеткендерин кайрып келет».+
8 «Мен Мааптын кемсинткенин,+ Амондун тукумдарынын кордогон сөздөрүн,+Элимди шылдыңдап, алардын жерин тартып алабыз деп мактанышканын уктум.+
9 Мен, тирүү Кудай, өзүмдү оозанып ант берем,— дейт Ысрайылдын Кудайы, асман аскерлеринин Кудайы Жахаба,—
Маап жери Содомдой,+Амон болсо Амордой болот,+Ал жерлер шор баскан чуңкурларга толгон, чалкан баскан жерге айланат, түбөлүккө ээн калат.+
Элимдин аман калгандары аларды талап-тонойт,Элимдин калдыгы аларды ээлеп алат».
10 Асман аскерлеринин Кудайы Жахабанын элин шылдыңдап, кыйынсынышканы үчүн,+Текеберденгени үчүн алар ушуну көрүшөт.
11 Жахаба аларды сестентет*,Себеби ал жер үстүндөгү кудайлардын баарын жок кылат*.
Аралдарда жашаган бардык элдер,Ар бири өз жеринде ага таазим кылат*.+
12 «Эфиопиялыктар, силер да менин кылычымдан өлөсүңөр».+
13 Ал* колун түндүктү көздөй сунуп, Ашурду* жок кылат.
Нинебини ээн талаага,+ эрме чөлгө айлантат.
14 Ал жерде жаныбарлардын үйүрү, ар кандай жапайы жаныбарлар жатат.
Кулап калган мамыларынын арасында биргазан менен чүткөр* түнөйт.
Терезелерден аянычтуу үндөр* угулат.
Босоголорунда урандылар жатат,Дубалдарын каптаган тактайлары көрүнүп калат.
15 «Мен кыйынмын, мендей эч ким жок»,— деп ойлогон,Бейкапар жашаган текебер шаар ушул болчу.
Эми ал көргөн кишинин үрөйү уча турган жерге,Жапайы жаныбарлар байырлаган жерге айланды!
Жанынан өткөндөрдүн баары табалап, башын чайкайт*.+
Шилтемелер
^ Же: «мүнөзү жумшактар».
^ Же: «мүнөзү жумшак адам».
^ Же: «калкалап».
^ Ашдоддун.
^ Же: «кам көрүп».
^ Же: «сыйынат».
^ Же: «алдан тайдырат».
^ Же: «үрөйүн учурат».
^ Б. а. Кудай.
^ Ассирияны.
^ Кемирүүчүлөр түркүмүнө кирген, жонунда ийнелери бар жаныбар.
^ Сыягы, чымчыктардын үнү же шамалдын добушу.
^ Сөзмө-сөз: «ышкырып, муштумун кезейт».
