Тиметейге 1-кат 5:1—25
5 Улуу кишиге катуу айтпа.+ Аны атаңдай, жашыраактарын ага-инилериңдей,
2 улуураак аялдарды энеңдей, кыз-келиндерди эже-карындаштарыңдай көрүп, таза ниет* менен насаат айт.
3 Багар-көрөрү жок жесирлерге кам көр*.+
4 Эгер жесир аялдын балдары же неберелери бар болсо, алар адегенде өз үйүндөгүлөрүнө кам көрүшсүн,+ Кудайга болгон берилгендигин ошентип көрсөтүшсүн. Ата-энелеринин, чоң ата-чоң энелери менен таята-таенелеринин алдындагы милдетин тийиштүү түрдө аткарышсын.+ Анткени бул Кудайга жагат.+
5 Жардамга муктаж, багар-көрөрү жок жесир аял Кудайдан үмүттөнүп,+ күнү-түнү андан тиленип, жалынып-жалбарат.+
6 Ал эми кумарына* берилип жашаган жесир аял тирүү жүрсө да, өлүк.
7 Ошондуктан, эч кимиси* сөзгө калбашы үчүн, мындан ары да ушуларды* айта бер.
8 Ким жакындарына, айрыкча, өз үйүндөгүлөрүнө кам көрбөсө, ал ишенген нерселеринен баш тарткан болот. Андай адам Кудайга ишенбегендерден да жаман.+
9 Жардам ала тургандардын тизмесине жашы 60тан кем эмес, мурун күйөөсүнө ишенимдүү* болгон,
10 жакшы иштери менен белгилүү болгон+ жесирлер киргизилсин. Алар балдарын жакшы тарбиялап-өстүргөн,+ меймандос,+ боордошторунун бутун жууган*,+ кыйналгандарга жардам берген,+ өзүн ар кандай жакшы иштерге арнаган аялдардан болушу керек.
11 Жаш жесирлерди ал тизмеге киргизбе, себеби жыныстык каалоосу Машаякка кызмат кылганга тоскоол болгондо, алар турмушка чыккысы келет.
12 Ошентип, мурун берген убадасына турбаганы үчүн айыпталышат.
13 Андан сырткары, алар ар кимдин үйүн кыдырып, бекер жүргөндү адатка айландырып алышат. Анысы аз келгенсип, ушакташышат, башкалардын ишине кийлигишип,+ пайдасы жок нерселерди сүйлөшөт.
14 Ошон үчүн жаш жесирлердин турмушка чыгып,+ бала төрөп,+ үй тиричилиги менен алек болушун, душмандын бизди жамандашына себепкер болбошун каалайм.
15 Анткени кээ бирлери туура жолдон четтеп, Шайтандын жолуна түшүп кетишти.
16 Эгер Машаяктын жолун жолдогон кайсы бир аялдын жесир калган туугандары болсо, ал аларга жардам берсин. Ошондо жыйналыштагыларга оордук келбейт, алар багар-көрөрү жок башка жесирлерге жардам бере алышат.+
17 Жакшы жетекчилик кылган аксакалдарга,+ айрыкча, насаат айтып, окутуп-үйрөткөнгө бүт күчүн жумшап+ жаткандарына эки эсе урмат көрсөтүлсүн.+
18 Себеби Ыйык Жазмада: «Эгин бастырып жатканда буканын оозун таңбагыла»,— деп жазылган.+ Ошондой эле: «Жумушчу өз акысын алганга татыктуу»,— деп да жазылган.+
19 Эки же үч күбө болбосо,+ аксакалга каршы айтылган айыпка кулак салба.
20 Башкаларга эскертүү болушу үчүн, күнөө кылып жүргөндөрдү+ баарынын көзүнчө ашкереле.+
21 Кудайдын, Машаяк Исанын жана Кудай тандаган периштелердин алдында сага ушул көрсөтмөлөрдү аткарууну буйрук кылам. Аларды аткарып жатканда кимдир бирөөгө карата күн мурун терс ойдо болбо, баарына тегиз кара.+
22 Кимдир бирөөнү жоопкерчиликтүү кызматка дайындаганга* шашпа,+ башкалардын күнөөлөрүнө ортоктош болбо, адеп-ахлактуу бол.
23 Ашказаның ооругандыктан, анын үстүнө, көп сыркоолой бергендиктен суу эле иче бербей*, аз-аздан шарап да ичип тур.
24 Кээ бирөөлөрдүн күнөөлөрү баарына белгилүү болгондуктан, алар дароо эле айыпталат, ал эми айрымдардын күнөөлөрү кийинчерээк билинет.+
25 Ошо сыяктуу эле, жакшы иштер да баарына белгилүү,+ ал эми белгилүү болбогондору жашыруун бойдон калбайт.+
Шилтемелер
^ Же: «бийик адеп-ахлактуулук».
^ Сөзмө-сөз: «жесирлерди сыйла».
^ Сыягы, жыныстык каалоону билдирет.
^ Сыягы, жесирлер менен алардын жакындары жөнүндө сөз жүрүп жатат.
^ Же: «ушул көрсөтмөлөрдү».
^ Сөзмө-сөз: «бир эркектин аялы».
^ Сөзмө-сөз: «ыйыктардын бутун жууган». Байыркы убакта үйгө келген коноктун бутун жуу меймандостуктун, жакшылык кылуунун белгиси болгон.
^ Же: «үстүнө колуңду койгонго».
^ Сыягы, бул кеңеш аны ооруга чалдыктырган кир сууну ичпеши үчүн берилген.
