Тиметейге 2-кат 4:1—22
4 Кудайдын алдында, ошондой эле өзүн айкын көрсөткөндө*+ жана Падышалыктын Падышасы катары башкарганда+ тирүүлөр менен өлгөндөрдү+ соттой турган Машаяк Исанын+ алдында сага буйрук кылам:
2 Кудайдын сөзүн жарыяла;+ аны ыңгайлуу убакта да, ыңгайсыз убакта да кийинкиге калтырбай* кабарла; башкаларды оңдоп-түзө,+ эскерт, кубаттап-үндө жана ушуларды кылып жатканда окутуу чеберчилигин колдон, аябай чыдамкай бол.+
3 Анткени адамдар туура* окууну жактырбай,+ өз каалоолоруна жетеленип, өздөрү уккусу келген нерселерди айткан окутуучуларды издей турган убак келет.+
4 Алар чындыкты уккусу келбей, ойдон чыгарылган кептерге кулак төшөшөт.
5 Бирок сен бардык учурда тунук ой жүгүрт, кыйынчылыктарды көтөр,+ жакшы кабарды тарата бер, Кудайга кылган кызматыңды бардык жагынан мыкты аткар.+
6 Мен курмандык жайына куюлган суюк тартуу+ сыяктуу куюлуп жатам, өлөр* убагым+ жакындап калды.
7 Ийгиликтүү күрөштүм,+ жарыштын аягына чыктым,+ Кудайга болгон ишенимимди бек сактадым.
8 Адилет сот жүргүзгөн Мырзабыз+ мага адил адамдарга бериле турган таажы даярдап жатат.+ Аны мага сот күнүндө сыйлык катары берет,+ мага эле эмес, анын айкын көрүнө турган убагын эңсеп күтүп жаткандардын баарына берет.
9 Мага тезирээк келгенге колуңдан келишинче аракет кыл.
10 Себеби Димас+ бул дүйнөнү* сүйүп, мени таштап, Тесалоникага кетип калды. Крескес Галатияга, Тит болсо Далматияга кетти.
11 Жанымда Лука эле калды. Маркты ала кел, анткени Кудайга кылган кызматымда анын жардамы керек.
12 Тихикти+ болсо Эфеске жөнөттүм.
13 Келатканыңда Троастагы Карпостукуна калтырып кеткен чапанымды, түрмөктөрдү, айрыкча, булгаарыдан жасалган түрмөктөрдү ала кел.
14 Жез иштеткен Искендер мага көп жамандык кылды. Ошон үчүн Жахаба ага иштерине жараша тиешесин берет.+
15 Сен да андан сак бол, себеби ал биз айткан кабарга аябай каршы чыкты.
16 Бийликтегилердин алдында биринчи жолу өзүмдү коргоп сүйлөгөндө, мени колдогону эч ким келген жок, баары таштап кетти. Кудай аларды ошол үчүн жоопко тартпаса экен.
17 Бирок мен Кудайдын Сөзүндө жазылгандардын баарын жарыялап, бардык улуттагыларга жеткире алышым үчүн, Мырзабыз жанымда туруп, күч берип жатты.+ Ошентип, арстандын азуусунан куткарылдым.+
18 Мырзабыз мени бардык жамандыктан арылтып, өзүнүн асмандагы Падышалыгы үчүн сактайт.+ Ал кылымдан кылымга, түбөлүктөн түбөлүккө даңктала берсин. Оомийн*.
19 Приска менен Акилага,+ ошондой эле Онисипордун үйүндөгүлөрүнө+ менден салам айтып кой.
20 Эраст+ Корунтта калды. Ал эми Трофимди+ ооруп калгандыктан Милетте калтырдым.
21 Кышка чейин келгенге колуңдан келишинче аракет кыл.
Эйбул, Пуденс, Линос, Клаудия жана калган бир туугандарыбыздын баары сага салам айтып жатышат.
22 Жакшы рухуң үчүн Мырзабыз сени колдосун. Ал силерге ырайымын төксүн.
Шилтемелер
^ Грекче эпифанейа.
^ Же: «ынталуулук менен».
^ Же: «пайдалуу».
^ Сөзмө-сөз: «бошоно турган».
