Филемонго 1:1—25
1 Машаяк* Исага ишенгени үчүн түрмөдө отурган+ Пабылдан, ошондой эле бир тууганыбыз Тиметейден+ сүйүктүү кызматташыбыз Филемонго,
2 карындашыбыз Апияга, биз менен бирге Машаяктын жоокери болгон Архипке+ жана Филемондун үйүндө өткөрүлгөн жыйналыштагыларга:+
3 Асмандагы Атабыз Кудай менен Мырзабыз Иса Машаяк силерге ырайымын төгүп, тынчтык берсин.
4 Кудайымдан тиленгенде сен үчүн дайыма ыраазычылык билдирем.+
5 Себеби Мырзабыз Исага болгон ишенимиң жөнүндө, аны жана бардык бир туугандарыбызды* канчалык жакшы көрөрүң жөнүндө угуп жүрөм.
6 Башкалардай болуп өрчүткөн ишенимиң сага Машаяктын аркасы менен көп бата алганыбызды түшүнгөнгө жардам берсе экен деп тиленем.
7 Башкаларга болгон сүйүүң жөнүндө укканда абдан кубанып, сооронуп калдым, анткени сен, бир тууганым, бир туугандарыбыздын* көңүлүн сергиттиң.
8 Ушу себептен, Машаяктын элчиси катары сага эмне кылышың керектигин айтып, буйрук бергенге бийлигим бар болсо да,
9 ошол сүйүүңдү эске алып, мен, Пабыл, жашы өтүп калган киши катары да, азыр Машаяк Иса үчүн түрмөдө отурган киши катары да сенден өтүнүүнү туура көрдүм.
10 Түрмөдө отурганымда баламдай болуп калган+ Онесим+ тууралуу өтүнөм.
11 Мурун анын сага пайдасы тийбесе, азыр сага да, мага да пайдасы тиет.
12 Бир боорумдай болуп калган аны сага кайра жөнөтүп жатам.
13 Жакшы кабар* таратканым үчүн түрмөдө отурганымда мындан ары да мага сенин ордуңа кызмат кыла бериши үчүн, аны алып калгым келди.+
14 Бирок сенин макулдугуңсуз эч нерсе кылгым келген жок. Себеби аргасыздан эмес, өз эркиң менен жакшылык кылсаң экен дедим.+
15 Онесимдин сенден бир аз убакытка кетип калганы, балким, аны түбөлүккө кабыл алышың үчүн болгондур.
16 Эми аны кулдай эмес,+ кулдан алда канча жогору көрүп, сүйүктүү бир тууганыңдай кабыл ал.+ Эгер ал мен үчүн абдан кымбат болсо, анда сен үчүн кулуң катары да, Мырзабызга кызмат кылган бир тууганың катары да ого бетер кымбат болот.
17 Мени досум десең, Онесимди мени тосуп алгандай жылуу тосуп ал.
18 Эгер сага кандайдыр бир зыян келтирген болсо же карыз болсо, менин мойнумда болсун.
19 Мен, Пабыл, муну өз колум менен жазып жатам: баарын төлөп берем. Чынында, өзүң деле мага өмүрүң үчүн карыздар экениңди жакшы билесиң.
20 Ооба, бир тууганым, Мырзабыз үчүн өтүнүчүмдү орундатып кой; Машаяктын жолдоочусу катары көңүлүмдү сергит.
21 Буга макул болоруңа ишенип жазып жатам, анткени мен айткандан да көптү кыларыңды билем.
22 Сенден дагы бир нерсе суранайын дегем, мага жашай турган жер даярдап кой, себеби Кудайдан тиленгениңердин аркасында эркиндикке чыгып, силер менен көрүшөм деп үмүттөнөм.+
23 Машаяк Исага ишенгени үчүн мени менен камакта отурган Эпафрас+ сага салам айтып жатат.
24 Кызматташтарым Марк, Аристарх,+ Димас,+ Лукалар+ да салам айтып жатышат.
25 Жакшы рухуңар үчүн Мырзабыз Иса Машаяк силерге ырайымын төгө берсин.
Шилтемелер
^ Сөзмө-сөз: «ыйыктардын».
