Филиппиликтерге 1:1—30
1 Машаяк* Исанын кулдары Пабыл менен Тиметейден Машаяк Исанын жолун жолдогон Филипидеги+ бардык боордошторубузга*, ошондой эле аксакалдар* менен аксакалдардын жардамчыларына:+
2 Асмандагы Атабыз Кудай менен Мырзабыз Иса Машаяк силерге ырайымын төгүп, тынчтык берсин.
3 Силерди ойлогон сайын Кудайыма ыраазычылык билдирем,
4 баарыңар үчүн ар дайым Кудайга жалынам, тиленип жатканда дайыма кубанам.+
5 Себеби силер Кудайдын жакшы кабарын* угуп, кабыл алган күндөн тартып ушул убакка чейин анын таралышына салым кошуп келатасыңар.
6 Кудай силердин араңарда баштаган жакшы ишин Иса Машаяк соттой турган күнгө* чейин аягына чыгарарына толук ишенем.+
7 Баарыңар жөнүндө ушинтип ойлошума толук негиз бар, себеби силер жүрөгүмдөсүңөр. Силер мени азыр түрмөдө отурганымда да колдоп келатасыңар,+ жакшы кабар таратуу укугун мыйзам боюнча коргогонумда да колдодуңар.+ Кудай ушинтип мага да, силерге да ырайымын төгүп жатат.
8 Силерди ушунчалык сагынып жатканыма Кудай өзү күбө, баарыңарды Машаяк Иса жакшы көргөндөй жакшы көрөм.
9 Кудайдан сүйүүңөр уламдан улам өсө берсе экен деп,+ анын эрки жөнүндөгү так билимиңер артып,+ түшүнүгүңөр тереңдей берсе экен деп ар дайым тиленем.+
10 Эмне маанилүүрөөк экенин түшүнүп,+ ошонун аркасында Машаяк сот жүргүзө турган күнгө чейин ниетиңер таза болсо экен, башкалардын ишенимин солгундатып* койбосоңор экен деп тиленем.+
11 Кудай даңкталып-мактала бериши үчүн, Иса Машаяктын жардамы менен+ жакшы иштерге бай болушуңарды да сурап тиленем.
12 Бир туугандарым, мен кабылган жагдай, чынында, жакшы кабардын дагы да көбүрөөк таралышына шарт түзгөнүн билишиңерди каалайм.
13 Анткени Машаяктын жолун жолдогонум үчүн камалганымды+ императордун бардык сакчылары менен башка көптөгөн адамдар да билишти.+
14 Камалганымдын аркасында Мырзабызга кызмат кылган боордошторубуздун көбү өздөрүн ого бетер ишенимдүү сезип калышты. Алар мурдагыдан да кайраттуу болуп, Кудайдын сөзүн тайманбай айтып жатышат.
15 Кээ бирлердин Машаяк жөнүндөгү кабарды көрө албастыктан, атаандаштыктан улам айтып жатышканы чын. Бирок башкалары жакшы ниет менен айтып жатышат.
16 Алар Машаякты жакшы көргөндүктөн ал жөнүндө жарыялап жүрүшөт. Себеби менин жакшы кабарды коргогонго* дайындалганымды билишет.+
17 Ал эми тигилердин ниети таза эмес, жакшы кабарды башкаларга атаандашкандыктан айтышат, алар түрмөдө жатканымда кайгыма кайгы кошкусу келет.
18 Мунун натыйжасы кандай болуп жатат? Анткорлонуп айтып жатышабы же чын ниеттенби, кандай болбосун, Машаяк жөнүндөгү кабар жарыяланып жатат. Мен ушуга кубанам, мындан ары да кубана берем.
19 Анткени силердин жалынып тиленгениңердин аркасында+ жана Иса Машаякка берилген ыйык рухтун* жардамы менен куткарыларымды билем.+
20 Өзүмдүн эч уятка калбай турганыма түк да шектенбейм, ошого үмүттөнөм. Коркпой эркин кабар айта берериме, ошонун аркасында — аман болсом да, өлсөм да — Машаякты мурункудай эле даңктай берериме толук ишенем.+
21 Жашасам, Машаяк үчүн жашайм.+ Бирок өлүп калсам, өзүм үчүн жакшыраак болмок.+
22 Эгер мындан ары да тирүү болсом*, үзүрлүү эмгектене берем. Ошентсе да эмнени тандаарымды билбей турам*.
23 Кайсынысын тандашты билбей, эки анжы болуп турам. Бир чети, барып*, Машаяк менен бирге болгум келет.+ Бул, албетте, алда канча жакшы.+
24 Бирок тирүү жүрсөм, силерге жакшы болот.
25 Муну жакшы түшүнөм, ошондуктан ийгилик кыла беришиңер үчүн, ишенимиңер өзүңөргө кубаныч тартуулай бериши үчүн, азырынча өлбөй, араңарда болорумду билем.
26 Кайрадан силерге барсам, Машаяк Исанын шакирти катары кубанычыңар артат.
27 Эң негизгиси, Машаяк жөнүндө айткан жакшы кабарыбызга ылайык* жашагыла.+ Көрүшөбүзбү же жокпу, кандай болбосун, силер жөнүндө жакшы нерселерди уксам экен. Жакшы кабарга болгон ишеним үчүн ийиндеш туруп эмгектенип жатканыңарды, биримдикте бир ой-максатты көздөп,+ бекем турганыңарды уксам экен.
28 Силерге каршы чыккандардан эч качан коркпогула. Мунун баары алардын жок болорун,+ ал эми силердин куткарыларыңарды далилдеп турат.+ Бул далил Кудайдан.
29 Силерге Машаякка ишенүү сыймыгы эле эмес, ал үчүн азап тартуу сыймыгы да ыйгарылган.+
30 Ошон үчүн силер да меникиндей кыйынчылыктарга кабылып жатасыңар.+ Ошол кыйынчылыктар менен кантип күрөшкөнүмдү мурун көргөнсүңөр, азыр болсо алар менен дагы деле алпурушуп жатканымды угуп жатасыңар.
Шилтемелер
^ Бул сот жүргүзүлө турган жана Кудайдын убадалары аткарыла турган убакты билдирет.
^ Сыягы, бул жакшы кабар таратуу укугун мыйзам боюнча коргогонун билдирген.
^ Б. а. Кудайдын ыйык рухунун.
^ Же балким: «билбейм».
^ Сөзмө-сөз: «ушул денеде жашай берсем».
^ Же: «денеден бошотулуп».
^ Же: «жакшы кабардын жарандары катары».
