Хабакук 1:1—17
1 Мен, Хабакук* пайгамбар, аян аркылуу алган кабар. Мен мындай дедим:
2 «Оо, Жахаба*, качанкыга чейин жардам сурап кыйкыра берем? Үнүмө качан кулак саласың?+
Качанкыга чейин зордук-зомбулуктун айынан жардам сурап зар какшай берем? Качан куткарасың*?+
3 Эмнеге мага кыянат иштерди көрсөтүп жатасың?
Эмнеге башкаларды эзгендерди чыдап карап турасың?
Эмнеге талап-тоноочулук, зордук-зомбулук болуп жатат?
Эмнеге чыр-чатак, уруш-талаштар болуп жатат?
4 Ушундан улам мыйзам күчүн жоготту,Адилеттик деген жок.
Ыймансыз адам адил адамга үстөмдүк кылгандыктан,Адилеттик бурмаланып жатат».+
5 * «Элдерди карагыла, аларга байкоо салгыла!
Таң кала карап, аң-таң болгула.
Себеби силердин күндөрүңөрдө бир нерсе болот,Ал жөнүндө айтып беришсе да, ишенбейсиңер.+
6 Мен каздимдиктерди*,+Ырайымсыз, мыкаачы элди алып келем.
Алар башкалардын үйлөрүн басып алыш үчүнЖердин учу-кыйырын кыдырып, чымын-куюн болуп жүрүшөт.+
7 Алар — жүрөктүн үшүн алган, үрөй учурган эл.
Алардын өз мыйзамы, өз бийлиги* бар.+
8 Аттары кабыландан да күлүк,Өздөрү түндө жортуп жүргөн карышкырлардан да жаалдуу.+
Согушка минген аттары туяктары жерге тийип-тийбей,Тээ алыстан келишет.
Жемине шукшурулган бүркүттөй болуп учуп келишет.+
9 Алардын баары кан төккөнгө ашыгат.+
Баары чогулуп, чыгыштан соккон шамалдай алдыга багыт алышат,+Кумдай көп адамдарды туткундап кетишет.
10 Падышаларды шылдыңдап,Ак сарай кызматчыларын келекелешет.+
Чептүү жерлерди көрүп мазактап күлүшөт,+Дөбө кылып топурак үйүп, аларды басып алышат.
11 Алар шамалдай болуп алдыга жүткүнүп, бул жерди аралап чыгышат,Бирок: „Бизге күчтү кудайыбыз берип жатат”,— дешкендиктен*,+Айыптуу болушат».+
12 Оо, Жахаба, сен түбөлүк жашаган Кудай эмессиңби?+
Оо, ыйык Кудайым, сен эч качан жок болбойсуң*.+
Жахаба, аларды сот өкүмүңдү аткарыш үчүн дайындадың.
Оо, Аска-зоом,+ аларды бизди жазалаш үчүн* тандадың.+
13 Сен ушунчалык аруусуң, ошон үчүн көзүң жамандыкты карап тура албайт,Ыймансыздыкка көз жумуп коё албайсың.+
Анда эмнеге чыккынчылык кылгандарды чыдап карап турасың?+
Ыймансыз киши өзүнөн алда канча адил кишини жеп-жутуп жатса, эмнеге унчукпайсың?+
14 Эмнеге адам баласына деңиздеги балыктардай,Башчысы жок сойлоп жүрүүчүлөрдөй мамиле кылынышына жол берип жатасың?
15 Душмандар* аларды кайырмак менен тартып чыгарып жатышат,Тор салып кармап жатышат.
Баарын балык кармаган торуна чогултуп жатышат.
Ошонусуна кубанып-шаттанып жатышат.+
16 Алар ошон үчүн өздөрүнүн торуна арнап курмандык чалып,Балык кармаган торуна арнап жыпарзат түтөтүп жатышат,Себеби ошолордун аркасы менен тамактын майлуусун,Эң жакшысын жеп жатышат.
17 Эмнеге аларга кайра-кайра тор жайганга* жол берип жатасың?
Алар ушинтип элдерди аёосуз өлтүрө беришеби?+
Шилтемелер
^ Сыягы, «бек кучактоо» дегенди билдирет.
^ Же: «кийлигишесиң».
^ Сыягы, төмөнкү сөздөрдү Кудай айткан.
^ Же: «кадыр-баркы».
^ Же балким: «алардын күчү кудайы болгондуктан».
^ Же балким: «биз өлбөйбүз».
^ Же: «ашкерелеш үчүн».
^ Б. а. каздимдиктер.
^ Же балким: «кылычын кынынан сууруганга».
