Чыгуу 12:1—51
12 Жахаба Мисир жеринде Муса менен Арунга мындай деди:
2 «Ушундан тартып бул ай силер үчүн жылдын биринчи айы болсун.+
3 Ысрайыл жамаатына мындай дегиле: „Ушул айдын онунчу күнү ар ким өз үй-бүлөсү үчүн бирден козу,+ ар бир түтүн бирден козу камдасын.
4 Эгер үй-бүлө чакан болуп, бир козуну жеп түгөтө албай турган болсо, анда кошунасы менен бир үйдө чогуу жешсин. Бир козуну жей турган кишинин саны ким канча жей алганына жараша болсун.
5 Ал кемтиги жок+ бир жашар эркек мал болушу керек. Аны жаш кочкорлордун же жаш текелердин арасынан тандасаңар болот.
6 Аны ушул айдын он төртүнчү күнүнө чейин багып тургула.+ Анан Ысрайыл жамаатындагы ар бир үй-бүлө ал малды ошол күнү күүгүмдө* сойсун.+
7 Анын канынан алып, эт жей турган үйдүн эшигинин баш босогосуна, эки кашегине чачыратышсын.+
8 Этин ошол түнү жеп түгөтүш керек.+ Аны отко кактап бышырып, калама,+ ачуу чөптөр менен жеш керек.+
9 Этти чийки жебегиле, сууга да бышырып жебегиле, баш-шыйрагы, ичеги-карыны менен кошо отко кактап жегиле.
10 Эртең мененкиге чейин эч нерсе калтырбагыла, эгер калып калса, өрттөп салгыла.+
11 Аны жолго чыкканга даяр болуп, белиңерди бууп, бутуңарга сандал кийип, колуңарга таяк алып, шаша-буша жегиле. Бул — Жахабага арналган Куткарылуу майрамы*.
12 Ошол түнү мен Мисирди аралап өтүп, мисирликтердин тун уулдарын өлтүрөм, малынын биринчи төлүн кырам,+ Мисирдин бардык кудайларына чыгарган өкүмүмдү ишке ашырам.+ Мен Жахабамын.
13 Эшиктин кашектериндеги кан силер отурган үйлөргө коюлган белги болот: аны көрүп, кыя өтүп кетем. Мисирди жазалаганымда силерге тийбейм.+
14 Ал күндү дайыма эскерип турушуңар керек. Аны Жахабага арналган майрам катары укумдан-тукумга белгилегиле. Бул — түбөлүккө берилген көрсөтмө.
15 Жети күн бою калама жегиле.+ Ошол жети күндүн биринчи күнүндө үйүңөрдөгү ачыткынын баарын жок кылгыла, анткени ким жети күндүн ичинде ачыткы кошулган нерсе жесе, ал ысрайыл элинин арасынан жок кылынат.
16 Биринчи жана жетинчи күнү Кудайга сыйыныш үчүн чогулгула. Ошол күндөрү эч кандай жумуш кылбагыла,+ ичип-жей турган тамагыңарды гана жасасаңар болот.
17 Калама майрамын*+ дайыма белгилегиле, себеби дал ошол күнү көп сандаган элиңерди* Мисир жеринен алып чыгам. Ал күндү укумдан-тукумга белгилегиле, бул — түбөлүккө берилген көрсөтмө.
18 Биринчи айдын он төртүнчү күнү кеч киргенден баштап жыйырма биринчи күнү кеч киргенге чейин калама жегиле.+
19 Жети күн бою үйүңөрдө ачыткы болбошу керек, себеби ким ачыткы кошулган нерсе жесе, жат жерлик болобу же ысрайылдык болобу,+ Ысрайыл жамаатынан жок кылынат.+
20 Ачыткы кошулган эч нерсе жебегиле. Кайсы жерде жашабагыла, калама жегиле“».
21 Муса ошол замат Ысрайылдын аксакалдарын чогултуп,+ мындай деди: «Ар бириңер үй-бүлөңөр үчүн жаш мал* алып, аны Куткарылуу майрамындагы курмандык катары сойгула.
22 Анан иссоп өсүмдүгүнөн бир тутам алып, идиштеги канга малып, эшигиңердин баш босогосуна, эки кашегине чапкылап чачыраткыла. Таң атканга чейин эч кимиңер үйүңөрдөн чыкпагыла.
23 Жахаба мисирликтерди жазалаш үчүн алардын жерин аралап баратканда эшигиңердин баш босогосундагы, кашектериндеги канды көрүп, кыя өтүп кетет. Жахаба силердин үйүңөрдөгүлөрдүн эч кимисинин өлүшүнө жол бербейт.+
24 Бул майрамды белгилегиле. Бул — өзүңөр да, урпактарыңар да түбөлүккө аткарышыңар керек болгон көрсөтмө.+
25 Жахаба берем деп убада кылган жерге барганда бул майрамды белгилегиле.+
26 Эгер балдарыңар: „Бул майрамды эмнеге майрамдап калгансыңар?“ — деп сураса,+
27 силер: „Жахаба мисирликтерди жазалаганда биздин, Мисир жериндеги ысрайылдыктардын, үйүнөн кыя өтүп, үй-бүлөлөрүбүздү сактап калган. Биз бул малды союп, Кудайга арналган Куткарылуу майрамын белгилейбиз“,— деп жооп бергиле».
Ошондо эл чөк түшүп, таазим кылды.
28 Ысрайылдыктар барып, Жахаба Муса менен Арунга айткандай кылышты.+ Ал кандай айтса, так ошондой кылышты.
29 Түн ортосунда Жахаба Мисир жериндеги бардык тун балдарды:+ тактыда отурган фараондун тун баласынан тартып түрмөдө жаткан туткундун тун баласына чейин өлтүрдү, малдын биринчи төлүнүн баарын кырып таштады.+
30 Түн ичинде фараон, анын бүт кызматчылары менен башка мисирликтердин баары ойгонуп, катуу өкүрүп ыйлашты, себеби өлүк чыкпаган бир да үй болгон жок.+
31 Фараон ошол эле түнү Муса менен Арунду чакырып:+ «Тургула, силер да, башка ысрайылдыктар да элимдин арасынан чыгып кеткиле. Баргыла, өзүңөр айткандай, Жахабага сыйына бергиле.+
32 Өзүңөр айткандай, майда малыңар менен бодо малыңарды да ала кеткиле.+ Анан Кудайдан мага бата тилегиле»,— деди.
33 Мисирликтер: «Баарыбыз өлүп калып жүрбөйлү!» — деп,+ ысрайыл элин батыраак чыгып кеткенге шаштырып жатышты.+
34 Ысрайылдыктар ачытылбаган камырын идиши менен кошо кийимдерине ороп, ийиндерине салып көтөрүп жөнөштү.
35 Алар Муса айткандай кылып, мисирликтерден алтын-күмүш буюмдарын, кийим-кечек сурап алышты.+
36 Жахаба мисирликтердин жүрөгүн жибитип койгондуктан, мисирликтер аларга сураганынын баарын беришти. Ошентип, алар Мисирден көп олжо менен чыгышты.+
37 Ысрайылдыктар Раамсестен+ Сукотко+ жөө жөнөштү. Балдарды кошпогондо, эркектердин саны 600 000дей эле.+
38 Алар менен чогуу ар кайсы элден*+ чыккан көп сандаган адамдар да жөнөштү. Майда мал менен бодо мал да аябагандай көп эле.
39 Жолдон ысрайылдыктар Мисирден ала чыккан камырдан калама жасашты. Анткени аларды Мисирден кууп чыгышкандыктан, камырга ачыткы кошушкан эмес болчу. Ошондой эле шашып, жолго тамак-аш камдай албай калышкан эле.+
40 Ысрайылдыктар Мисирден чыкканда алардын бөтөн жерде жашаганына+ 430 жыл болгон.+
41 430 жыл аяктаганда, дал ошол күнү Жахабанын бүт эли Мисир жеринен чыкты.
42 Ысрайыл эли Жахаба аларды Мисир жеринен алып чыккан ошол түндү белгилеши керек. Алардын баары укумдан-тукумга ошол түнү Жахабага арналган майрам өткөрүшү керек.+
43 Жахаба Муса менен Арунга мындай деди: «Куткарылуу майрамынын жол-жобосу мындай: бөтөн жерликтердин эч кимиси ал майрамга арнап союлган курмандыкты жебеши керек.+
44 Эгер кимдир бирөөнүн сатып алган кулу болсо, аны сүннөткө отургузсун.+ Кулу ошондон кийин гана жесе болот.
45 Убактылуу жер которуп келген бөтөн жерлик менен жалданып иштеген киши да ал курмандыктан жебесин.
46 Аны үйдүн ичинен жегиле. Этти сыртка алып чыкпагыла. Бир да сөөгүн сындырбагыла.+
47 Майрамды бүт Ысрайыл жамааты белгилесин.
48 Эгер жаныңда жашаган бөтөн жерлик киши Жахабага арналган Куткарылуу майрамын белгилегиси келсе, адегенде үйүндөгү эркек аттуунун баары сүннөткө отургузулсун. Ошондон кийин гана майрамдаса болот. Анткени ал ысрайылдыктай эле болуп калат. Ал эми сүннөткө отургузулбагандардын эч кимиси курмандыктан жебеши керек.+
49 Ысрайылдыктар үчүн да, араңарда жашаган бөтөн жерликтер үчүн да бирдей мыйзам болсун».+
50 Бүт ысрайыл эли Жахаба Муса менен Арунга айткандай кылышты. Ал кандай айтса, так ошондой кылышты.
51 Ошол күнү Жахаба ысрайылдыктардын баарын Мисир жеринен алып чыкты.
Шилтемелер
^ Сөзмө-сөз: «эки кечтин ортосунда». Сыягы, күн баткандан караңгы болгонго чейинки убак.
^ Сөзмө-сөз: «аскерлериңерди».
^ Б. а. козу же улак.
^ Алардын арасында мисирликтер да болгон.
