Чыгуу 29:1—46
29 Мага дин кызматчы болуп кызмат кылышы үчүн, Арун менен уулдарын мындайча ыйыкта: 1 букачар, кемтиги жок 2 кочкор ал,+
2 ошондой эле нан, май кошулуп жасалган ортосу оюк токоч, үстүнө май сыйпалган калама жаса.+ Алар эң жакшы буудай унунан ачыткы кошулбай жасалсын.
3 Анан баарын бир себетке салып алып кел.+ Алар менен кошо букачарды, 2 кочкорду да алып кел.
4 Арун менен уулдарын жолугушуу чатырынын кире беришине+ алып келип, жуунгула деп айт*.+
5 Анан кийимдерди алып,+ Арунга узун көйнөктү, эфоддун ичинен кийилчү жеңи жок көйнөктү, эфодду кийгизип, төш жапкычты так да, эфоддун курун байлап кой.+
6 Башына чалма кийгизип, чалмага алтын тасманы* так.+
7 Аны дин кызматчы кылып дайындаш үчүн ыйык майды* алып,+ башына куй.+
8 Анан Арундун уулдарын алып келип, узун көйнөктөрдү кийгиз.+
9 Арун менен уулдарынын белин кур менен байлап, баш кийим кийгиз. Алар да, урпактары да дин кызматчы болушат. Бул — түбөлүккө кала турган мыйзам.+ Арун менен уулдарын дин кызматчылыкка ушинтип дайындашың керек.+
10 Анан букачарды жолугушуу чатырынын алдына алып кел. Арун менен уулдары анын башына колдорун коюшсун.+
11 Аны Жахабанын алдында, жолугушуу чатырынын кире беришинде сой.+
12 Анан канынан алып, манжаң менен курмандык жайынын мүйүздөрүнө сыйпа,+ калган кандын баарын курмандык жайынын түбүнө төк.+
13 Курмандык жайынан жагымдуу жыт чыгып, асманга көтөрүлүшү үчүн, бүт ич майын,+ ошондой эле боорундагы майын, эки бөйрөгүн, бөйрөк майын курмандык жайына коюп өрттө.+
14 Ал эми этин, терисин кан-жини менен кошо конуштун сыртына алып чыгып өрттө. Бул — күнөө үчүн чалына турган курмандык.
15 Анан кочкорлордун бирин алып кел. Арун менен уулдары анын башына колдорун коюшсун.+
16 Аны союп, канынан ал да, курмандык жайына тегерете чачыратып чык.+
17 Кочкордун этин бөлүп, ичеги-карынын, шыйрактарын жууп,+ баарын башы менен чогуу курмандык жайынын үстүнө кой.
18 Анан кочкорду бүт бойдон өрттө. Бул — Жахабага арналган бүтүндөй өрттөлчү, жыты жагымдуу курмандык.+ Бул — Жахабага арналган өрттөлчү тартуу.
19 Анан экинчи кочкорду алып кел. Арун менен уулдары анын башына колдорун коюшсун.+
20 Аны союп, канынан ал да, Арун менен уулдарынын оң кулагынын көнчөгүнө, оң колунун бармагы менен оң бутунун бармагына сүйкө. Анан кандан алып, курмандык жайына тегерете чачыратып чык.
21 Анан курмандык жайынын үстүндөгү кандан, ыйык майдан алып,+ Арунга, анын кийимине, ошондой эле уулдарына, алардын кийимдерине чачырат. Ошондо өзүлөрү да, кийимдери да ыйык болот.+
22 Кочкордун майын, куйрук майын, ич майын, боорундагы майын, эки бөйрөгүн, бөйрөк майын,+ оң санын ал. Себеби ал — дин кызматчылыкка дайындаш үчүн курмандыкка чалынган кочкор.+
23 Ошондой эле Жахабанын алдындагы ачыткы кошулбай жасалган нан салынган себеттен тегерек нан, май кошулган ортосу оюк токоч, калама ал.
24 Анан алардын баарын Арун менен анын уулдарынын колуна коюп, Жахабанын алдына чайпалта турган курмандык* катары алып келип, ары-бери чайпа.
25 Андан кийин алардын колунан алып, Жахаба жагымдуу жытты искеши үчүн, бүтүндөй өрттөлчү курмандык менен чогуу курмандык жайына коюп өрттө. Бул — Жахабага арналган өрттөлчү тартуу.
26 Арунду дин кызматчылыкка дайындаш үчүн курмандыкка чалынган кочкордун төшүн алып,+ Жахабанын алдында чайпалта турган курмандык катары ары-бери чайпа. Төш сенин үлүшүң болот.
27 Арунду уулдары менен дин кызматчылыкка дайындаш үчүн курмандыкка чалынган кочкордун ары-бери чайпалтылган жана ыйык үлүш катары берилген санын, чайпалта турган курмандык катары+ алынып келген төшүн ыйык нерсе катары өзүнчө бөлүп кой.
28 Булар, ысрайыл эли түбөлүккө аткарышы керек болгон көрсөтмөгө ылайык, Арун менен уулдарына таандык ыйык үлүш.+ Бул ысрайыл эли Жахабага тынчтык курмандыктарынан алып келе турган ыйык үлүш болот.+
29 Арундун көзү өткөндөн кийин, ыйык кийими+ уулдарына+ калат. Аларды майлап, дин кызматчылыкка дайындаганда ошол кийимди кийгизишет.
30 Арундун уулдарынан анын ордуна дин кызматчылыкка дайындалып, ыйык жерде кызмат кылыш үчүн жолугушуу чатырына кире турган уулу аны 7 күн кийип жүрөт.+
31 Дин кызматчылыкка дайындаш үчүн курмандыкка чалына турган кочкордун этин ыйык жерде бышыр.+
32 Арун менен уулдары ал кочкордун этин, себеттеги нанды жолугушуу чатырынын кире беришинде жешсин.+
33 Алар ыйыкталып, дин кызматчы болуп дайындалышы үчүн күнөөлөрүн жууй турган ошол нерселерден жешсин. Ал нерселер ыйык болгондуктан, жегенге укугу жок* эч ким алардан жебеши керек.+
34 Эгер курмандыкка чалынган кочкордун этинен, нандан эртең мененкиге калып калса, өрттөп ташта.+ Аларды жегенге болбойт, анткени алар ыйык.
35 Арун менен уулдары жөнүндө берген буйруктарымдын баарын аткар. Аларды дин кызматчылыкка дайындаш үчүн сага 7 күн керек болот.+
36 Күнөөдөн арылтыш үчүн, күн сайын күнөө үчүн курмандыкка бука чал. Ошондой эле курмандык жайы үчүн курмандык чалып, аны күнөөдөн арылт жана ыйык кылыш үчүн майла.+
37 Курмандык жайын күнөөдөн арылтыш үчүн сага 7 күн керек болот. Ал эң ыйык курмандык жайы болушу үчүн, аны ыйыкта.+ Курмандык жайынын жанында кызмат кылгандардын* баары ыйык болушу керек.
38 Курмандык жайында курмандыкка чалыш үчүн күн сайын бир жашар 2 кочкор алып кел.+
39 Алардын бирин эртең менен, экинчисин күүгүмдө* курмандыкка чал.+
40 Биринчи кочкорго кошуп эң жакшы ундан бир килограмм* алып кел, ал бир литр* зайтун майына аралаштырылган болсун. Ага кошуп суюк тартуу катары бир литр шарап алып кел.
41 Экинчи кочкорду күүгүмдө курмандыкка чал. Аны эртең мененкидей кылып, тартуу катары алынып келген дан азыктары, суюк тартуу менен бирге Жахабага арналган өрттөлчү, жыты жагымдуу курмандык катары чал.
42 Бул — өзүңөр да, укум-тукумуңар да Жахабанын алдында дайыма чалышыңар керек болгон бүтүндөй өрттөлчү курмандык. Аны жолугушуу чатырынын кире беришинде, мен силерге көрүнүп, силерге сүйлөй турган жерде,+ курмандыкка чалгыла.
43 Ал жерде мен ысрайыл элине көрүнүп турам, даңкымдан улам ал жер ыйыкталат.+
44 Мен жолугушуу чатырын, курмандык жайын ыйыктайм, ошондой эле мага дин кызматчы болуп кызмат кылышы үчүн Арун менен уулдарын да ыйыктайм.+
45 Ысрайыл элинин арасында жашап, алардын Кудайы болом.+
46 Ысрайыл эли алардын Кудайы экенимди, алардын арасында жашаш үчүн аларды Мисир жеринен алып чыккан Жахаба экенимди билишет.+ Мен Жахабамын, алардын Кудайымын.
Шилтемелер
^ Сөзмө-сөз: «аларды сууга жуунт».
^ Сөзмө-сөз: «арналуунун ыйык белгисин». Арундун Кудайга арналганын көрсөткөн ыйык белги.
^ Б. а. кимдир бирөөнү кызматка дайындаганда колдонулчу май.
^ Б. а. Арундун тукумунан болбогон киши.
^ Сөзмө-сөз: «Курмандык жайына тийгендердин».
^ Сөзмө-сөз: «эки кечтин ортосунда». Сыягы, күн баткандан караңгы болгонго чейинки убак.
^ Же: «эйфанын ондон бир бөлүгүн». Б14 тиркемесин кара.
^ Сөзмө-сөз: «гиндин төрттөн бир бөлүгү болгон». Б14 тиркемесин кара.
