Чыгуу 31:1—18
31 Жахаба Мусага дагы мындай деп айтты:
2 «Мен Жүйүт уруусундагы+ Хурдун небереси, Уринин уулу Безелелди+ тандап алдым.
3 Ага ыйык рухумду* берем. Ошондо анын акылмандыгы, түшүнүгү, билими тереңдеп, бардык иштин көзүн билип калат,
4 чыгармачылыгы артып, алтындан, күмүштөн, жезден буюмдарды жасаганга,
5 таш кесип,+ алкакка салганга, жыгач сомдоп, ар кандай буюмдарды жасаганга жөндөмдүү болот.+
6 Андан сырткары, Дан уруусундагы Акисамактын уулу Олиапты+ ага жардамчы кылып дайындадым. Мен сага буйруган нерселердин бардыгын жасашы үчүн, колу жөндүү чеберлердин баарына акыл берем.+
7 Алар жолугушуу чатырын,+ келишим сандыгы+ менен үстүндөгү капкагын,+ чатырга тиешелүү бардык нерселерди,
8 үстөл+ менен ага тиешелүү нерселерди, таза алтындан жасала турган чыракпая менен ага тиешелүү бардык нерселерди,+ жыпарзат түтөткүчтү,+
9 бүтүндөй өрттөлчү курмандык чалына турган курмандык жайы+ менен ага тиешелүү бардык нерселерди, чоң казан менен түпкүчүн,+
10 өзгөчө чебердик менен токулчу кийимдерди, дин кызматчы Арун кие турган ыйык кийимди жана анын уулдары дин кызматчы болуп кызмат кылганда кие турган кийимдерди,+
11 ыйык майды жана ыйык жай үчүн жыпарзат жасашат.+ Алар мен сага буйругандардын баарын жасашат».
12 Жахаба Мусага дагы мындай деди:
13 «Ысрайыл элине мындай деп айт: „Дем алыш күн жөнүндөгү мыйзамымды аткаргыла,+ себеби менин силерди ыйыктап, тандап алган Жахаба экенимди билишиңер үчүн, ошол күн мени менен силердин ортоңордо укумдан-тукумга белги болот.
14 Дем алыш күн силер үчүн ыйык болгондуктан, ал жөнүндөгү мыйзамды аткаргыла.+ Ким аны бузса, өлүм жазасына тартылат. Ал күнү иштеген адам элдин арасынан жок кылынат.+
15 Алты күн иш кылса болот, ал эми жетинчи күн — дем алыш, толугу менен эс ала турган күн.+ Ал Жахаба үчүн ыйык. Ким дем алыш күнү иш кылса, өлүм жазасына тартылсын.
16 Ысрайыл эли дем алыш күн жөнүндөгү мыйзамды укумдан-тукумга аткарсын. Ал — түбөлүккө түзүлгөн келишим.
17 Дем алыш күн мени менен ысрайыл элинин ортосундагы түбөлүктүү белги болот.+ Анткени мен, Жахаба, алты күндүн ичинде асман менен жерди жараткам. Жетинчи күнү болсо эс алып, кылган иштеримди көрүп канааттангам“».+
18 Кудай Синай тоосунда Муса менен сүйлөшүп бүткөндөн кийин ага келишим жазылган эки таш лоокту берди.+ Аларга Кудай өз колу* менен жазган болчу.+
