Чыгуу 40:1—38
40 Анан Жахаба Мусага мындай деди:
2 «Биринчи айдын биринчи күнү ыйык чатырды, тактап айтканда, жолугушуу чатырын тик.+
3 Ичине келишим сандыгын алып кирип,+ көшөгө менен тосуп кой.+
4 Анан үстөлдү+ алып кирип, үстүнө керектүү нерселердин баарын кой, ошондой эле чыракпаяны+ алып кирип, чырактарын күйгүз.+
5 Алтындан жасалган жыпарзат түтөткүчтү+ келишим сандыгынын тушуна коюп, ыйык чатырдын кире беришине көшөгө тарт.+
6 Ыйык чатырдын — жолугушуу чатырынын — алдына бүтүндөй өрттөлчү курмандык чалынчу курмандык жайын+ кой.
7 Жолугушуу чатыры менен курмандык жайынын ортосуна чоң казанды коюп, ичине суу куй.+
8 Анан тегерете короо жасап,+ анын кире беришине жабууну+ ил.
9 Ыйык майды+ алып, ыйык чатыр менен анын ичиндеги нерселердин баарын майлап,+ аны жана ага тиешелүү нерселердин баарын ыйыкта, ошондо ал ыйык болот.
10 Бүтүндөй өрттөлчү курмандык чалынчу курмандык жайы менен ага тиешелүү нерселердин баарын майлап, аны ыйыкта, ошондо ал абдан ыйык болот.+
11 Ошондой эле чоң казан менен түпкүчүн майлап, аны ыйыкта.
12 Андан кийин Арун менен уулдарын жолугушуу чатырынын кире беришине алып келип, жуунгула деп айт*.+
13 Арунга ыйык кийимди кийгизип,+ май менен майлап,+ мага арна*, ал мага дин кызматчы болуп кызмат кылат.
14 Анан уулдарын алып келип, аларга узун көйнөктөрдү кийгиз.+
15 Аларды да атасындай кылып майла.+ Алар мага дин кызматчы болуп кызмат кылышат. Майлангандыктан алар да, урпактары да түбөлүккө дин кызматчы болуп кызмат кылышат».+
16 Муса баарын Жахаба буйругандай кылды.+ Ал кандай айтса, так ошондой кылды.
17 Экинчи жылдын* биринчи айынын биринчи күнү ыйык чатыр тургузулду.+
18 Ыйык чатырды тургузуш үчүн Муса оюгу бар таканычтарды+ коюп, кашектерди орнотуп,+ шыргыйларын киргизди,+ мамыларды тургузду.
19 Анан, Жахаба ага буйрук кылгандай, ыйык чатырдын кашектерин жабуу+ менен жаап, үстүнөн дагы башка жабууларды+ жапты.
20 Андан соң ал күбөлүк катары берилген таш лоокторду+ алып, сандыкка+ салды да, сандыктын шыргыйларын+ киргизип, капкагын+ жапты.+
21 Анан, Жахаба ага буйрук кылгандай, келишим сандыгын+ ыйык чатырга алып кирип, аны көшөгө+ менен тосуп койду.
22 Анан Муса ыйык чатырдын* түндүк тарабына, көшөгөнүн сырт жагына үстөлдү+ койду да,
23 Жахаба ага буйрук кылгандай, үстөлдүн үстүнө Жахабанын алдына коюла турган нандарды койду.+
24 Ыйык чатырдын түштүктү караган тарабына, үстөлдүн тушуна чыракпаяны+ койду.
25 Анан, Жахаба ага буйругандай, Жахабанын алдында чырактарды күйгүздү.+
26 Андан соң алтындан жасалган жыпарзат түтөткүчтү+ жолугушуу чатырынын ичине алып кирип, көшөгөнүн жанына, сырт жагына койду.
27 Жахаба ага буйругандай, анын үстүндө жыпарзат+ түтөтүлүшү+ үчүн ошондой кылды.
28 Анан ыйык чатырдын кире беришине көшөгө+ илди.
29 Ыйык чатырдын кире беришинин тушуна, Жахаба ага буйрук кылгандай, бүтүндөй өрттөлчү курмандык+ менен тартуу катары алынып келген дан азыктарын өрттөш үчүн курмандык жайын+ койду.
30 Анан жолугушуу чатыры менен курмандык жайынын ортосуна чоң казанды коюп, жуунганга суу куйду.+
31 Муса, Арун жана анын уулдары андан суу алып, буту-колун жуушту.
32 Алар, Жахаба Мусага буйругандай, жолугушуу чатырына кирерде же курмандык жайына барарда жуунушчу.+
33 Акырында ыйык чатыр менен курмандык жайынын айланасына короо+ жасап, короонун кире беришине жабуу илди.+
Ошентип, Муса бардыгын жасап бүттү.
34 Ошондо ыйык чатырды булут каптап, ал Жахабанын даңкына толду.+
35 Ыйык чатырды булут каптап, ал Жахабанын даңкына толуп тургандыктан, Муса анын ичине кире алган жок.+
36 Булут ыйык чатырдан жогору көтөрүлгөндө, ысрайыл эли чатырларын жыйнап, жолун улантчу. Алар дайыма ошентчү.+
37 Булут жогору көтөрүлмөйүн, чатырларын жыйышчу эмес.+
38 Ыйык чатырдын үстүндө күндүз Жахабанын булуту, ал эми түнкүсүн от турчу. Ысрайыл эли чөл кезип жүргөн кезинде муну дайыма көрүп турчу.+
Шилтемелер
^ Сөзмө-сөз: «аларды сууга жуунт».
^ Же: «ыйыкта».
^ Тактап айтканда, Мисирден чыккандан кийинки экинчи жылдын.
^ Же: «жолугушуу чатырынын».
