Чыгуу 6:1—30
6 Ошондо Жахаба Мусага: «Эми фараонго эмне кыларымды көрөсүң.+ Ага күчүмдү көрсөтүп, элимди коё бергенге, атүгүл Мисир жеринен кууп чыкканга аргасыз кылам»,— деди.+
2 Кудай Мусага дагы мындай деди: «Мен Жахабамын.
3 Ыбрайымга, Ыскакка жана Жакыпка Кудурети Чексиз Кудай+ катары көрүнгөм, бирок Жахаба+ деген ысмымдын маанисин толук ачып берген эмесмин.+
4 Аларга өздөрү келгин болуп жашаган Канаан жерин берем деп убада кылып, келишим түзгөм.+
5 Ал келишимим эсимде,+ мен мисирликтер кул кылып алган ысрайылдыктардын зарлаган үнүн угуп жатам.
6 Ошондуктан ысрайылдыктарга мындай деп айт: „Мен Жахабамын. Силерди мисирликтердин эзүүсүнөн, кулчулугунан бошотом.+ Ал жерге оор жазаларды жиберип, силерди кудуреттүү күчүм* менен куткарып алам.+
7 Силерди өзүмө эл кылам, силердин Кудайыңар болом.+ Ошондо силерди Мисирден алып чыгып, анын эзүүсүнөн бошоткон Жахаба Кудайыңар экенимди билесиңер.
8 Силерди Ыбрайымга, Ыскакка, Жакыпка берем деп ант берген жерге алып барам да, аны силерге берем.+ Мен Жахабамын,+ муну мен айттым“».
9 Муса ушулардын баарын ысрайылдыктарга айтты, бирок алар укпай коюшту, анткени кулчулуктун айынан кыйналып, ындыны өчүп калган эле.+
10 Ошондо Жахаба Мусага:
11 «Мисирдин падышасына, фараонго, барып айт, ысрайылдыктарды коё берсин»,— деди.
12 Бирок Муса Жахабага: «Мени ысрайыл эли укпай жатса,+ фараон укмак беле? Мен жакшы сүйлөй албайм да»,— деди.+
13 Бирок ысрайылдыктарды Мисир жеринен алып чыгышы үчүн, Жахаба Муса менен Арунга ысрайылдыктар менен фараонго эмне деп айтыш керектигин дагы бир жолу айтты.
14 Ысрайылдыктардын урук башчылары булар: Ысрайылдын тун уулу Рубейиндин+ уулдары: Ханох, Палу, Кесрон, Карми.+ Булар — Рубейиндин тукумдары.
15 Шымондун уулдары: Жемуел, Жамин, Охат, Жахин, Зохар жана канаандык аялы төрөп берген Шабул.+ Булар — Шымондун тукумдары.
16 Лебинин+ уулдарынын аттары: Гершон, Каат, Мерари.+ Алардан урук-тукуму тараган. Леби 137 жыл жашаган.
17 Гершондун уулдары: Либни менен Шимей. Алардан урук-тукуму тараган.+
18 Кааттын уулдары: Амрам, Итсар, Хеброн, Узиел.+ Каат 133 жыл жашаган.
19 Мераринин уулдары: Махли менен Муши.
Бул — Лебинин уулдарынан тарагандардын санжырасы.+
20 Амрам атасынын карындаштарынан болгон Жохебетти аялдыкка алган.+ Ал ага Арун менен Мусаны төрөп берген.+ Амрам 137 жыл жашаган.
21 Итсардын уулдары: Корак,+ Непек, Зихри.
22 Узиелдин уулдары: Мишаел, Элисапан,+ Ситри.
23 Арун Аминадаптын кызы, Нахшондун+ бир тууганы Элишебаны аялдыкка алган. Ал ага Надапты, Абыйды, Элазарды, Итамарды+ төрөп берген.
24 Корактын уулдары: Асир, Элкана, Абиасап.+ Булар — Корактан тарагандар.+
25 Арундун уулу Элазар+ Путиелдин кыздарынын бирин аялдыкка алган. Ал ага Пинехасты+ төрөп берген.
Булар — Лебинин уулдарынан тараган урук башчылары.+
26 Арун менен Муса — ушулардын тукумдары. Жахаба ал экөөнө: «Ысрайыл элин Мисир жеринен топ-тобу менен* алып чыккыла»,— деп айткан.+
27 Ошол Муса менен Арун+ ысрайыл элин Мисирден алып чыгыш үчүн Мисир падышасы менен сүйлөшкөн.
28 Жахаба Мисир жеринде Муса менен сүйлөшкөн күнү
29 Жахаба ага: «Мен Жахабамын. Мен айткандардын баарын Мисир падышасына, фараонго, айт»,— деген.
30 Бирок Муса Жахабага: «Мен жакшы сүйлөй албайм да. Фараон мени укмак беле?» — деген.+
