Чыгуу 9:1—35
9 Жахаба Мусага мындай деди: «Фараонго барып, мындай деп айт: „Ысрайыл элинин* Кудайы Жахаба мындай дейт: “Элимди коё бер, алар мага сыйынышсын.+
2 Эгерде коё бербей, дагы кармай турган болсоң,
3 мен, Жахаба, талаадагы малыңды кырам.+ Жылкыларыңа, эшектериңе, төөлөрүңө, майда малың менен бодо малыңа катуу оору жиберем.+
4 Бирок мен, Жахаба, ысрайылдыктардын малын Мисирдин малынан бөлүп коём, алардын бир да малы өлбөйт”“».+
5 Анан Жахаба: «Мен, Жахаба, муну ушул жерде эртең кылам»,— деп убакытты белгиледи.
6 Эртеси күнү Жахаба өзү айткандай кылды, ошондо мисирликтердин малы кырыла баштады,+ ал эми ысрайылдыктардын бир да малы өлгөн жок.
7 Фараон билип келгенге киши жиберсе, чын эле, ысрайылдыктардын бир да малы өлбөптүр. Бирок ал ошондон кийин да тоң моюндук кылып элди коё бербей койду.+
8 Андан кийин Жахаба Муса менен Арунга: «Мештен бир кочуш толтура күл алгыла. Анан Муса аны фараондун көзүнчө абага чачсын.
9 Ал чаңга айланып, бүт Мисир жерин каптайт. Ошондо Мисирдеги адамдар менен малдын баарын ириңдүү жара басат»,— деди.
10 Алар мештен күл алып, фараондун алдына барышты. Муса күлдү абага чачканда, адамдар менен малга ириңдүү жара чыга баштады.
11 Сыйкырчылык кылган дин кызматчылар Мусанын алдына келе алышкан жок, анткени башка бардык мисирликтердей эле, алардын да денесин жара басып кеткен эле.+
12 Бирок Жахаба фараондун тоң моюн болушуна жол берип койгондуктан, Жахаба Мусага айткандай, фараон аларды укпай койду.+
13 Андан кийин Жахаба Мусага мындай деди: «Эртең менен эрте туруп, фараондун алдына бар да, ага мындай де: „Ысрайыл элинин* Кудайы Жахаба мындай дейт: “Элимди коё бер, алар мага сыйынышсын.
14 Болбосо өзүңдү да, кызматчыларыңды да, элиңди да жазалаш үчүн балээлерди жиберем. Ошондо бүт жер жүзүндө мендей эч ким жок экенин билесиң.+
15 Мен эбак эле сени да, элиңди да катуу ооруга чалдыктырып, сени жер бетинен жок кылып коё алмакмын.
16 Бирок сага күчүмдү көрсөтүш үчүн, ысмым бүт жер жүзүнө даңазаланышы үчүн, сени тирүү калтырдым.+
17 Сен болсо дагы эле элимди теңиңе албай, коё бербей жатасың.
18 Эртең ушул убакта Мисир жеринде мурун болуп көрбөгөндөй катуу мөндүр жаадырам.
19 Ошон үчүн кишилериңди жиберип, бардык малыңды, талааңда эмнең болсо, ошонун баарын калкалаш үчүн далдоо жерге киргиз. Болбосо сыртта калган адамдар менен малдын баары мөндүрдөн кырылат”“».
20 Фараондун кызматчыларынын ичинен Жахабадан корккондору кулдары менен малын шаша-буша ичкери киргизишти.
21 Ал эми Жахабанын сөзүнө маани бербегендери кулдары менен малын талаага калтырып коюшту.
22 Жахаба Мусага: «Колуңду асманды көздөй сун. Ошондо бүт Мисир жерине мөндүр жаайт.+ Андан адамдар да, жан-жаныбарлар да, талаадагы өсүмдүктөр да жабыркайт»,— деди.+
23 Муса таягын асманды көздөй сунганда, Жахаба күн күркүрөтүп, мөндүр жаадырып, жерге от* түшүрдү. Ошентип, Жахаба Мисир жерине мөндүр жаадырды.
24 Мөндүр жаап, арасынан от жаркылдап жатты. Мисирде эл отурукташкандан бери мындай катуу мөндүр эч качан болгон эмес эле.+
25 Бүт Мисир боюнча талаада эмне болсо, ошонун баары: адамдан тартып жан-жаныбарга чейин кырылып, талаадагы өсүмдүктөр менен бак-дарактардын бардыгы талкаланып калды.+
26 Ысрайылдыктар жашаган Гошен жеринде гана мөндүр жааган жок.+
27 Фараон Муса менен Арунду чакырып: «Ушул жолкусунда мен жаңылыптырмын. Жахаба адил, ал эми мен да, элим да күнөөлүүбүз.
28 Жахабадан сурангылачы, күндүн күркүрөгөнү басылып, мөндүр токтосун. Ошондо силерди коё берем, бул жерден кетесиңер»,— деди.
29 Муса ага: «Шаардан чыгарым менен Жахабадан тиленем*. Анан бүт жер Жахабага таандык экенин билишиң үчүн, күндүн күркүрөгөнү басылып, мөндүр токтойт.+
30 Бирок сенин да, кызматчыларыңдын да Жахаба Кудайдан ошондо да коркпой турганыңарды билем»,— деди.
31 Мөндүр зыгыр менен арпаны талкалап кетти, анткени арпа баш алып, зыгыр гүлдөп калган эле.
32 Ал эми буудай менен кара буудай* кечирээк себилгендиктен эчтеке болгон жок.
33 Муса фараондун жанынан кетип, шаардан чыккандан кийин Жахабадан тиленди. Ошондо күндүн күркүрөгөнү басылып, мөндүр менен жамгыр токтоду.+
34 Күндүн күркүрөгөнү токтоп, жамгыр менен мөндүрдүн басылганын көрүп, фараон кайрадан өжөрлөнүп туруп алды.+ Ошентип өзү да, кызматчылары да күнөөгө бата берди.
35 Фараондун жүрөгү жумшарган жок. Жахаба Муса аркылуу айткандай, ал ысрайыл элин коё бербей койду.+
Шилтемелер
^ Сөзмө-сөз: «Еврейлердин».
^ Сөзмө-сөз: «Еврейлердин».
^ Сыягы, катуу чагылган.
^ Сөзмө-сөз: «колдорумду Жахабаны көздөй көтөрөм».
^ Бул жердеги еврей тилиндеги сөз байыркы Мисирде айдалган төмөнкү сорттогу буудайды билдирет.
