Шемуелдин 1-китеби 16:1—23
16 Бир канча убакыттан кийин Жахаба Шемуелге: «Качанкыга чейин Шабулду ойлоп кайгыра бересиң?+ Ысрайылга падыша болбошу үчүн, мен аны четке кактым.+ Мүйүзгө май толтуруп,+ жолго чык. Сени бетлехемдик Жышайдыкына+ жиберем, анткени анын уулдарынын арасынан падыша тандадым»,— деди.+
2 Бирок Шемуел: «Ал жакка кантип барам? Шабул укса, мени өлтүрүп койбойбу»,— деди.+ Жахаба ага: «Короодогу малдын арасынан бир кунажын жетелеп барып: „Жахабага курмандык чалганы келдим“,— деп айт.
3 Анан курмандык чалганда Жышайды да чакыр. Андан ары эмне кылышты ошондо айтам. Мен сага кимди көрсөтсөм, ошону майла*»,— деди.+
4 Шемуел Жахаба айткандай кылды. Ал Бетлехемге+ барганда, аны көргөн шаардын аксакалдары коркуп кетип: «Тынччылыкпы деги?» — деп сурашты.
5 Ал: «Тынччылык эле. Жахабага курмандык чалганы келдим. Тазалангыла да*, мени менен курмандык чалганы баргыла»,— деди. Анан барып, Жышай менен анын уулдарын тазалануу расмисинен өткөрүп, аларды да курмандык чалына турган жерге чакырды.
6 Алар келгенде, Шемуел Элиапты+ карап: «Жахабанын тандаганы — ушул»,— деп ойлоду.
7 Бирок Жахаба Шемуелге: «Анын келбетине, боюнун узундугуна караба,+ мен аны тандаган жокмун. Анткени мен адам карагандай карабайм, адам көзү көргөндү гана көрөт, ал эми мен, Жахаба, жүрөктөгүнү көрөм»,— деди.+
8 Андан кийин Жышай Абынадапты+ чакырып, аны Шемуелдин алдына алып келди, бирок Шемуел: «Жахаба муну да тандаган жок»,— деди.
9 Анан Жышай Шамайды+ алып келди, бирок Шемуел: «Жахаба муну да тандаган жок»,— деди.
10 Ошентип, Жышай 7 уулун тең Шемуелдин алдына алып келди. Бирок Шемуел Жышайга: «Жахаба булардын бирин да тандаган жок»,— деди.
11 Анан Жышайдан: «Дагы башка балдарың барбы?» — деп сурады. Ал: «Дагы эң кичүү балам бар,+ кой кайтарып жүрөт»,— деди.+ Ошондо Шемуел: «Киши жиберип, аны чакырт. Ал келмейинче, тамакка отурбайбыз»,— деди.
12 Жышай киши жиберип, аны чакыртып алды. Ал кызыл жүздүү, көздөрү жайнаган, келишимдүү улан эле.+ Жахаба Шемуелге: «Ушуну майла, анткени мен ушуну тандадым»,— деди.+
13 Шемуел май куюлган мүйүздү+ алып, агаларынын көзүнчө анын башына май куйду. Ошол күндөн тартып Дөөтүгө Жахабанын ыйык руху таасир эте баштады.+ Кийинчерээк Шемуел кайра Рамага+ кетти.
14 Шабул болсо Жахабанын ыйык рухунан айрылып калды.+ Жахаба Шабулду жаман ойлор басып, кыйнашына* жол берип койду.+
15 Шабулдун кызматчылары ага: «Кудай сизди жаман ойлор кыйнашына жол берип жатат.
16 Мырзабыз, кызматчыларыңызга арфаны жакшы черткен бирөөнү таап келгенге буйрук бериңиз.+ Сизди жаман ойлор кыйнай баштаганда, ал арфа чертсин, ошондо көңүлүңүз ачылат»,— дешти.
17 Шабул кызматчыларына: «Арфа черткенди жакшы билген бирөөнү таап, мага алып келгиле»,— деп буйруду.
18 Ошондо кызматчыларынын бири: «Мен бетлехемдик Жышайдын бир уулу арфаны жакшы чертерин билем. Ал — эр жүрөк, күчтүү жигит,+ сүйлөгөнү орундуу, келбети да келишимдүү;+ Жахаба да аны колдоп турат»,— деди.+
19 Шабул Жышайга киши жиберип: «Кой кайтарып жүргөн уулуң Дөөтүнү мага жибер»,— деп айттырды.+
20 Ошондо Жышай Дөөтүнү Шабулга жөнөттү. Эшекке нан, шарап куюлган чанач, бир улак артып, Дөөтүдөн берип жиберди.
21 Ошентип, Дөөтү Шабулга барып, кызмат кыла баштады.+ Шабул аны аябай жакшы көрүп калгандыктан өзүнүн курал көтөрүүчүсү кылып алды.
22 Ал Жышайга: «Дөөтү меникинде калып, мага кызмат кылсын, ал мага жагып калды»,— деп айттырып жиберди.
23 Кудай Шабулдун жаман ойлор басып кыйналышына жол бергенде, Дөөтү арфа черте баштачу. Ошондо Шабул жеңилдеп, көңүлү ачыла түшчү, жаман ойлору да кетип калчу.+
