Шемуелдин 1-китеби 17:1—58
17 Пелиштиликтер+ согушуш үчүн аскерлерин Жүйүт жериндеги Сокого+ чогултушту да, Соко менен Азектин+ ортосундагы Эфес-Дамимге+ барып жайгашышты.
2 Шабул менен ысрайылдыктар да чогулуп, Эла өрөөнүнө+ жайгашышты. Алар пелиштиликтер менен согушуш үчүн аскердик тартипте тизилишти.
3 Ошентип, пелиштиликтер бир тоонун үстүнө, ысрайылдыктар экинчи тоонун үстүнө жайгашышты; ортодо өрөөн бар эле.
4 Пелиштиликтердин кошуунунан гаттык+ Голиат+ аттуу баатыры чыкты. Анын бою үч метрдей* болчу.
5 Башында жез туулгасы, үстүндө салмагы 57 килограммдай* болгон кабырчыктуу жез сооту+ бар эле.
6 Тизе каптары да, артындагы кыска найзасы+ да жезден эле.
7 Узун найзасынын сабы болсо кездеме токугучтун баканындай чоң болчу,+ анын учундагы темиринин салмагы 7 килограммдай* эле. Голиаттын алдында анын калканын көтөргөн жоокер келатты.
8 Голиат токтоп, ысрайылдык жоокерлерге:+ «Кайсы арыңарга согушканы тизилдиңер? Мен пелиштиликтердин мыкты жоокеримин, силер болсо тек гана Шабулдун кулдарысыңар. Мени менен согуша турган кишиңерди чыгаргыла, бери түшүп келсин.
9 Эгер ал мени менен согушуп, мени өлтүрсө, анда биз силерге кул болобуз. Эгер мен аны өлтүрсөм, анда силер бизге кул болосуңар!» — деп кыйкырды.
10 Анан: «Бүгүн мен Ысрайылдын аскерлерин маскара кылам.+ Кана, кишиңерди чыгаргыла, согушалы!» — деди.
11 Пелиштилик кишинин бул сөздөрүн укканда Шабул менен ысрайылдык жоокерлердин баарынын жүрөгү түшүп, үрөйү учту.
12 Дөөтү Жүйүт жериндеги Бетлехемде+ жашаган эфраталык+ Жышайдын уулу болчу.+ Жышайдын 8 уулу бар эле.+ Шабул падышанын убагында ал киши карып калган болчу.
13 Анын улуу үч баласы Шабул менен бирге согушка кеткен.+ Тун уулунун аты Элиап,+ экинчисиники Абынадап,+ үчүнчүсүнүкү Шамай+ болчу.
14 Дөөтү эң кичүүсү эле.+ Анын ошол үч агасы Шабул менен согушка кеткен болчу.
15 Шабулга кызмат кылып жүргөндө Дөөтү атасынын койлорун кайтарыш үчүн+ Бетлехемге барып турчу.
16 Пелиштилик тиги киши 40 күн бою эртең менен да, кечинде да ысрайылдыктардын алдына чыгып жатты.
17 Күндөрдүн биринде Жышай уулу Дөөтүгө: «Бул бир кап* куурулган дан менен 10 нанды алып, тезинен кошуундагы агаларыңа алып бар.
18 Бул 10 тоголок сырды* болсо миң башыга алып бар. Анан агаларыңдын ал-жайын билип, алардан кабар алып кел»,— деди.
19 Ошол убакта анын агалары жана Шабул менен башка ысрайылдыктар пелиштиликтер+ менен согушуш үчүн Эла өрөөнүндө+ жүргөн эле.
20 Дөөтү эртең менен эрте туруп, койлорун бирөөгө табыштады да, аны-мунуларын алып, атасы Жышай айткандай, жолго чыкты. Ал кошуунга жакындаганда, ысрайылдык аскерлер ураан чакырып, согушка чыгып баратышкан эле.
21 Анан ысрайылдыктар менен пелиштиликтер маңдай-тескей тизиле башташты.
22 Ошондо Дөөтү буюмдарын жүк кайтарган күзөтчүгө калтыра салып, аскерлердин жанына чуркап барды да, агаларынан ал-жайын сурай баштады.+
23 Ал агалары менен сүйлөшүп турганда, пелиштиликтердин Голиат+ аттуу гаттык баатыры чыгып, баягысын эле айта баштады.+ Анын эмне дегенин Дөөтү да укту.
24 Ал кишини көргөндө ысрайылдыктардын баары аябай коркуп, кача башташты.+
25 Алар: «Тигини карагылачы, Ысрайылды мазактаганы келатат!+ Муну өлтүргөн кишиге падыша көп байлык тартуулап, кызын аялдыкка берет экен,+ атасынын үйүндөгүлөрүн ысрайылдыктардан талап кылынган алык-салык менен башка милдеттерден бошотот экен»,— деп жатышты.
26 Дөөтү жанында тургандардан: «Бул пелиштиликти өлтүрүп, Ысрайылды шылдыңдан арылта турган кишиге кандай сыйлык берилет экен?» — деп сурады. Анан: «Тирүү Кудайдын аскерин мазактагыдай сүннөткө отургузулбаган бул пелиштилик ким болуп калыптыр?!» — деди.+
27 Алар мурдараак айткан сөздөрүн кайра кайталап: «Муну өлтүргөн кишиге ушундай сыйлык берилет экен»,— дешти.
28 Улуу агасы Элиап+ Дөөтүнүн жанындагы кишилер менен сүйлөшүп жатканын угуп, ачуулана: «Бул жерге эмнеге келдиң? Өзү аз эле коюбуз болсо, талаада аларды кимге таштадың?+ Сенин ээнбаштыгыңды, бул жакка башка ой менен келгениңди билем. Салгылашты көргөнү келдиң да!» — деди.
29 Дөөтү ага: «Мен эмне кылдым? Жөн эле сурап жатпаймбы»,— деди.
30 Анан бурулуп, дагы бирөөдөн сурай баштады.+ Ага мурдараак айтылгандарды эле айтышты.+
31 Дөөтүнүн сөзүн уккандар аны Шабулга айтып барышты. Шабул аны чакыртты.
32 Дөөтү ага: «Тиги пелиштиликтен эч ким коркпосун. Аны менен согушканы кулуңуз өзү барат»,— деди.+
33 Бирок Шабул: «Сен аны менен согуша албайсың, сен али жашсың,+ тиги болсо жаштайынан жоокер»,— деди.
34 Дөөтү ага: «Мырзам, мен атамдын койлорун кайтарып жүргөндө, бир жолу арстан,+ дагы бир жолкусунда болсо аюу келип, коюбузду көтөрүп кеткен.
35 Ошондо экөөнүн тең артынан кууп барып, кармап, оозунан койду жулуп алгам. Мага асылганда, кекиртегинен* алып, жерге жыгып, өлтүрүп салгам.
36 Арстанды да, аюуну да өлтүргөн кулуңуз тирүү Кудайдын аскерин мазактаганы үчүн сүннөткө отургузулбаган бул пелиштиликти да өлтүрөт»,— деди.+
37 Анан: «Мени арстан менен аюудан куткарган Жахаба бул пелиштиликтин колунан да куткарат»,— деп айтты.+ Ошондо Шабул: «Анда бара бер, Жахаба сени колдосун»,— деди.
38 Шабул Дөөтүгө өзүнүн кийимин кийгизип, башына жез туулга, үстүнө соот кийгизди.
39 Дөөтү кийиминин сыртынан кылыч тагынып, ары-бери басып көрмөкчү болду, бирок көнбөгөндүктөн баса албай койду. Ал Шабулга: «Мен буларды кийип баса албайм, мындайга көнгөн эмесмин»,— деди да, аларды чечип салды.
40 Анан колуна таягын алып, суусу соолуп калган өзөндөн беш жылмакай таш тандап алды да, кой кайтарганда алып жүргөн баштыгына салды. Андан соң салмоорун+ алып, тиги пелиштилик кишини көздөй жөнөдү.
41 Ал да Дөөтүгө жакындагандан жакындай берди. Алдында анын калканын көтөргөн жоокери келатты.
42 Пелиштилик киши Дөөтүнү көрүп, аны кемсинте карады, анткени Дөөтү кызыл жүздүү, келишимдүү жаш улан эле.+
43 Ал Дөөтүгө: «Мага каршы таяк менен чыккыдай, мен, эмне, ит белем?!»+ — деди да, аны өзүнүн кудайларын оозанып каргады.
44 Анан ага: «Бери кел, сени жайлап, асмандагы куштар менен талаадагы жырткычтарга жем кылайын»,— деди.
45 Дөөтү ага: «Сен мага каршы эки найза, кылыч менен келатасың,+ мен болсо сен мазактаган+ Кудайдын — Ысрайыл аскерлеринин Кудайынын, асман аскерлеринин Кудайы Жахабанын — атынан баратам.+
46 Бүгүн Жахаба сени колума салып берет.+ Сени өлтүрүп, башыңды алам. Пелиштилик аскерлердин өлүктөрүн асмандагы куштар менен талаадагы жырткычтарга жем кылам. Ошондо бүт жер жүзүндөгү адамдар ысрайыл элинин Кудайы чыныгы Кудай экенин билишет.+
47 Бул жерге чогулгандардын баары Жахабанын кылычсыз, найзасыз эле куткарарын билишет.+ Анткени бул — Жахабанын согушу,+ ал баарыңарды колубузга салып берет»,+— деди.
48 Пелиштилик тиги киши Дөөтүгө жакындап келатканда, Дөөтү аны менен беттешиш үчүн пелиштилик жоокерлерди карай катуу чуркап жөнөдү.
49 Анан баштыгынан таш алып чыгып, салмоорго салып, пелиштиликти көздөй ыргытканда, таш анын так чекесине тийип, батып кетти. Ал жерге көмкөрөсүнөн жыгылды.+
50 Ошентип, Дөөтү пелиштиликти жеңди. Колунда кылычы жок болсо да, аны салмоорго салып ыргыткан таш менен эле өлтүрүп салды.+
51 Дөөтү чуркаган бойдон пелиштиликтин жанына барып, анын кылычын+ сууруп чыгып, башын кыя чапты. Пелиштиликтер балбанынын өлгөнүн көрүп, качып жөнөштү.+
52 Ошондо ысрайылдыктар менен жүйүттөр кыйкырык-сүрөөн салып, пелиштиликтерди өрөөндөн+ тартып Экрондун+ дарбазасына чейин кууп барышты. Шаарайымдан+ тартып Гат менен Экронго чейин жол бою алардын өлүктөрү жатты.
53 Пелиштиликтерди кууп барып, кайра кайтып келишкенден кийин ысрайылдыктар алардын конушун талап-тоношту.
54 Дөөтү пелиштиликтин башын Иерусалимге алып барды, ал эми курал-жарактарын өзүнүн чатырына коюп койду.+
55 Дөөтү пелиштиликке каршы чыгып баратканда, Шабул аскер башчысы Абинерден:+ «Абинер, бул кимдин баласы?»+ — деп сурады. Ал: «Билбейм, падышам»,— деди.
56 Падыша: «Анда барып, кимдин баласы экенин билип кел»,— деди.
57 Дөөтү пелиштиликти өлтүрүп кайтып келгенде, Абинер аны Шабулга ээрчитип барды. Дөөтү пелиштиликтин башын+ көтөрүп алган эле.
58 Шабул андан: «Кимдин уулусуң?» — деп сурады. Ал: «Бетлехемдик+ кулуңуз Жышайдын+ уулумун»,— деп жооп берди.
Шилтемелер
^ Сөзмө-сөз: «алты чыканак, бир карыш». Б14 тиркемесин кара.
^ Сөзмө-сөз: «5 000 шекел». Б14 тиркемесин кара.
^ Сөзмө-сөз: «600 шекел».
^ Сөзмө-сөз: «эйфа».
^ Сөзмө-сөз: «сүттүн он бөлүгүн». Сыягы, сүт азыктары.
^ Же: «тумшугунан, жаагынан». Сөзмө-сөз: «сакалынан».
