Шемуелдин 1-китеби 26:1—25
26 Бир канча убакыт өткөндөн кийин зиптиктер+ Гибага+ барып, Шабулга: «Дөөтү Жешимондун* тушундагы Гахила адырында жашынып жүрөт»,— дешти.+
2 Шабул ысрайыл элинин арасынан тандап алган 3 000 кишиси менен Дөөтүнү издегени Зиптин жанындагы чөлгө түшүп барды.+
3 Алар Жешимондун тушундагы, жолдун боюндагы Гахила адырына барып жайгашышты. Ошол убакта Дөөтү чөлдө болчу. Ал Шабулдун аны издеп чөлгө келгенин укту.
4 Анан чын эле келген-келбегенин билип келгенге тыңчыларды жиберди.
5 Андан кийин Шабулдун кошууну жайгашкан жерге барып, Шабул менен анын аскер башчысы Неирдин уулу Абинердин+ жаткан жерин көрдү. Шабул конуштун ортосунда, кишилери болсо анын тегерегинде жатыптыр.
6 Дөөтү Хеттин тукумдарынан+ болгон Акимелек менен Зеруянын уулу+ Жоаптын бир тууганы Абышайдан:+ «Мени менен Шабулдун конушуна кимиңер барасыңар?» — деп сурады. Абышай: «Мен барам»,— деди.
7 Дөөтү менен Абышай түн ичинде Шабулдун конушуна барышты. Шабул конуштун ортосунда уктап жатыптыр, баш жагында найзасы жерге сайылып туруптур. Абинер менен калган жоокерлери анын тегерегинде жатыптыр.
8 Абышай Дөөтүгө: «Кудай бүгүн душманыңды колуңа салып берди.+ Уруксат берсең, мен муну найза менен жерге кадап салайын, бир сайып эле өлтүрөм»,— деди.
9 Бирок Дөөтү: «Жок, тийбе. Жахаба өзү жол башчы кылып дайындаган кишиге+ кол көтөргөн адам күнөөлүү болбой коймок беле?» — деди.+
10 Анан: «Тирүү Кудай Жахабанын алдында айтып коёюн, муну Жахаба өзү жазалайт+ же бир күнү ажалы жетип өлөт,+ же согуштан каза табат.+
11 Жахаба өзү жол башчы кылып дайындаган кишиге кантип кол көтөрмөк элем? Жахаба анын бетин ары кылсын!+ Баш жагындагы найза менен кумараны алалы да, кетели»,— деди.
12 Ошентип, Дөөтү Шабулдун баш жагындагы найза менен кумараны алып, Абышай экөө кетип калды. Аларды эч ким көргөн да,+ байкаган да жок. Ал жерде жаткандардын эч кимиси ойгонгон жок, анткени Жахаба аларды катуу уйкуга батырып койгон болчу.
13 Дөөтү карама-каршы тарапка өтүп, тоонун чокусуна чыгып, ошол жерде турду. Алардын ортосу бир топ эле алыс болчу.
14 Дөөтү Шабулдун кишилерине, Неирдин уулу Абинерге:+ «Абинер мырзам, мени угуп жатасызбы?» — деп кыйкырды. Абинер андан: «Падышанын тынчын алып, кыйкырып жаткан бул ким?» — деп сурады.
15 Дөөтү ага: «Сиз эр жүрөк эмессизби! Ысрайылда сизге тең келген ким бар? Эмнеге мырзаңызды, падышаны, жакшылап кайтарган жоксуз? Бир жоокер барып, аны өлтүрүп коё жаздабадыбы.+
16 Мындай кылганыңыз жакшы эмес. Тирүү Кудай Жахабанын алдында айтып коёюн, мырзаңарды, Жахаба өзү дайындаган жол башчыны,+ жакшылап кайтарбаганыңар үчүн силер өлүм жазасына тартылышыңар керек! Падышанын баш жагындагы найза менен кумара кана?»+ — деп кыйкырды.
17 Шабул Дөөтүнүн үнүн таанып: «Дөөтү, уулум, бул сенсиңби?» — деди.+ Дөөтү: «Менмин, улуу урматтуу падышам»,— деп жооп берди.
18 Анан: «Эмнеге мырзам кулунун артынан кууп жүрөт?+ Мен эмне кылдым? Эмне жазыгым бар?+
19 Улуу урматтуу падышам, кулуңуздун сөзүнө кулак салыңыз. Эгер сизди мага Жахаба каршы чыгарып жатса, анда ага дан азыктарынан тартуу кылайын. Ал эми адамдар тукуруп жатса,+ анда алар Жахабанын каргышына калсын, анткени мени Жахабанын элинен*+ алыстатып, кууп жиберишти. Алар мага: „Бар, башка кудайларга кызмат кыл!“ — деп айткандай эле болушту.
20 Мырзам Жахабанын алдында канымды төкпөй эле койсо экен. Ысрайылдын падышасы бир бүргөнү издеп чыкты,+ тоодон чил кубалагандай мени кубалап жүрөт»,— деди.
21 Шабул ага: «Мен күнөө кылдым.+ Дөөтү, уулум, кайтып кел, эми сага жамандык кылбайм, анткени сен бүгүн менин өмүрүмдү баалаарыңды көрсөттүң.+ Мен акылсыздык кылып жүрүптүрмүн, катуу жаңылыптырмын»,— деди.
22 Ошондо Дөөтү: «Мына падышанын найзасы. Жигиттериңиздин бири келип, алып кетсин.
23 Жахаба ар бир кишиге адилдигине,+ ага болгон берилгендигине жараша берет. Бүгүн Жахаба сизди колума салып берди, бирок Жахаба өзү жол башчы кылып дайындаган кишиге кол көтөргүм келген жок.+
24 Бүгүн мен өмүрүңүздү баалап, сизди өлтүрбөгөнүмдөй эле, Жахаба да менин өмүрүмдү баалап, ар кандай жамандыктан сактаса экен»,— деди.+
25 Шабул ага: «Дөөтү, уулум, Кудай сага батасын берсин! Сен улуу иштерди кыласың, көп ийгиликке жетесиң»,— деди.+ Андан кийин Дөөтү өз жолу менен кетти, Шабул болсо үйүнө кайтты.+
Шилтемелер
^ Же балким: «чөлдүн, ээн талаанын».
^ Сөзмө-сөз: «мурасынан». Бул элди да, алар мурастаган жерди да билдириши мүмкүн.
