Шемуелдин 1-китеби 27:1—12
-
Пелиштилик Акиш падыша Дөөтүгө Сыклакты берет (1—12)
27 Бирок Дөөтү: «Бир күнү Шабул мени баары бир өлтүрөт, ошон үчүн пелиштиликтердин жерине качып кеткеним оң.+ Ошондо ал үмүтүн үзүп, мени Ысрайыл жеринен издебей калат.+ Ошентип андан кутулуп, аман калам»,— деп ойлоду.
2 Анан жанындагы 600 кишиси+ менен Гаттын падышасы Маохтун уулу Акишке+ барды.
3 Ошентип, Дөөтү менен анын кишилери үй-бүлөлөрү менен чогуу Акиштин жеринде, Гатта жашап калышты. Дөөтүнүн эки аялы: изреилдик Акиноам+ менен мурун Набалдын аялы болгон кармелдик Абигейил+ да аны менен ошол жерде жашап калышты.
4 Шабулга Дөөтүнүн Гатка качып кеткенин айтышканда, ал аны издебей калды.+
5 Дөөтү Акишке: «Эгер туура көрсөңүз, чакан шаарларыңыздын биринен орун бериңиз, ошол жерде жашайын. Кулуңузду падышанын шаарына жашатып эмне кыласыз?» — деди.
6 Ошол күнү Акиш ага Сыклакты+ берди. Ушул себептен Сыклак бүгүнкү күнгө чейин Жүйүт падышаларына таандык.
7 Дөөтү пелиштиликтердин жеринде 1 жыл 4 ай жашады.+
8 Ал кишилери менен Теламдан Шурга+ чейинки жана төмөн жактагы Мисир жерине чейинки жерлерде жашаган гешурлуктарга,+ герзиттиктерге, Амалыктын тукумдарына+ кол салып, жортуулдарга чыгып турду.
9 Алардын жерине чабуул жасап, эркек-аялдарын бирин калтырбай кырып,+ майда малы менен бодо малын, эшектерин, төөлөрүн, кийим-кечектерин олжолоп, кайра Акишке барчу.
10 Акиш андан: «Бүгүн кайсы жерге жортуулга бардыңар?» — деп сураганда, Дөөтү: «Жүйүт жеринин түштүгүнө*»,+— деп койчу. Кээде болсо: «Жерахмелдин тукумдары+ жашаган жердин түштүгүнө» же «кейниликтердин+ жеринин түштүгүнө»,— деп койчу.
11 Ал эркек-аялдардын бирин да тирүү калтырчу эмес. «Булар: „Дөөтү бизди минтти-тигинтти“,— деп айтып коюшпасын» — деп, аларды Гатка алып келчү эмес. (Пелиштиликтердин жеринде жашаган кезде ал ошентип жүрдү.)
12 Акиш ага ишенип: «Ал өз элине, ысрайылдыктарга, жек көрүндү болуп калды, бүттү эми өмүр бою мага кызмат кылат»,— деп ойлоп жүрдү.
Шилтемелер
^ Же: «Негепке».
