Шемуелдин 2-китеби 18:1—33
18 Дөөтү жанындагы жоокерлерин санап чыгып, миң башыларды, жүз башыларды дайындады.+
2 Анан аларды согушка жөнөтөрдө үчтөн бир бөлүгүнө Жоапты, дагы үчтөн бир бөлүгүнө Зеруянын+ уулу, Жоаптын+ агасы Абышайды,+ дагы үчтөн бир бөлүгүнө гаттык Итайды+ башчы кылып дайындады. Падыша жоокерлерине: «Мен да силер менен согушка барам»,— дегенде,
3 алар: «Жок, барбаңыз.+ Сиз биздин он миңибизге тетесиз.+ Эгер биз кача турган болсок, алар көңүл деле бурушпайт. Атүгүл жарымыбыз кырылып калсак да, анчалык деле маани беришпейт, анткени алардын издегени сизсиз. Андан көрө, бизге шаардан эле жардам берип турганыңыз жакшы»,— дешти.
4 Падыша аларга: «Мейли, силер айткандай кылайын»,— деди. Ал шаардын дарбазасынын жанында турду, жоокерлер болсо 100дөн, 1 000ден болуп чыга башташты.
5 Падыша Жоапка, Абышайга, Итайга: «Мени сыйласаңар, уулум Абышаломго тийбегиле, этият мамиле кылгыла»,— деп буйруду.+ Падышанын башчыларга Абышалом жөнүндө эмне деп буйрук бергенин жоокерлердин баары укту.
6 Ошентип, алар Абышалом тараптагы ысрайылдыктар менен беттешкени талаага барышты. Салгылаш Эпрайым токоюнда болду.+
7 Дөөтүнүн кишилери тигилерге+ катуу сокку уруп,+ ошол күнү алардын 20 000 кишисин өлтүрүштү.
8 Согуш күч алып, ошол аймактын баарына жайылды. Ошол күнү кылычтан өлгөндөргө караганда токойдон өлгөндөр көп болду.
9 Абышалом капысынан Дөөтүнүн кишилерине жолугуп калып, качып жөнөдү. Минип жүргөн качыры шактуу чоң дарактын астынан өтүп баратканда, Абышалом чачы бутактарга чырмалып калып, буту жерге тийбей асылып калды, качыры болсо качып кетти.
10 Муну бирөө көрүп калып, Жоапка:+ «Абышаломдун бир чоң даракта асылып турганын көрдүм»,— деп айтып барды.
11 Жоап ага: «Эгер көрсөң, аны эмнеге өлтүргөн жоксуң? Мен сага 10 күмүш тыйын, кур бермекмин»,— деди.
12 Бирок тиги киши: «Мага 1 000 күмүш тыйын берсеңиз да, падышанын уулуна кол көтөрмөк эмесмин. Анткени падышанын сизге, Абышайга, Итайга: „Баарыңарга айтып коёюн, уулум Абышаломго тийбегиле, этият мамиле кылгыла“,— деп буйрук бергенин баарыбыз укканбыз.+
13 Эгер буйрукка баш ийбей, аны өлтүрүп салсам, бул падышага сөзсүз жетмек, сиз болсо мени анын каарынан куткармак эмессиз»,— деди.
14 Жоап ага: «Сени менен бул жерде тургудай убактым жок!» — деди да, үч кыска найза* алып, чоң бакта асылып турган өлө элек Абышаломго барып, аны жүрөккө сайды.
15 Анан Жоаптын куралын көтөргөн 10 жоокери Абышаломдун жанына барып, аны өлтүрүп салышты.+
16 Жоап мүйүз сурнай тартты, ошондо Абышаломду колдогон ысрайылдыктарды кууп бараткан жоокерлер кайрылып келишти. Ошентип, Жоап салгылашты токтотту.
17 Абышаломду болсо токойдогу бир чоң чуңкурга таштап, үстүнө дөбө кылып таш үйүп салышты.+ Ал эми калган ысрайылдыктар үйлөрүнө качып кетишти.
18 Тирүү кезинде Абышалом: «Артымда атымды өчүрбөй сактап кала турган уулум жок» — деп,+ өзүнө Падыша өрөөнүнө+ эстелик орнотуп, аны өзүнүн аты менен атаган болчу. Ал ушу күнгө чейин Абышаломдун эстелиги деп аталат.
19 Садоктун уулу Акимаас+ Жоапка: «Уруксат этсеңиз, падышага чуркап барып, Жахабанын аны душмандарынан куткарып, адилеттик кылганын кабарлайын»,— деди.+
20 Бирок Жоап: «Бүгүн кабарды сен жеткирбейсиң, анткени бүгүн падышанын уулу өлдү.+ Сен бүгүн эмес, башка күнү кабар жеткиресиң»,— деди да,
21 куштук+ бир кишиге: «Баргын да, көргөнүңдүн баарын падышага айт»,— деди. Ал Жоапка таазим кылып, чуркап жөнөдү.
22 Садоктун уулу Акимаас Жоаптан: «Эмнеси болсо да, куштук кишинин артынан чуркап бара берейинчи»,— деп суранды. Жоап ага: «Уулум, анын артынан чуркап эмне кыласың? Эмнени кабарламак элең?» — деди.
23 Бирок ал: «Эмнеси болсо да, бара берейинчи»,— деп дагы суранды. Жоап: «Мейли, чурка!» — деди. Акимаас Иордан өрөөнүндөгү жол менен чуркап жөнөдү да, куштук кишиден ашып кетти.
24 Дөөтү ошол учурда шаардын ички дарбазасы менен сырткы дарбазасынын ортосунда отурган эле.+ Күзөтчү+ дубалга, дарбазанын чатырына чыгып, бир кишинин чуркап келатканын көрдү да,
25 падышага кыйкырып кабарлады. Падыша: «Жалгыз келатса, анда ал — кабарчы»,— деди. Тиги киши жакындай берди.
26 Күзөтчү дагы бир кишинин чуркап келатканын көрүп, дарбазачыга: «Дагы бир киши чуркап келатат!» — деди. Падыша: «Бул да кабарчы»,— деди.
27 Анан күзөтчү: «Биринчисинин чуркаганы Садоктун уулу Акимаастыкына+ окшош экен»,— деди. Падыша: «Ал — жакшы киши, ал жакшы кабар менен келатат»,— деди.
28 Акимаас падышага чуркап келип: «Баары жакшы!» — деп кыйкырды да, алдына жүзтөмөндөп жыгылып: «Улуу урматтуу падышама каршы чыккандарды багындырып берген Жахаба Кудайыңызга даңк!» — деди.+
29 Падыша андан: «Уулум Абышалом аман-эсенби?» — деп сурады. Акимаас: «Жоап падышанын кызматчысы менен мени жиберип жатканда, ал жердегилер катуу ызы-чуу түшүп жаткан, бирок эмне болгонун билбейм»,— деди.+
30 Падыша ага: «Тигиндей туруп тур»,— деди. Ал арыраак барып турду.
31 Анан куштук киши чуркап келип:+ «Улуу урматтуу падышама айтчу кабарым бар. Жахаба бүгүн сизди сизге каршы чыккандардын баарынан куткарып, адилеттик кылды»,— деди.+
32 Бирок падыша андан: «Уулум Абышалом аман-эсенби?» — деп сурады. Куштук киши: «Ал кабылган нерсеге улуу урматтуу падышамдын душмандары менен ага каршы чыгып, жамандык кылгысы келгендердин баары кабылсын!» — деди.+
33 Ошондо падыша жаман болуп кетип, дарбазанын үстү жагындагы бөлмөгө кирип, боздоп ыйлап кирди. Ал ары-бери басып: «Уулум Абышалом, уулум ай, уулум, Абышалом! Сенин ордуңа мен өлсөм кана, уулум Абышалом, уулум ай, уулум!» — деп жатты.+
Шилтемелер
^ Же балким: «жебе; найза». Сөзмө-сөз: «таяк».
