Ышая 53:1—12
53 Бизден уккан* нерсеге ким ишенди?+
Жахабанын күчү*+ кимге көрсөтүлдү?+
2 Кызматчы анын* алдына келет,Ал чырпыктай,+ какшыган жерде өскөн тамырдай болот.
Таасирдүү, даңктуу бирөөдөй көрүнбөйт;+Аны караганыбызда, көрүнүшү бизди өзүнө тартпайт*.
3 Азап менен оору деген эмне экенин билген* ал кишини эл жаман көрдү,+Эл андан оолактады.
Аны көргөндө жүзүн буруп кетишти*.
Аны жактырышкан жок, биз аны киши ордуна көргөн жокпуз.+
4 Чынында, ал биздин илдеттерибизди алып кетти,+Ооруларыбызды өзүнө алды.+
Биз болсо ага Кудай сокку уруп, аны азап тарттырып, кыйнап жатат деп ойлогонбуз.
5 Бирок ага биздин кылмыштарыбыз үчүн+ найза сайылды,+Ал биздин күнөөлөрүбүз үчүн азап чекти.+
Кудай менен тынчтыкта болушубуз үчүн жазага тартылды,+Биз анын жараат алганынын аркасында айыктык.+
6 Баарыбыз адашкан койлордой элек,+Ар кимибиз өз жолубузга түшкөн элек.
Жахаба болсо баарыбыздын күнөөбүздү ага артты.+
7 Ага ырайымсыз мамиле кылынды,+ ал азап чеккенге даяр болду,+Бирок бир да ооз ачкан жок.
Аны союла турган койдой жетелеп барышты.+
Кыркмачынын алдында үнсүз жаткан койдой болуп,Ал такыр ооз ачкан жок.+
8 Ал кысымга алынып, адилетсиз соттолуп, өлтүрүлдү*.
Анын ата-тегин* ким териштирип отурат?
Ал тирүүлөрдүн арасынан алынды;+Элимдин кылмышы үчүн өмүрү кыйылды*.+
9 Ал эч кандай жамандык* кылбаса да,Оозунан бир да жалган сөз чыкпаса да,+Ага ыймансыздардын арасынан мүрзө берилди*,+Өлгөндө байлардын* жанына коюлду.+
10 Жахаба анын азап чегишин туура көрдү, оорушуна жол берди.
Кудай, эгер анын өмүрүн айып үчүн курмандык катары берсең,+Ал өзүнүн тукумун көрөт, узак жашайт,+Ал аркылуу Жахабанын эрки* ишке ашат.+
11 Ал азап тартканынын аркасында эмнелер ишке ашканын көрүп ыраазы болот.
Башынан ушунчалык көп нерсе өткөндөн кийин*,Адил кызматчым+ көптөргө Кудайдын алдында адил болгонго жардам берет,+Алардын күнөөлөрүн көтөрөт.+
12 Ошон үчүн ага көптөрдүн арасынан үлүш берем,Ал күчтүүлөр менен олжо бөлүшөт,Себеби өз өмүрүн берди,+Кылмышкер катары эсептелди;+Көптөгөн адамдардын күнөөсүн алып кетти,+Кылмышкерлерге болушту.+
Шилтемелер
^ Сөзмө-сөз: «билеги».
^ Же балким: «Биз уккан».
^ Сыягы, бул сырттан көз салып турган байкоочуну же Кудайды билдирет.
^ Же: «көрүнүшүнөн бизди өзүнө тарткыдай эч нерсе көрбөйбүз».
^ Же: «түшүнгөн».
^ Же: «Анын жүзү бизден жашырылгандай эле болчу».
^ Сөзмө-сөз: «алынып кетти».
^ Же: «кантип жашаганын».
^ Же: «ага сокку урулду».
^ Сөзмө-сөз: «бай кишинин».
^ Же: «Ага бирөө ыймансыздардын арасынан мүрзө берет».
^ Же: «зомбулук».
^ Же: «каалоосу».
^ Сөзмө-сөз: «Билими менен».
