Ышая 6:1—13
6 Узия падыша өлгөн жылы+ мен аян алып, бийиктеги, жогору турган тактыда отурган Жахабаны көрдүм.+ Анын кийиминин этеги ибадаткананы толтуруп туруптур.
2 Анын тегерегинде сераптар* туруптур. Ар биринин алтыдан канаты бар экен: 2 канаты менен бетин жаап, 2 канаты менен бутун жаап, 2 канаты менен учат экен.
3 Алар бири-бирине: «Асман аскерлеринин Кудайы Жахаба ыйык, ыйык, ыйык!+
Бүт жер жүзү анын даңкына толгон»,— деп жатышты.
4 Алардын катуу чыккан үнүнөн эшиктин кашектери* титиреди, ибадаткананын ичи түтүнгө толду.+
5 Ошондо мен: «Өлдүм, башыма каран түн түштү!
Анткени мен оозунан чыккан сөзү таза эмес күнөөкөр пендемин,Оозунан чыккан сөздөрү таза эмес элдин арасында жашайм.+
Анын үстүнө, Падышаны, асман аскерлеринин Кудайы Жахабанын өзүн, көрдүм!» — дедим.
6 Ошондо мага сераптардын бири учуп келди. Анын колунда курмандык жайынан+ кычкач менен алган кыпкызыл чок+ бар экен.
7 Ал чокту оозума тийгизип:
«Мына, бул сенин оозуңа тийди,Эми айыбыңан арылдың,Күнөөң кечирилди»,— деди.
8 Анан Жахабанын: «Кимди жиберсем? Биз үчүн ким барат?» — деген үнүн уктум.+ Ошондо мен: «Мен барам! Мени жибер!» — дедим.+
9 Ал мага мындай деди: «Баргын да, бул элге:
„Силер кайра-кайра угасыңар,Бирок түшүнбөйсүңөр,Кайра-кайра көрөсүңөр,Бирок эч нерсе үйрөнбөйсүңөр“,— де.+
10 Бул элдин жүрөгүн таштай катуу кыл,+Кулагын дүлөй,+Көздөрүн көр кылып кой.
Алардын көздөрү көрбөсүн,Кулактары укпасын,Жүрөктөрүнө жетпесин,Мага кайрылып келишпесин, айыгышпасын».
11 Ошондо мен: «Оо, Жахаба, качанкыга чейин?» — деп сурадым.
Ал мага: «Шаарлар урандыга айланып, элсиз калганга чейин,Үйлөрдө киши калбай калганга чейин,Бул жер кыйратылып, ээн калганга чейин,+
12 Жахаба элди алыска айдап жибергенге чейин,+Дээрлик бүтүндөй жер ээн калганга чейин.
13 Ошентсе да ал жакта анча-мынча эл* калат, бирок бакыйган чоң даракты, эменди от жалмагандай эле, ал элди да от жалмайт. Ал дарактарды кыйганда дүмүрү калгандай, анын да дүмүрү калат. Ошол дүмүр ыйык тукум болот»,— деди.
Шилтемелер
^ Абдан жогорку абалды ээлеген периштелер.
^ Сөзмө-сөз: «топсолору».
^ Сөзмө-сөз: «ондон бир бөлүк».
