Эзра 4:1—24
4 Жүйүт уруусу менен Бенжемин уруусунун душмандары+ туткундан кайтып келгендердин+ Ысрайылдын Кудайы Жахабага арнап ибадаткана куруп жатканын угушту.
2 Алар дароо Зоробабылга жана урук башчыларына келип: «Биз да силер менен кошо куралы. Анткени Ашурдун* падышасы Эсархадон+ бизди бул жакка көчүрүп келгенден бери,+ биз да силерге окшоп силердин Кудайыңарга сыйынып,+ курмандык чалып келатабыз»,— дешти.
3 Бирок Зоробабыл менен Жешуя жана Ысрайылдын урук башчылары: «Силер биз менен бирге Кудайыбыздын ибадатканасын курбайсыңар.+ Персиянын падышасы Кореш буйрук кылгандай, Ысрайылдын Кудайы Жахабанын ибадатканасын өзүбүз курабыз»,+— дешти.
4 Ошондо тегеректе жашаган элдер курулушту токтотуш үчүн жүйүт элинин ындынын өчүрүп, кайратын качыра башташты.+
5 Жүйүттөрдүн ой-максаты ишке ашпай калышы үчүн, душмандар Персия падышасы Корештин күндөрүнөн тартып Персия падышасы Дарийдин күндөрүнө чейин+ алардын кеңешчилерин пара берип сатып алып жатышты.+
6 Акашбероштун башкаруусунун башталышында болсо Жүйүт менен Иерусалимдин тургундарын каралап кат жазышты.
7 Ошондой эле Персиянын падышасы Артакшаштанын* күндөрүндө Бишлам, Митредат, Табел жана анын калган таламдаштары падышага кат жөнөтүштү. Ал кат арамей тилине+ которулуп, арамей ариби менен жазылган эле*.
8 * Башкы башкаруучу Рехум менен катчы Шимшай Иерусалимдин элине жалаа жаап Артакшашта падышага кат жазышты.
9 (Кат башкы башкаруучу Рехум менен катчы Шимшайдын жана алардын башка таламдаштарынын, соттордун, башкаруучунун орун басарларынын, катчылардын, Эрехтин+ тургундарынын, бабылдыктардын, Шушандын+ тургундарынын, башкача айтканда, эйламдыктардын+ жана
10 улуу урматтуу Аснапар* падыша туткундап, Самариянын шаарларына+ көчүрүп жиберген калган элдердин, Эфрат* дарыясынын аркы өйүзүндө жашагандардын баарынын атынан жазылды.)
11 Ал катта мындай деп жазылган эле:
«Артакшашта падышага дарыянын аркы өйүзүндө жашаган кызматчыларынан:
12 Сиздин жериңизден көчүп кеткен жүйүттөрдүн Иерусалимге келгени сизге маалым болсун, падыша. Алар ыймансыздыкка толгон, козголоңчул бул шаарды кайрадан куруп, дубалдарын тургузуп бүткөнү калышты,+ пайдубалын оңдоп жатышат.
13 Сизге маалым болсун, падыша, эгер бул шаар кайра курулуп, дубалдары тургузулуп бүтө турган болсо, анда алар салык+ да, алым да, бажы акысын да төлөбөй коюшат, мунун айынан падышанын казыналары бөксөрөт.
14 Бизди падыша каржылап жаткан соң*, падышанын зыян тартканын карап тура албайбыз. Ошон үчүн сизге кат жөнөтүп, бул жөнүндө билдирип жатабыз.
15 Ата-бабаларыңыздын китебинде жазылгандарды+ кылдат карап чыксаңыз, бул шаардын падышалар менен дубандарга зыян келтирген козголоңчул шаар экенин, бул жакта козголоң чыгаргандар мурдатан бери эле болуп келгенин билесиз. Бул шаардын талкаланганы да ошондон болчу.+
16 Эгер шаар калыбына келтирилип, дубалдары кайра тургузулуп бүтсө, анда падыша дарыянын аркы өйүзүндөгү аймактарына+ бийлик кыла албай калат. Падышага ушуну билдирип коёлу дедик».
17 Ошондо падыша башкы башкаруучу Рехум менен катчы Шимшайга жана алардын Самарияда жашаган таламдаштарына, ошондой эле дарыянын аркы өйүзүндө жашагандарга мындай деп жазып жиберди:
«Амансыңарбы!
18 Бизге жиберген катыңарды мага так-даана окуп беришти*.
19 Анан менин буйругум менен баары иликтенип, бул шаардын мурунтан эле падышаларга каршы чыгып келатканы, анда дайыма козголоң, көтөрүлүштөр болуп турганы аныкталды.+
20 Иерусалимде дарыянын аркы өйүзүндөгү жерлердин баарын башкарган күчтүү падышалар болгон экен жана аларга салык, алым, бажы акысы төлөнүп турчу экен.
21 Ошондуктан аларга буйрук бергиле, ишти токтотуп, мен буйрук кылмайынча шаарды курушпасын.
22 Падыша мындан да көп зыянга учурабашы үчүн, бул ишти жакшылап көзөмөлгө алгыла».+
23 Артакшашта падышанын жөнөткөн каты Рехумдун, катчы Шимшайдын жана алардын таламдаштарынын алдында окулгандан кийин, алар дароо Иерусалимдеги жүйүттөргө барышты да, курулушту күч колдонуп токтотуп коюшту.
24 Ошентип, чыныгы Кудайдын Иерусалимдеги ибадатканасы курулбай токтоп калды. Курулуш Персиянын падышасы Дарийдин башкаруусунун экинчи жылына чейин улантылган жок.+
Шилтемелер
^ Ассириянын.
^ Артаксеркстин. Эзра 6—8-бөлүмдөрдө айтылган Артакшашта эмес.
^ Же балким: «арамей тилинде жазылып, анан башка тилге которулган».
^ Түп нускада 4:8ден 6:18ге чейинки аяттар арамей тилинде жазылган.
^ Ашшурбанипал.
^ Евфрат.
^ Сөзмө-сөз: «Падыша сарайынын тузун жеп жаткан соң».
^ Же балким: «которуп, окуп беришти».
