Элчилер 13:1—52
13 Антиохиядагы жыйналышта пайгамбарлар менен окутуучулар бар эле.+ Алар — Шабыл, Барнаба, Нигер деген да аты бар Шымон, киреналык Лукий, дубан башчысы Ирод* менен окуу жайында чогуу билим алган Манаен.
2 Алар Жахабага кызмат кылып, орозо тутуп жүрүшкөндө, Кудай ыйык руху аркылуу: «Барнаба менен Шабылды бөлүп бергиле,+ мен аларды бир ишке тандап алдым»,+— деди.
3 Орозо тутуп, тиленгенден кийин алар экөөнүн үстүнө колдорун коюп, жөнөтүштү.
4 Кудайдын ыйык рухунун жетеги менен жиберилген Барнаба менен Шабыл Селекияга барып, андан ары Кипр аралына сүзүп кетишти.
5 Анан Саламиске барып, жүйүттөрдүн сыйынуу жайларында Кудайдын сөзүн жарыялай башташты. Жакан деп да коюшкан Марк аларга жардам берип жүрдү.+
6 Алар кабар айтып аралды Пафоско чейин аралап өтүштү. Пафостон Бариса деген бир жүйүт кишини жолуктурушту. Ал көз байлоочу жана жалган пайгамбар эле.
7 Бариса Сергий Пабыл деген аймак акимине* кызмат кылчу. Сергий түшүнүгү терең киши эле. Ал Кудайдын сөзүн аябай уккусу келип, Барнаба менен Шабылды чакыртты.
8 Бирок аким Мырзабызга ишенип калбашы үчүн, Бариса, тактап айтканда, Элима («көз байлоочу» деп которулат) аларга тоскоолдук кыла баштады.
9 Ошондо Пабыл деген да аты бар Шабыл Кудайдын ыйык рухуна толуп, аны тигиле карады да:
10 «О, ичи жалгандык менен арамдыкка толгон адам. Сен Ибилистин уулусуң,+ бардык адил нерсенин душманысың. Жахабанын окууларын эмнеге бурмалап жатасың?!
11 Мына, Жахаба сени жазалайт. Ошондуктан сокур болуп, бир нече убакка чейин күндүн жарыгын көрбөй каласың»,— деди. Ошол замат Барисанын көзү тумандап, коюу караңгылык басып калгандай болуп эч нерсе көрбөй калды. Ал темселеп, колунан жетелей турган бирөөнү издей баштады.
12 Жахаба жөнүндө билгендерине абдан таң калган аймак акими муну көргөндө Мырзабызга ишенип калды.
13 Пабыл менен шериктери Пафостон чыгып, Памфилиядагы Пергеге сүзүп барышты. Бирок Жакан деп да коюшкан Марк+ аларды таштап, Иерусалимге кетип калды.+
14 Пабыл менен Барнаба болсо жолун улап, Пергеден Писидиядагы Антиохияга барышты. Ал жактан дем алыш күнү* сыйынуу жайына+ кирип отурушту.
15 Муса пайгамбардын Мыйзамы менен башка пайгамбарлардын китептеринен үзүндү окулгандан кийин,+ сыйынуу жайынын башчылары ал экөөнө: «Туугандар, отурган элге дем-күч бере турган сөзүңөр болсо, айткыла»,— дешти.
16 Ошондо Пабыл туруп, колу менен белги берди да, мындай деди:
«Ысрайылдыктар жана Кудайдан корккон башка адамдар, сөзүмө кулак салгыла.
17 Ысрайыл элинин Кудайы ата-бабаларыбызды тандап алган. Мисирде келгин болуп жашап жүрүшкөндө, аларга жардам берип, ал жерден кудуреттүү күчү менен алып чыккан.+
18 Андан кийин чөлдө аларга 40 жылдай чыдаган.+
19 Анан Канаандагы 7 элди кырып жок кылып, жерин аларга берген.+
20 Бул окуялардын баары 450 жылдай убакыт ичинде болуп өткөн.
Андан кийин Кудай аларга Шемуел пайгамбардын убагына чейин бийлерди дайындап келген.+
21 Кийин эл өздөрүнө падыша сураганда,+ Кудай Бенжемин уруусунан чыккан Киштин уулу Шабулду падыша кылып берген.+ Ал 40 жыл бийлик жүргүзгөн.
22 Аны тактыдан түшүргөндөн кийин Дөөтүнү падыша кылган.+ Кудай ал жөнүндө: „Мен жүрөгүмө жаккан адамды,+ каалаганымдын баарын аткара турган Жышай уулу Дөөтүнү,+ тандадым“,— деген.
23 Анан анын берген убадасына ылайык, Дөөтүнүн тукумунан ысрайыл элин куткара турган куткаруучу Иса чыккан.+
24 Исанын келерине аз калганда, Жакан бүт ысрайыл элине өкүнүп, чөмүлүшү керектигин жар салган.+
25 Кызматы аяктап бараткан кезде болсо: „Мени ким деп эсептейсиңер? Мен силер ойлогон киши эмесмин. Менин артымдан бирөө келатат. Мен анын бутундагы сандалынын боосун чечкенге да татыксызмын“,— деген.+
26 Агайын-туугандар, Ыбрайымдын урпактары жана Кудайдан корккон башка адамдар, Кудай бизге ушул куткаруучу жөнүндөгү кабарды жиберген.+
27 Бирок Иерусалимдин тургундары менен диний жетекчилер* ошол куткаруучуну кабыл албай, аны соттоп өкүм чыгарышкан. Ошентип, пайгамбарлардын дем алыш күн сайын эл алдында окулган сөздөрүн аткарышкан.+
28 Алар өлүм жазасына тартканга эч себеп табышпаса да,+ Пилаттан аны өлүмгө кыйышын талап кылышкан.+
29 Ал жөнүндө жазылгандардын баарын аткарышкандан кийин аны устундан түшүрүп, мүрзөгө коюшкан.+
30 Бирок Кудай аны тирилтип алган.+
31 Тирилгенден кийин Иса өзү менен Галилеядан Иерусалимге келген шакирттерине көп күн бою көрүнүп жүргөн. Алар азыр ал жөнүндө элге күбөлөндүрүп жатышат.+
32 Биз да силерге ата-бабаларыбызга берилген убада жөнүндөгү жакшы кабарды жарыялап жатабыз.
33 Кудай Исаны тирилтип, ошол убадасын алардын балдары үчүн, биз үчүн, толук аткарды.+ Бул тууралуу 2-забурда: „Сен менин уулумсуң, мен бүгүн сага ата болдум“,— деп жазылган.+
34 Кудай Исаны тирилтери жана анын денеси эч качан чирибей турганы жөнүндө болсо: „Дөөтүгө убада кылганымдай, силерди туруктуу сүйүүмө* бөлөйм. Ал убадам сөзсүз аткарылат*“,— деп алдын ала айткан.+
35 Дагы бир забурда: „Сен берилген кызматчыңдын чиришине жол бербейсиң“,— делет.+
36 Дөөтү өмүр бою Кудайга кызмат кылган. Анан көз жумуп, ата-бабаларынын жанына коюлуп, денеси чириген.+
37 Ал эми Кудай тирилткен Исанын денеси чириген эмес.+
38 Ошондуктан, агайын-туугандар, баарыңарга маалым болсун: силерге күнөөлөрүңөр ал аркылуу кечирилери жарыяланып жатат.+
39 Силер Мусанын Мыйзамы аркылуу адил боло албайсыңар.+ Ал эми Исага ишенген ар бир адамды Кудай анын өлүмү аркылуу адил деп жарыялайт.+
40 Ошон үчүн сак болгула, пайгамбарлардын китебинде жазылгандай болуп калып жүрбөгүлө.
41 Ал китепте: „Мен кылып жаткан ишти жек көргөндөр, силер аны карап, таң каласыңар. Анан жок болосуңар. Анткени силердин күндөрүңөрдө кылып жаткан ошол ишим жөнүндө кимдир бирөө майда-чүйдөсүнө чейин айтып берсе да, такыр ишенбейсиңер“,— делген».+
42 Пабыл менен Барнаба сыртка чыгып баратканда, эл алардан бул тууралуу кийинки дем алыш күнү да айтып беришин өтүнүштү.
43 Сыйынуу жайына чогулгандар тарагандан кийин, көптөгөн жүйүттөр менен алардын динин кабыл алгандар Пабыл менен Барнабанын артынан жөнөштү. Экөө алар менен сүйлөшүп, Кудайдын ырайымынан айрылбаганга үндөштү.+
44 Кийинки дем алыш күнү дээрлик бүт шаар Жахабанын сөзүн укканы чогулду.
45 Көп эл чогулганын көргөндө жүйүттөр көрө албастык кылып, Пабылга каршы чыгып, мазактай башташты.+
46 Ошондо Пабыл менен Барнаба тайманбастан: «Кудайдын сөзү биринчи кезекте силерге айтылышы керек болчу.+ Бирок силер аны четке кагып, түбөлүк өмүргө татыктуу эмес экениңерди көрсөттүңөр. Ошондуктан жакшы кабарды башка улуттагыларга айтабыз.+
47 Анткени Жахаба: „Куткарылуу жөнүндөгү кабарды жердин учу-кыйырына чейин таратышың үчүн, сени элдерге жарык кылып койдум“,+— деп айтып, бизге осуят берген»,— дешти.
48 Муну укканда башка улуттагылар Жахабанын сөзү кандай гана кереметтүү деп кубана башташты. Ошентип, түбөлүк өмүргө карата туура көз карашта болгондордун баары Исанын жолдоочусу болушту.
49 Жахабанын сөзү болсо ал аймактын туш тарабына тарап жатты.
50 Бирок жүйүттөр көрүнүктүү динчил аялдарды, шаардагы таасири күчтүү кишилерди Пабыл менен Барнабаны куугунтуктаганга тукурушту.+ Алар болсо экөөнү өздөрүнүн жеринен кууп чыгышты.
51 Пабыл менен Барнаба буттарындагы чаңды күбүп*, Иконияга кетишти.+
52 Шакирттер болсо кубанып,+ Кудайдын ыйык рухуна толо беришти.
Шилтемелер
^ Улуу Ироддун уулу Ирод Антипа.
^ Сөзмө-сөз: «башчылар».
^ Же: «ишеничтүү».
^ Бутка жуккан чаңды күбүп салуу жоопкерчиликтен бошонууну билдирген.
