Элчилер 17:1—34
17 Алар Амфипол менен Аполония аркылуу өтүп, Тесалоникага барышты.+ Ал шаарда жүйүттөрдүн сыйынуу жайы бар эле.
2 Пабыл адатынча ал жакка барып,+ ал жердегилер менен үч дем алыш катары менен Ыйык Жазманын негизинде талкуу жүргүзүп жүрдү.+
3 Ал Машаяктын азап чегиши+ жана өлүп, кайра тирилиши+ керек болгонун түшүндүрүп, Ыйык Жазмадан далилдерди келтирип: «Мен силерге жарыялап жаткан Иса — ошол Машаяктын өзү»,— деп айтып жүрдү.
4 Натыйжада алардын айрымдары, ошондой эле Кудайга сыйынган көптөгөн гректер менен таасирдүү аялдар Исанын жолдоочусу болуп, Пабыл менен Сыласка кошулушту.+
5 Бирок жүйүттөр көрө албастык кылып,+ базар аянтындагы бекерпоздордун арасынан айрым кара ниет кишилерди чогултушту. Алар сүрмө топ болуп алып шаарга тополоң салышты. Анан Пабыл менен Сыласты сүрмө топтун алдына алып чыгыш үчүн Жасондун үйүнө кирип барышты.
6 Бирок аларды таппай коюшкандыктан Жасон менен айрым шакирттерди шаар башкаруучуларына сүйрөп барышты да, кыйкырып: «Бүт жерге дүрбөлөң салган тиги экөө эми бул жакка да келишиптир.+
7 Жасон болсо аларды коноктоптур. Булардын баары Иса деген башка падыша бар деп айтып, императордун* буйруктарына каршы чыгып жатышат»,— дешти.+
8 Муну укканда чогулган эл менен шаар башкаруучуларынын тынчы кете баштады.
9 Шаар башкаруучулары Жасон менен башка шакирттерден күрөөгө жетиштүү акча алышкандан кийин аларды коё беришти.
10 Түн кирери менен, шакирттер Пабыл менен Сыласты шашылыш түрдө Берояга жөнөтүп жиберишти. Экөө ал жакка жетип, жүйүттөрдүн сыйынуу жайына барышты.
11 Бероялыктар тесалоникалыктарга караганда билим алганга дилгир* адамдар эле. Алар уккандарынын чын-төгүнүн текшериш үчүн Ыйык Жазманы күн сайын кылдат изилдеп, Кудайдын сөзүн жан-дили менен кабыл алышты.
12 Ошентип, алардын көптөрү, ошондой эле грек элиндеги кадыр-барктуу аялдардын бир тобу, ошондой эле айрым эркектер Исанын жолун жолдой башташты.
13 Пабылдын Кудайдын сөзүн Берояда да жарыялаганын угушканда тесалоникалык жүйүттөр элди үгүттөп, ага каршы тукуруш үчүн ошол жакка барышты.+
14 Ошондо бир туугандар Пабылды дароо деңизди көздөй жөнөтүп жиберишти.+ Сылас менен Тиметей болсо ошол жерде калышты.
15 Пабылды узатып чыккандар аны менен Афинге чейин барышты. Пабыл аларга Сылас менен Тиметейдин+ мүмкүн болушунча тезирээк келип калышы керектигин айтты. Анан алар кайра артка кайтышты.
16 Пабыл Афинде Сылас менен Тиметейди күтүп жатканда шаардын буркандарга жык толгонун көрүп, ичинен кыжырданды.
17 Анан ал сыйынуу жайындагы жүйүттөр менен жана Кудайга сыйынган башка адамдар менен талкуу жүргүзө баштады. Ошондой эле күн сайын базар аянтына барып, ал жактан кезиккендер менен да талкуулашып жүрдү.
18 Бирок эпикурчулар* менен стоиктер* деп аталган философтордун айрымдары аны менен талашып, кээ бирлери: «Бул келжиректин эмне дегиси бар?» — дешсе, башкалары: «Бул бөтөн жерликтердин кудайларынын жарчысы окшойт»,— деп жатышты. Себеби Пабыл Иса тууралуу жана өлгөндөрдүн тирилери жөнүндөгү жакшы кабарды жарыялап жаткан эле.+
19 Алар аны Ареопагга* алып барып: «Эмне болгон жаңы окууну айтып жүрөсүң? Кененирээк айтып берчи.
20 Сен айтып жаткандарды мурун такыр укпаптырбыз, бул жөнүндө көбүрөөк билгибиз келип жатат»,— дешти.
21 Анткени бардык афиндиктер менен алардын арасында жашаган* бөтөн жерликтер бош убактысын дайыма жаңы бир нерсе жөнүндө сүйлөшүп же угуп өткөрүшчү.
22 Пабыл Ареопагдын+ ортосуна туруп, мындай деди:
«Афиндиктер! Байкашымча, башкаларга караганда силер кудайлардан көбүрөөк коркот* окшойсуңар.+
23 Мисалы, ыйык туткан* нерселериңерди жакшылап карап баратып „Белгисиз Кудайга“ деген жазуусу бар курмандык жайын көрдүм. Мен силерге өзүңөр билбесеңер да сыйынып жүргөн ошол Кудай жөнүндө жарыялап жатам.
24 Дүйнөнү жана андагынын баарын жараткан Кудай, асман-жердин Эгеси,+ адамдар курган ибадатканаларда жашабайт.+
25 Ал адам баласынан жардам күткүдөй, эч нерсеге муктаж эмес,+ анткени өмүрдү да, демди да+ жана бүт баарын бардыгына өзү берет.
26 Бүт жер жүзүндө жашасын деп, ал бир кишиден+ бардык элдерди жараткан.+ Ошондой эле кайсы бир нерселердин убакыт-мөөнөтүн жана адамдар жашай турган жерлердин чегин аныктап койгон.+
27 Анткени ал адамдардын аны издешин, көп күч-аракет жумшаганга туура келсе да, табышын каалайт.+ Бирок, чынында, ал ар бирибизге жакын.
28 Себеби биз анын аркасы менен жашап, анын аркасы менен кыймылдап, тирүү жүрөбүз. Бул жөнүндө силердин кээ бир акындарыңар да: „Биз баарыбыз анын балдарыбыз*“,— деп айтышкан.
29 Демек, биз Кудайдын балдары болгондуктан+ аны алтынга, күмүшкө же ташка — адамдар элестетип, оюнан чыгарып жасаган нерсеге — окшош деп ойлобошубуз керек.+
30 Туура, Кудай мурун ушундай караңгылыкка көз жумуп келген,+ бирок азыр бардык жерде адамдарга өкүнүшү керектигин жарыялап жатат.
31 Анткени ал өзү дайындаган киши аркылуу жер жүзүн адилеттик менен соттой турган күндү белгилеп койгон+ жана буга бардык адамдар ишениши үчүн, ошол кишини тирилтип кепилдик берген».+
32 Өлгөндөрдүн тирилиши жөнүндө укканда ал жердегилердин айрымдары шылдыңдап күлүштү,+ башкалары болсо: «Бул жөнүндө башка жолу угалы»,— дешти.
33 Ошентип, Пабыл ал жерден кетти.
34 Бирок кээ бирлери Пабыл менен кетип, Исанын жолдоочусу болушту. Алардын арасында Ареопагдагы соттун мүчөсү Дионис, Дамар деген аял жана башкалар бар эле.
Шилтемелер
^ Сөзмө-сөз: «цезардын».
^ Же: «көз карашы кенен».
^ Эпикур деген философтун жолдоочулары. Алар өлгөндөрдүн тирилерине ишенишчү эмес жана мүмкүн болушунча рахаттанып жашаш керек деп айтышчу.
^ Зенон деген философтун жолдоочулары. Алар акылга жетектелип жашап, кайгыга да, бакытка да кош көңүл караш керек деп айтышчу жана өлгөндөрдүн тирилерине ишенишчү эмес.
^ Байыркы Афиндеги дөбө. Ал жакка афиндиктердин Жогорку соту да чогулчу.
^ Же: «ал шаарга келген».
^ Же: «аябай динчил».
^ Же: «сыйынган».
^ Же: «тукумубуз».
