Элчилер 18:1—28
18 Ошол окуядан кийин Пабыл Афинден чыгып, Корунтка барды.
2 Ал жерден Понтто төрөлгөн Акила+ деген бир жүйүт менен анын аялы Прискиланы жолуктурду. Клавдий жүйүттөрдүн баарына Римден чыгып кетүүнү буйрук кылгандыктан, ал экөө жакында эле Италиядан келишкен болчу. Пабыл алардыкына барып,
3 жасаган иши бирдей болгондуктан, чогуу жашап, чогуу иштеп жүрдү.+ Алар чатыр жасашчу.
4 Пабыл дем алыш сайын+ сыйынуу жайында сөз сүйлөп,+ жүйүттөр менен гректерди айткандарына ынандырып жүрдү.
5 Ал эми Сылас+ менен Тиметей+ Македониядан келишкенде, Пабыл бүт убактысын Кудайдын сөзүн жарыялаганга арнай баштады. Ал жүйүттөргө Исанын Машаяк экенин айтып, далилдеп жатты.+
6 Бирок алар каршы чыгып, аны жаман сөздөрдү айтып кордошкондуктан, Пабыл кийимин силкип:+ «Өз каныңар өз мойнуңарда.+ Мен күнөөлүү эмесмин.+ Эми башка элдерге барам»,+— деди.
7 Анан ал сыйынуу жайынан кетип, Титус Жуст деген бир кишинин үйүндө элге Кудайдын жакшы кабарын айта баштады. Кудайга сыйынып жүргөн ал кишинин үйү сыйынуу жайына туташып* турчу.
8 Сыйынуу жайынын башчысы Криспос+ бүт үйүндөгүлөрү менен Мырзабызга ишенип калды. Кабарды уккан көптөгөн корунттуктар да ишенип, чөмүлтүлүштү.
9 Түн ичинде Пабылга Мырзабыз аян аркылуу: «Коркпо, сүйлөй бер, багынба,
10 анткени мен сенин жаныңдамын.+ Эч ким сага кол салып, зыян келтирбейт, себеби бул шаарда мага ишене турган дагы көп киши бар»,— деди.
11 Ошентип, Пабыл ал жерде 1 жыл 6 ай болуп, Кудайдын сөзүн жарыялап, окутуп жүрдү.
12 Галион Ахаяда аймак акими* болуп турганда, жүйүттөр биригип алып, Пабылга каршы чыгышты да, аны сот жүргүзүлчү жерге алып барып, акимге:
13 «Бул киши башкаларды Кудайга мыйзамга каршы келген жол менен сыйынганга үндөп жатат»,— дешти.
14 Пабыл сүйлөмөкчү болгондо, Галион: «Жүйүттөр, эгер кандайдыр бир жаман иш же оор кылмыш жасалса бир жөн, анда силерди сабыр кылып укмакмын.
15 Бирок талашыңар кайсы бир сөздөргө, адамдарга, мыйзамыңарга байланыштуу болгондуктан,+ өзүңөр териштирип алгыла. Мен бул иште сот болгум келбейт»,— деди да,
16 аларды сот жүргүзүлчү жерден кууп жиберди.
17 Ошондо алар сыйынуу жайынын башчысы Состенди+ кармап алып, сот жүргүзүлчү жердин алдында сабап салышты. Галион болсо аларды карап да койгон жок.
18 Пабыл ал жерде дагы бир топ күн болгондон кийин бир туугандарыбыз менен коштошуп, Сирияга барыш үчүн Прискила жана Акила менен бирге кемеге отурду. Ал Кудайга берген антына байланыштуу Кенхиреяда+ чачын кырктырды.
19 Эфеске барышканда, Пабыл ал экөөнү калтырып, сыйынуу жайына барды да, жүйүттөр менен Ыйык Жазмада жазылгандар жөнүндө талкуу жүргүздү.+
20 Алар Пабылдан дагы бир канча убакытка калышын өтүнүштү. Бирок ал макул болбой:
21 «Жахаба кааласа, кайра келем» — деп, алар менен коштошту. Анан Эфестен кемеге отуруп,
22 Кесарияга барды. Андан соң боордошторуна барып*, алар менен учурашкандан кийин Сириядагы Антиохияга жөнөп кетти.+
23 Ал жакта бир канча убакыт болгон соң ал кайрадан жолго чыкты да, Галатия менен Фригиянын+ ар кайсы аймактарын аралап, бардык шакирттерге дем-күч берип жүрдү.+
24 Ошол учурда Эфес шаарына Аполос+ деген александриялык бир жүйүт келди. Ал сөзгө чечен, Ыйык Жазманы жакшы билген,
25 Жахаба Кудайдын жолу жөнүндө билим алган* киши болчу. Аполос Кудайдын ыйык рухунун таасири менен жалындап, Иса жөнүндө туура айтып, туура окутуп жүрдү. Бирок ал Жакан пайгамбар жарыялаган чөмүлдүрүүнү гана билчү.
26 Аполос сыйынуу жайында тайманбай сүйлөй баштады. Анын сөздөрүн укканда Прискила менен Акила+ аны өздөрүнө кошуп алып, Кудайдын жолун тагыраак түшүндүрүп беришти.
27 Ал Ахаяга барганы жаткандыктан, Эфестеги шакирттер ошол жактагы боордошторуна кат жазып, аны жылуу тосуп алышын өтүнүштү. Аполос ал жакка барып, Кудайдын ырайымынын аркасында ишенип калгандарга чоң жардам берди.
28 Анткени ал Исанын Машаяк экенин Ыйык Жазмадан көрсөтүп,+ жүйүттөрдүн жаңылып жүргөнүнө төгүндөлгүс далилдерди келтирип, эл алдында шыктанып сүйлөп жатты.
