Элчилер 20:1—38
20 Тополоң басылгандан кийин, Пабыл шакирттерди чакыртты. Анан аларды кайраттандыргандан кийин коштошуп, Македонияга жөнөдү.
2 Ал жактагы аймактарды кыдырып, боордошторуна бир топ дем-күч бергенден кийин Грецияга барды.
3 Ал жерде 3 ай жүргөн соң Сирияга сүзүп кетмекчи болду. Бирок жүйүттөрдүн аны өлтүргүсү келип жатканын билип калгандыктан+ кайра Македония аркылуу кетип калууну чечти.
4 Аны бероялык Пурдун уулу Сопатыр, тесалоникалык Аристарх+ менен Секундос, дербелик Гай, Тиметей+ жана азиялык Тихик+ менен Трофим+ коштоп жүрүштү.
5 Алар Троаска бизден мурун барып, ошол жерде күтүп турушту.
6 Биз болсо Калама майрамынан+ кийин Филипиден кемеге отуруп, 5 күн дегенде Троаска жеттик. Ал жерде баарыбыз 7 күн болдук.
7 Жуманын биринчи күнү* тамактанганы чогулганыбызда, Пабыл ал жердегилерге кайрылып сөз сүйлөдү. Себеби эртеси күнү жолго чыкмак. Ал түн ортосуна чейин сүйлөдү.
8 Биз чогулган үстүнкү бөлмөдө бир топ чырак күйүп турган.
9 Пабыл сүйлөп жатканда, терезеде отурган Эйтик деген жаш жигит катуу уктап кетип, үчүнчү кабаттан кулап түштү. Барып карашса — өлүп калыптыр.
10 Пабыл ылдый түшүп, жанына барды да, эңкейип, аны кучактап:+ «Ызы-чуу болбогула, бул жигит тирүү»,+— деди.
11 Анан жогору чыгып, нан сындырып*, тамактана баштады. Андан кийин сөзүн улап, алар менен бир топко чейин, таң атканга чейин, сүйлөшүп отурду да, жолго чыкты.
12 Тирилген жаш жигитти үйүнө алып кетишти. Анын тирүү экенин көрүп, баары чоң кубанычка бөлөнүштү.
13 Биз кемеге отуруп, Ас шаарына жөнөдүк. Пабыл болсо жөө бармай болду. Өзү айткандай, аны ошол жактан ала кетмекчи болдук.
14 Пабыл Ас шаарына келгенде, Мителенеге чогуу сүзүп кеттик.
15 Эртеси күнү ал жерден жолго чыгып, Хиоско жеттик. Кийинки күнү болсо Самоско бир азга токтодук да, анын эртеси Милетке бардык.
16 Пабыл убактысын Азияда коротпош үчүн Эфестен+ кыя өтүүнү туура көрдү. Анткени, мүмкүн болсо, Элүүнчү күн майрамында Иерусалимде+ болуп калайын деп шашып жатты.
17 Ал Милеттен Эфеске кабар берип, ал жактагы жыйналыштын аксакалдарын чакыртты.
18 Алар келгенде, Пабыл мындай деди: «Азияга келген күндөн тартып араңарда өзүмдү кандай алып жүргөнүмдү жакшы билесиңер.+
19 Мен Теңирдин* көз алдында момун болуп, кулдай кызмат кылдым,+ көп көз жаш төктүм, жүйүттөр өлтүргүсү келгендиктен, далай кыйынчылыктарга кабылдым.
20 Ошондой эле силерге пайдалуу нерселердин баарын айтып, эл алдында+ жана үймө-үй+ кыдырып окутуп жүрдүм.
21 Жүйүттөргө да, гректерге да өкүнүшү,+ Кудайдын жолуна түшүшү жана Мырзабыз Исага ишениши керектигин айтып, кылдат күбөлөндүрдүм.+
22 Эми болсо Кудайдын ыйык руху аркылуу берген жетегине баш ийип, Иерусалимге баратам. Ал жерде башыма эмнелер түшөрүн билбейм.
23 Бирок Кудай ыйык руху аркылуу мага түрмөгө камаларымды, кыйынчылыктарга туш болорумду ар бир шаарда кайра-кайра айтып жатат.+
24 Ошондой болсо да мен жанымды эч аябайм. Жарышымды аягына чыгарып,+ кызматымды аягына чейин аткарсам эле болду. Себеби Мырзабыз Иса мага Кудайдын ырайымы жөнүндөгү жакшы кабарды жарыялап, кылдат* күбөлөндүрүүнү тапшырган.
25 Менден Кудайдын Падышалыгы жөнүндөгү кабарды уккан силердин эч кимиңер мени экинчи көрбөй турганыңарды билем.
26 Ошондуктан бүгүн силерди күбө болгонго чакырам: мен эч кимдин канына забын эмесмин,+
27 анткени силерге Кудайдын эрки жөнүндө бүт баарын айтып бердим.+
28 Өзүңөргө да,+ бүт оторго да сак болгула. Кудайдын өз Уулунун каны менен сатып алган+ жыйналышын, оторун, кайтарышыңар үчүн,+ ал силерди ыйык руху аркылуу аны көзөмөлдөгөнгө* дайындаган.+
29 Мен кеткенден кийин, араңарга ач карышкырлар кирерин билем,+ алар оторду такыр аябайт.
30 Андан сырткары, шакирттерди ээрчитип кетиш үчүн өзүңөрдүн эле араңардан чындыкты бурмалап сүйлөгөн адамдар чыгат.+
31 Ошондуктан сергек болгула жана көз жашымды төгүп, 3 жыл бою+ ар бириңерге күн-түн дебей насаат айтканымды эсиңерден чыгарбагыла.
32 Эми силерди Кудай өзү, анын ырайымы жөнүндөгү сөзү коргосун. Кудайдын сөзү ишенимиңерди бекемдеп, Кудай ыйыктаган адамдардын баары менен бирге мураска ээ кылат.+
33 Мен эч кимдин күмүшүнө, алтынына же кийимине көз арткан эмесмин.+
34 Өзүңөр билгендей, эмгек кылып өзүмдүн да,+ шериктеримдин да муктаждыктарын канааттандырып жүрдүм.
35 Силер да ушинтип жан аябай эмгектенип,+ муктаж болгондорго жардам беришиңер керектигин бардык жагынан көрсөттүм. Мырзабыз Исанын: „Алганга караганда берген бактылуу“,+— деген сөздөрүн унутпашыңар керектигин да көрсөттүм».
36 Ушуларды айткандан кийин Пабыл алар менен чогуу тизелеп, Кудайдан тиленди.
37 Анан баары буркурап ыйлап, Пабылды кучактап өпкүлөштү.
38 Анткени аларды: «Мени экинчи көрбөйсүңөр»,+— деген сөздөрү өзгөчө кайгыртты. Андан кийин аны кемеге чейин узатып барышты.
Шилтемелер
^ Бул күн азыркы боюнча жекшемби күн. Жүйүттөр үчүн жуманын биринчи күнү болгон.
^ Бул тамактанууну баштап бергенди билдирген каада болчу.
^ Же: «Мырзабыздын». Грекче Кириос.
^ Же: «толук».
