Элчилер 23:1—35
23 Пабыл Жогорку сотко кайрылып: «Агайын-туугандар, ушу күнгө чейин туура эмес эч нерсе кылган жокмун. Ошон үчүн Кудайдын алдында абийирим таза+ деп айта алам»,— деди.
2 Ошондо Анания деген башкы дин кызматчы Пабылдын жанында тургандарга аны оозго урууну буйруду.
3 Пабыл ага: «Эки жүздүү*, сени Кудай урат. Сен мени Мыйзам боюнча соттош үчүн отурасың да, Мыйзамды бузуп, мени урганга буйрук бергениң кандай?» — деди.
4 Жанында тургандар: «Кудайдын башкы дин кызматчысына да тил тийгизесиңби?!» — дешти.
5 Пабыл: «Боордоштор, анын башкы дин кызматчы экенин билбептирмин. Ыйык Жазмада: „Элиңердин башчысына тил тийгизбегиле“,— деп жазылган эмеспи»,+— деди.
6 Жогорку соттун мүчөлөрүнүн кээ бирлери садукейлер, кээ бирлери фарисейлер экенин билгенде Пабыл үнүн катуу чыгарып: «Агайын-туугандар, мен фарисеймин,+ фарисейлердин урпагымын. Мени өлгөндөрдүн тирилерине ишенгеним үчүн соттоп жатышат»,— деди.
7 Ал ушул сөздөрдү айтканда, фарисейлер менен садукейлердин ортосунда талаш чыгып, чогулгандар экиге бөлүндү.
8 Анткени садукейлер өлгөндөрдүн тирилерине, периштелер менен рухтар бар экенине ишенишчү эмес, фарисейлер болсо ишенишчү*.+
9 Ушундан улам ал жердегилер өз ара кыйкырып-өкүрө башташты. Ошондо фарисейлердин арасынан чыккан диний мыйзамдарды окуткандардын кээ бири ордуларынан туруп, садукейлер менен катуу талашып-тартыша кетишти да: «Биз бул кишиден эч кандай айып тапкан жокпуз. Эгерде буга рух же периште сүйлөгөн болсо, анда...» — дешти.+
10 Талаш күчөй бергендиктен, миң башы Пабылды өлтүрүп салышпасын деп коркту. Ошон үчүн жоокерлерге ылдый түшүп, аны тигилердин арасынан сууруп чыгып, жоокерлер үйүнө алып барышы керектигин буйрук кылды.
11 Ошол түнү Мырзабыз Пабылга көрүнүп: «Кайраттуу бол!+ Иерусалимде мен жөнүндө кандай кылдат күбөлөндүрсөң, Римде да ошондой күбөлөндүрүшүң керек»,+— деди.
12 Таң атканда, жүйүттөр өз ара жашыруун сүйлөшүп, Пабылды өлтүрмөйүн бир нерсе жешсе же ичишсе, каргышка калышарын айтып, ант беришти.
13 Ант бергендердин саны 40тан ашык эле.
14 Алар жогорку дин кызматчылар менен аксакалдарга барып: «Биз Пабылды өлтүрмөйүн оозубузга наар алсак, каргышка каларыбызды айтып ант бердик.
15 Ошондуктан азыр Жогорку соттун мүчөлөрү менен бирге миң башыга барып, Пабылдын ишин жакшылап териштиребиз демиш болуп, аны силерге алып келиши керектигин айткыла. Биз болсо аны бул жакка жете элегинде эле өлтүрүп салыш үчүн даяр турабыз»,— дешти.
16 Бирок Пабылдын жээни алардын арам ою жөнүндө угуп калып, жоокерлер үйүнө барды да, Пабылга билдирди.
17 Ошондо Пабыл жүз башылардын бирин чакырып: «Бул баланы миң башыга жолуктуруп койчу, ага айта турган сөзү бар экен»,— деди.
18 Ал баланы миң башыга ээрчитип барды да: «Камактагы Пабыл мени чакырып, бул баланы сизге алып барчы деп өтүндү. Сизге айтчу сөзү бар экен»,— деди.
19 Миң башы аны колунан кармап, арыраак ээрчитип барды да: «Эмне дейин дедиң эле?» — деп сурады.
20 Ал: «Жүйүттөр өз ара сүйлөшүп алып, Пабылдын ишин жакшылап териштиребиз демиш болуп, эртең аны Жогорку сотко алып барышыңызды суранганы жатышат.+
21 Бирок сиз макул болбоңуз, себеби аны 40тан ашык киши аңдып турат. Алар Пабылды өлтүрмөйүн эч нерсе жебейбиз, ичпейбиз деп ант беришиптир.+ Уруксат беришиңизди эле күтүп турушат»,— деди.
22 Миң башы: «Бул жөнүндө мага айтканыңды эч ким билбесин» — деп, баланы коё берди.
23 Анан жүз башылардан экөөнү чакырып: «Кечки саат тогуздарда* Кесарияга жөнөп кеткенге 200 жоокер, 70 атчан, 200 найзакер даярдагыла.
24 Пабылды башкаруучу Феликске аман-эсен жеткириш үчүн ал үчүн да аттарды камдагыла»,— деди.
25 Анан мындай деп кат жазды:
26 «Улуу даражалуу башкаруучу Феликске Клавдий Лусийден салам кат!
27 Бул кишини жүйүттөр кармап алып, өлтүргөнү жатышканда, жоокерлерим менен бара калып, куткарып алдым.+ Себеби анын Римдин жараны экенин билип калдым.+
28 Анан ага кандай айып коюшканын билиш үчүн өздөрүнүн Жогорку сотуна алып бардым.+
29 Ошентип, аны өздөрүнүн Мыйзамына байланыштуу айыптап жатышканын,+ бирок өлүм жазасына тарткыдай же түрмөгө камагыдай күнөөсү жок экенин билдим.
30 Анан жүйүттөрдүн бул кишини өлтүргөнү жатышканын билип калып,+ аны токтоосуз түрдө сизге жөнөттүм. Айыптоочуларына болсо айтчу сөздөрүн сиздин алдыңызда айткыла деп буйрудум».
31 Берилген буйрукка ылайык, жоокерлер Пабылды алып,+ түн ичинде Антипатриске барышты.
32 Эртеси күнү Пабылды андан ары атчандар менен жөнөтүп, өздөрү кайра жоокерлер үйүнө кайтып келишти.
33 Атчандар Кесарияга барып, Пабылды башкаруучуга тапшырышты да, катты беришти.
34 Башкаруучу катты окуп, Пабылдан кайсы аймактан экенин сурады. Киликиядан+ экенин билгенде:
35 «Ишиңди айыптоочуларың келгенде+ жакшылап териштирем»,— деди да, аны Ироддун ак сарайында кайтарганга буйрук берди.
Шилтемелер
^ Сөзмө-сөз: «Акталган дубал».
^ Же: «ишенерин айтышчу».
^ Сөзмө-сөз: «Түнкү үчүнчү саатта».
