Элчилер 4:1—37
4 Петир менен Жакан элге сүйлөп жатканда, алардын жанына дин кызматчылар*, ибадаткананын күзөт башчысы жана садукейлер*+ барышты.
2 Алар эки элчинин элди окутуп, Исанын тирилгени жөнүндө ачык жарыялап жатышканына кыжырланып,+
3 экөөнү кармап кетишти. Бирок кеч кирип калгандыктан, кийинки күнгө чейин камап коюшту.+
4 Анткен менен элчилердин сөзүн уккандардын көптөрү ишенип калышты. Алардын саны 5 000дей болду.+
5 Эртеси күнү жүйүт элинин башчылары, аксакалдар жана диний мыйзамдарды окуткандар* Иерусалимге чогулушту.
6 Алардын арасында жогорку дин кызматчы Анас,+ Каяпа,+ Жакан, Искендер жана жогорку дин кызматчынын башка туугандарынын баары бар эле.
7 Алар Петир менен Жаканды ортого чыгарып: «Муну кылганга силерге ким бийлик берди? Муну кимдин атынан кылдыңар?» — деп сурай башташты.
8 Ошондо Петир Кудайдын ыйык рухуна толуп:+
«Эл башчылары жана аксакалдар,
9 бүгүн бизди буту баспаган кишиге кылган жакшылыгыбыз үчүн суракка алып,+ аны ким айыктырганын билгиңер келип жатса,
10 анда баарыңарга, бүт ысрайыл элине маалым болсун: бул киши назареттик Иса Машаяктын атынан айыкты.+ Силер устунга кадап өлтүргөн,+ бирок Кудай тирилтип алган+ Иса аркылуу айыгып, алдыңарда турат.
11 Ошол Иса — „силер, куруучулар, жаратпай койгон, бирок бурчка коюлган негизги таш“.+
12 Адамдарды андан башка эч ким куткара албайт, себеби жер үстүндө бизди куткара турган+ башка эч ким* жок»,— деди.+
13 Алар Петир менен Жакандын тайманбастыгын жана билими жок* карапайым кишилер+ экенин көрүп таң калышты. Ошондой эле ал экөөнүн Иса менен бирге жүргөнүн билишти.+
14 Бирок алардын жанындагы айыккан кишини көрүп+ эчтеке дей алышкан жок.+
15 Ошондо аларга Жогорку соттун* залынан чыгып кетишин буйруп, өз ара:
16 «Бул кишилерди эмне кылсак?+ Анткени булар, чынында эле, зор керемет жасашты, бул жөнүндө Иерусалимдин бүт тургундарына маалым болду.+ Муну биз да тана албайбыз.
17 Бирок бул мындан ары да элге жайыла бербеши үчүн, буларды коркутуп, экинчи анын* атынан эч кимге эч нерсе айтпагыла деп буйрук кылалы»,— деп кеңешишти.+
18 Ошентип, экөөнү чакырышты да, Исанын атынан эч жерде эч нерсе айтпагыла, окутпагыла деп буйрук кылышты.
19 Бирок Петир менен Жакан: «Өзүңөр ойлонуп көргүлөчү, Кудайды эмес, силерди укканыбыз Кудайдын алдында туура болобу?
20 Биз уккан-көргөнүбүздү айтпай коё албайбыз»,— дешти.+
21 Ошондо тигилер экөөнү дагы бир жолу коркутуп туруп коё беришти. Анткени жазалаганга эч себеп таба алышкан жок,+ болуп өткөн окуя үчүн Кудайды даңктап жаткан элден да коркушту.
22 Кереметтин күчү менен айыккан кишинин жашы 40тан ашып калган эле.
23 Бошотулгандан кийин Петир менен Жакан башка шакирттерге барып, жогорку дин кызматчылар менен аксакалдардын эмне дешкенин айтып беришти.
24 Муну укканда баары чогуу Кудайдан мындай деп тиленишти:
«Оо, Эгедер Теңир, асман-жерди, деңизди жана алардагынын баарын сен жараткансың.+
25 Сен ыйык рухуң менен өз кызматчың, бабабыз Дөөтүгө+ түрткү берип: „Эмне үчүн элдер дүрбөлөңгө түшүп, улуттар ишке ашпас нерсе жөнүндө ойлонуп жатышат?
26 Жер жүзүнүн падышалары Жахаба менен анын тандалганына* каршы чыкканга даярданышты, башкаруучулар аларга каршы бир кишидей чогулушту“,— деп айттыргансың.+
27 Анан чындап эле ошондой болду: бул шаарда Ирод менен Понтий Пилат+ башка улуттагылар, ысрайылдыктар менен чогулуп, өзүң тандаган+ ыйык кызматчың Исага каршы чыгышты.
28 Ошентип, алар кудуреттүүлүгүңөн улам жана өз эркиңе ылайык алдын ала айткандарыңды аткарышты.+
29 Эми, Жахаба, алардын коркутуп-үркүткөнүнө көңүл буруп, кулдарыңа сөзүңдү эч тайманбай айта бергенге жардам бере көр.
30 Ооруларды айыктырыш үчүн күчүңдү колдонуп, ыйык кызматчың Исанын атынан+ керемет-жышаандарды да көрсөтө бер».+
31 Шакирттер ушинтип Кудайдан жалынып тиленгенден кийин, алар чогулган жер солкулдай түштү да, баары Кудайдын ыйык рухуна толуп,+ анын сөзүн тайманбай айта башташты.+
32 Ал жердеги шакирттердин саны аябай көп болчу. Алардын баарынын ой-тилеги бир эле*. Эч ким өзүнүн мүлкүн меники дебей, бардыгын жалпы колдонушту.+
33 Элчилер Мырзабыз Исанын тирилгени жөнүндө күйүп-жанып, жигердүү күбөлөндүрүп жүрүштү.+ Кудай аларга батасын мол бере берди.
34 Эч кимиси эч нерсеге муктаж болгон жок.+ Себеби жери же үйү барлардын бардыгы жерин, үйүн сатып, түшкөн акчаны
35 элчилерге тапшырып жатышты.+ Элчилер болсо ал акчадан ар бирине муктаждыгына жараша берип турушту.+
36 Леби уруусунан болгон кипрлик Жусуп деген бир киши бар эле. Элчилер аны Барнаба+ («сооронуч уулу» дегенди билдирет) деп да коюшчу.
37 Ал да жерин сатып, түшкөн акчаны элчилерге алып келди.+
Шилтемелер
^ Сөзмө-сөз: «ысым».
^ Бул алардын сабатсыз болгонун эмес, кыязы, еврейлердин диний мектептеринен билим албаганын билдирет.
^ Б. а. Исанын.
^ Сөзмө-сөз: «жүрөгү, жаны бир эле».
