Элчилер 8:1—40
8 Шабыл Степанды өлтүрүп жаткандарды колдоп, алардын тарабында болду.+
Ошол күндөн тартып Иерусалимдеги жыйналыштагылар катуу куугунтуктала баштады. Ошондо элчилерден башкасынын баары бүт Жүйүт жерине, Самарияга чачырап кетти.+
2 Кудайдан корккон кишилер Степандын сөөгүн алып кетип, көргө коюп, аны жоктоп катуу ыйлашты.
3 Шабыл болсо жыйналыштагыларды ырайымсыздык менен куугунтуктай баштады. Ал улам бир үйгө кирип барып, эркек-аял дебей баарын сүйрөп чыгып, түрмөгө каматып жатты.+
4 Ошентсе да чачырап кеткен шакирттер барган жерлеринде Кудайдын сөзүн жарыялап жүрүштү.+
5 Филип деген шакирт Самария+ шаарына* барып, Машаяк жөнүндө кабар айта баштады.
6 Анын айткандарын угуп, жасаган кереметтерин көргөндөрдүн баары аны дит коюп угуп жатышты.
7 Алардын арасында ичине жин кирип алган көп адамдар бар эле. Жиндер катуу кыйкырып, алардын ичинен чыгып жатышты.+ Көп сандаган шал оорулуулар менен аксактар да айыгып жатты.
8 Ошентип, ал шаардагылар чоң кубанычка бөлөндү.
9 Ошол шаарда Симон деген бир киши бар эле. Ал сыйкырчылык кылып, өзүн улуу адам кылып көрсөтүп, Самариянын элин таң калтырып жүргөн.
10 Баары, кичинесинен чоңуна чейин*, ага кулак салып: «Бул кишиде Кудайдын кудуреттүү күчү бар»,— дешчү.
11 Симон аларды көптөн бери сыйкырчылыгы менен таң калтырып жүргөндүктөн, бардыгы анын айтканын укчу.
12 Бирок Филип Кудайдын Падышалыгы жана Иса Машаяк жөнүндөгү жакшы кабарды айтканда,+ ал жактагы эркектер да, аялдар да ага ишенип, чөмүлтүлө башташты.+
13 Симон да ишенип, чөмүлтүлдү. Ал дайыма Филиптин+ жанында жүрүп, анын жасаган кереметтери менен улуу ажайып иштерине таң калып жатты.
14 Иерусалимдеги элчилер самариялыктардын Кудайдын сөзүн кабыл алышканын угуп,+ аларга Петир менен Жаканды жөнөтүштү.
15 Экөө барып, Кудайдан самариялыктарга ыйык рухун беришин сурап тиленишти.+
16 Анткени алар Мырзабыз Исаны кабыл алганын көрсөтүп чөмүлүшкөнү менен, эч кимисине Кудайдын ыйык руху бериле элек болчу.+
17 Петир менен Жакан алардын үстүнө колдорун коюшканда,+ аларга Кудайдын ыйык руху бериле баштады.
18 Элчилер колун койгон кишилерге Кудайдын ыйык руху берилип жатканын көргөндө Симон ал экөөнө акча сунуш кылып:
19 «Мен колумду койгон кишилерге да Кудайдын ыйык руху берилиши үчүн, мага да ушундай бийлик бергилечи»,— деди.
20 Бирок Петир ага: «Күмүшүң өзүң менен кошо жок болсун. Эмне, Кудайдын белегин акчага сатып алам деп ойлодуңбу?!+
21 Кудайдын алдында жүрөгүң бузук болгондуктан, бул ишке эч кандай тиешең жок, сага эч нерсе берилбейт.
22 Ошондуктан арам оюң үчүн өкүнүп, Жахабага жалынып-жалбар. Мүмкүн, ал сени кечирер.
23 Анткени сенин ачуу уудай* экениңди, күнөөгө кул болуп калганыңды көрүп турам»,— деди.
24 Ошондо Симон: «Айтканыңар башыма түшпөшү үчүн, Жахабадан мен үчүн тиленгилечи»,— деди.
25 Петир менен Жакан ал жакта Жахабанын сөзүн жарыялап, кылдат күбөлөндүрүшкөндөн кийин кайрадан Иерусалимге жөнөштү. Жолдон самариялыктардын көптөгөн айылдарына жакшы кабар* таратышты.+
26 Ал эми Филипке Жахабанын периштеси:+ «Түштүккө, Иерусалимден Газага кеткен жолго бар»,— деди. Ал жол чөлдү аралап өтчү.
27 Филип ошол жакка жөнөдү. Ал жолдо Эфиопиянын канышасынын* бүт казынасына жооптуу ак сарай кызматчысы бараткан. Жогорку даражалуу эфиопиялык ал төрө* Иерусалимге Кудайга сыйынганы келген болчу.+
28 Ал кайра үйүн көздөй жол тартып, арабасында Ышая пайгамбардын китебин үн чыгара окуп бараткан эле.
29 Кудай ыйык руху аркылуу Филипке: «Тетиги арабаны кууп жетип, катарлаш бас»,— деди.
30 Филип арабаны кууп жетти да, ага катарлаш чуркап, төрөнүн Ышая пайгамбардын китебин окуп жатканын угуп: «Окуганыңызды түшүнүп жатасызбы?» — деп сурады.
31 Төрө: «Бирөө түшүндүрүп бербесе, кантип түшүнмөк элем?» — деди. Анан Филиптен арабага түшүп, жанына отурушун суранды.
32 Ал Ыйык Жазмадан: «Аны союла турган койдой жетелеп барышты. Ал кыркмачынын алдында үнсүз жаткан козудай болуп ооз ачпайт.+
33 Аны кемсинтишти, адилеттүү сот жүргүзүшкөн жок.+ Анын ата-тегин ким айтып берет? Анткени ал жер бетинен жок болду»,+— деген сөздөрдү окуп бараткан эле.
34 Эфиопиялык төрө Филиптен: «Айтсаң, пайгамбар бул жерде ким тууралуу айтып жатат? Өзү жөнүндөбү же башка бирөө жөнүндөбү?» — деп сурады.
35 Филип ага Ыйык Жазманын ошол жеринен баштап, Иса тууралуу жакшы кабарды айтып берди.
36 Алар андан ары жол жүрүп баратып суу бар жерге жетишкенде, төрө: «Мына суу, чөмүлүшүмө кандай тоскоолдук бар?» — деди.
37 *——
38 Анан арабаны токтотконго буйрук берди. Ошентип, Филип менен төрө сууга киришти да, Филип аны чөмүлдүрдү.
39 Алар суудан чыгары менен, Жахаба ыйык рухун колдонуп Филипти башка жакка алып кетти. Төрө ошондон кийин Филипти көргөн жок. Ал кубанган бойдон жолун улады.
40 Филип болсо Азотко* барып, ошол жактагы бардык шаарларды аралап, Кесарияга жеткенче жакшы кабар таратып барды.+
Шилтемелер
^ Же балким: «Самариядагы бир шаарга».
^ Же: «карапайымынан тартып аттуу-баштуусуна чейин».
^ Же: «өттөй ачуу».
^ Грекче тексттин ушул жеринде «кандаки» деген да наам жазылган. Бул наам Эфиопиянын айрым канышаларына берилчү.
^ Бул аят Ыйык Китептин айрым котормолорунда бар болсо да, грек тилиндеги байыркы негизги кол жазмаларда кездешпейт. А3 тиркемесин кара.
^ Ашдодго.
