Эфестиктерге 4:1—32
4 Мырзабыздын жолдоочусу болгонум үчүн түрмөдө отурган+ мен силерден суранам: Кудай тандап алган адамдардай* жашагыла.+
2 Дайыма момун,+ жумшак, чыдамкай болгула,+ бири-бириңерди сүйүп, көтөрүмдүү болгула.+
3 Силерди Кудайдын ыйык руху бириктирген. Ошондуктан өз ара ынтымактуу болуп, ошол биримдикти сактаганга бүт күчүңөрдү жумшагыла.+
4 Кудайдын тандалгандары катары үмүтүңөр бирөө+ болгондой эле, жыйналыш* да,+ Кудайдын ыйык руху да,+
5 Мырзабыз да,+ ишенген нерсебиз да, чөмүлүү да бирөө эле.
6 Ошондой эле баарыбыздын Атабыз болгон Кудай да бирөө. Ал баарынан жогору турат, эркин аткарыш үчүн баарыбызды колдонот, күчү баарына таасир этет.
7 Кудай ар бирибизге ырайым кылды. Бул белекти ар бирибиз Машаяктын бөлүштүрүп бергенине жараша алдык.+
8 Анткени Ыйык Жазмада: «Ал жогоруга көтөрүлүп, туткундарды алып кетти, анан ошол адамдарды белек катары берди»,— деп айтылат.+
9 «Көтөрүлдү» деген сөз эмнени билдирет? Бул анын төмөн жакка, башкача айтканда, жерге түшкөнүн да билдирет.
10 Ал төмөн жакка түшкөндөй эле, бардыгын толугу менен аткарыш үчүн асмандан да жогору+ көтөрүлгөн+.
11 Ал белек катары берген адамдардын арасынан айрымдарын элчи,+ башкаларын пайгамбар,+ бирөөлөрүн жакшы кабар таратуучу,+ дагы бирөөлөрүн койчу жана окутуучу+ кылып дайындады.
12 Алар боордошторун* туура жолго салыш үчүн*, кызмат кылыш үчүн, Машаяктын денесине салыштырылган жыйналышты бекемдеш үчүн берилди.+
13 Алар баарыбыздын ишенген нерселерибиз бир болушуна, Кудайдын Уулу жөнүндө так билим алышыбызга, ошонун аркасында Машаяктай болуп бардык жагынан жетилген адам+ болушубузга жардам беришет.
14 Ошондуктан шамалга айдалып, толкун ары-бери чайпаган кайыкка окшоп калбашыбыз үчүн мындан ары жаш баладай болбойлу, башкаларды митаамдык менен адаштырган адамдардын жалган окууларына ишенбейли.+
15 Анын ордуна, дайыма чындыкты айталы, сүйүүбүз түрткү бергендиктен, башчыбыз Машаяктан+ үлгү алып, бардык жагынан өсүп-жетиле берели.
16 Бизди адамдын денесине+ салыштырса болот: Машаяктын аркасы менен ошол дененин бардык мүчөлөрү шайкеш бириктирилип, муундар аркылуу өз ара аракеттенип, дененин жакшы иштешине шарт түзөт. Мүчөлөрүнүн ар бири өз милдетин жакшы аткарганда, дене жакшы өрчүп, арабызда сүйүү өкүм сүрөт.+
17 Ошондуктан Мырзабыздын атынан силерди буга чакырам: мындан ары өздөрүнүн курулай ойлоруна+ жетеленген башка элдердей болуп жашабагыла.+
18 Алар Кудайды таанып-билгиси келбегендиктен, жүрөктөрү таштай катып калгандыктан, акылдарын караңгылык басып, ал сунуш кылып жаткан жашоону четке кагып жатышат.
19 Уят-сыйытты жыйыштырып, уятсыз жүрүм-турумга*+ берилип, ар кандай ыпылас иштерди ач көздүк менен жасап жатышат.
20 Бирок силер Машаяктын мындай эмес экенин билдиңер.
21 Ал силерге чындык деген эмне экенин үйрөткөн. Эгер аны угуп, андан үйрөнгөн болсоңор, ал үйрөткөн нерсенин баарын жакшы билесиңер.
22 Ошол билимиңерге ылайык, мурдагы жашоо мүнөзүңөр боюнча калыптанган,+ жаман иштерге түрткөн каалоолордун айынан чирип бараткан эски табиятты кийим сыяктуу чечип салгыла.+
23 Акылыңарды мындан ары да жаңыртып*,+
24 Кудайдын эркине ылайык жаратылган жаңы табиятты кийгиле.+ Андай табиятка чыныгы адилдик менен Кудайга болгон берилгендик мүнөздүү.
25 Силер жалган айтпай калгандыктан, эми мындан ары бири-бириңерге дайыма чындыкты айткыла,+ себеби биз бир дененин мүчөлөрүбүз.+
26 Ачууланганыңарда күнөө кылбагыла.+ Ачууңарды күн батканча баскыла,+
27 Ибилиске орун* бербегиле.+
28 Ким уурулук кылып жүргөн болсо, мындан ары уурулук кылбасын. Андан көрө, муктаж болгондорго бир нерсе бере алгыдай болушу үчүн,+ ак эмгек кылып, талыкпай мээнеттенсин.+
29 Оозуңардан бир да чириген сөз чыкпасын.+ Зарыл учурда уккандарга дем-күч бериш үчүн жакшы сөздөрдү гана сүйлөгүлө.+
30 Ошондой эле Кудайдын ыйык рухуна каршы чыгып, аны капалантпагыла.+ Анткени төлөнгөн кундун негизинде боштондукка чыга турган күн келгенде+ куткарылышыңар үчүн, Кудай силерге ошол ыйык руху менен мөөр баскан.+
31 Кыжырдан,+ ачуудан, каардан, кыйкырыктан, кемсинтерлик сөздөрдөн+ жана башка ушу сыяктуу жаман нерселердин баарынан арылгыла.+
32 Бири-бириңерге кайрымдуу, боорукер болгула.+ Кудай силерди Машаяк аркылуу айкөлдүк менен кечиргендей, силер да бири-бириңерди айкөлдүк менен кечиргиле.+
Шилтемелер
^ Же: «чакырылганыңарга ылайык».
^ Сөзмө-сөз: «дене».
^ Сөзмө-сөз: «ыйыктарды».
^ Же: «окутуп-үйрөтүш үчүн».
^ Же: «Акылыңарга түрткү берген күч менен мындан ары да жаңыланып».
^ Же: «мүмкүнчүлүк».
