Ыйык Китеп — Кудайдын адамзатка жолдогон Сөзү. Кудайды таанып-билиш үчүн анын Сөзүн изилдешибиз керек (Жакан 17:3; Тиметейге 2-кат 3:16). Ыйык Китептин барактары аркылуу Жахаба Кудай адамзатка жана жерге тиешелүү ой-ниетин ачып берген (Башталыш 3:15; Аян 21:3, 4).

Бир да китеп адамдардын жашоосуна Ыйык Китепчелик чоң таасир эте албайт. Ал бизге Жахабанын сүйүү, ырайымдуулук, боорукердик сыяктуу сапаттары тууралуу ой жүгүрткөнгө түрткү берет. Үмүт берет, эң оор кыйынчылыктарды көтөргөнгө да жардам берет. Ыйык Китепте Кудайдын эркине каршы келген бул дүйнөгө мүнөздүү нерселер да ачык эле айтылат (Забур 119:105; Еврейлерге 4:12; Жакандын 1-каты 2:15—17).

Ыйык Китеп алгач еврей, арамей жана грек тилдеринде жазылган. Ал толугу менен же айрым бөлүктөрү 3 000ден ашуун тилге которулган. Аны тарыхтагы эң эле көп тилге которулган, эң эле кеңири таралган китеп десек жаңылышпайбыз. Бул таң калыштуу эмес. Анткени Ыйык Китептин өзүндө: «Бардык элдер угушу үчүн, Кудайдын Падышалыгы жөнүндөгү бул жакшы кабар [Ыйык Китептеги негизги кабар] дүйнө жүзү боюнча таратылат. Ошондон кийин бул замандын акыры келет»,— делет (Матай 24:14).

Кудайдын Сөзүндөгү кабардын маанилүүлүгүн түшүнгөндүктөн жана ага урмат көрсөткөндүктөн аны кайра кароону чечтик. Ошол эле учурда Ыйык Китепте камтылган ойду так берүү канчалык маанилүү экенин толук түшүнөбүз. Максатыбыз түп нускага тыгыз карманып, түшүнүктүү, окуганга жеңил котормо жаратуу болду. А тиркемесиндеги «Ыйык Китепти которуудагы принциптер», «Кайра каралган чыгарылыштын өзгөчөлүктөрү» жана «Кудайдын Сөзү бизге кантип жеткен?» деген макалаларда Ыйык Китепти которуп жатканда кандай принциптерге карманганыбыз жана бул чыгарылыштын өзгөчөлүктөрү каралат.

Жахаба Кудайды сүйгөндөр, ага сыйынгысы келгендер анын Сөзүн так, түшүнүктүү тилде окугусу келет (Тиметейге 1-кат 2:4). Ошол себептен Ыйык Китепти кайра карап, кыргыз тилинде чыгардык. Мүмкүн болушунча көп тилде чыгышын да каалайбыз. Урматтуу окурман, сизге Ыйык Жазманын ушул чыгарылышы Кудайды издеп-тапканга жардам берет деп үмүттөнөбүз жана ушул жөнүндө Кудайдан тиленебиз (Элчилер 17:27).