Жалданма жумушчу автокрандын жардамы менен алдыңкы бети айнек контейнерди түшүрүп жатат. Мындай контейнерлер курулушту көргөнү келгендер үчүн коопсуз аймакка бийигирээк орнотулган кароо аянтына коюлган. Курулушту көргөнү келгендер үчүн уюштурулган борбор жана кароо аянты 2017-жылдын май айында ачылган. Августка чейин эле 17 000ден ашуун киши экскурсияга жазылган.

Жалданма жумушчулар бийик кран менен эң биринчи курулуп бүтүшү керек болгон F жатак үйүнүн үстөлдүн формасына окшогон, алдын ала даярдалган бетон бөлүгүн жылдырып жатышат. Имараттардын тегерек-четинин бош болгону ушул сыяктуу бөлүктөрдү ажыратып-бириктирип отурбай эле ары-бери жылдырууга мүмкүндүк берет.

Беш жатак үй бир учурда курулуп жатат. Сүрөттүн алды жагында куруучулар B жатак үйүнүн пайдубалын куйганга даярдап, болот арматураларды бириктирип жатышат. Арт жакта (оңдо) куруучулар атайын шаймандын жардамы менен D жатак үйүнүн биринчи кабатынын полун куюп жатышат. Ал эми арт жакта (солдо) бийик кран менен E жатак үйүнө лифттин шахтасынын жана тепкич орнотула турган жердин бетон панелин коюп жатышат.

Механик өрт өчүрүүдө колдонула турган суу өткөн пластик түтүктөрүнүн (гидрант) бириккен жериндеги жылчыктарды атайын шайман менен бүтөп жатат. Сантехникалык үтүк менен пластикти эритип эки түтүктү бириктиргенде, ортодо жылчыктар калып калышы мүмкүн. Ошол жылчыктарды бүтөгөндөн кийин бириккен жерлердин канчалык бекем экени текшерилет. Жалпы жонунан, төрт километрдей узундуктагы гидрант орнотулду.

Жумушчу суу өткөрбөгөн материал менен капталган жасалма арыкты тазалап жатат. Курулуштун аймагындагы мындай арыктардын үстүндө жолдор болот жана ал арыктар аркылуу жаандын суусу көлмөлөргө агып барат. Мындай чара аймакты суу каптоодон сактайт.

Архитектор жубайлар далистин дубалдары кайсы жерге тургузуларын белгилеп жатышат.

Курулуп жаткан беш жатак үйдүн чыгышты карагандагы көрүнүшү. Сентябрга чейин бетон рамалар толугу менен орнотулуп бүттү. F жатак үйүнүн (артта оңдо) ички дубалдары орнотулуп, шыбалып, сырдала баштады. Ошону менен бирге жумушчулар E жатак үйүнүн (артта солдо) сырткы дубалдарын жана терезелерин орното башташты. B, C жана D жатак үйлөрү курула турган жер (алдыда) архитекторлордун, электриктердин, механиктердин ишин баштоого жана курулуш текчелерин (леса) орнотууга даярдалды.

Жетектөөчү Кеңештин Басма комитетинин жардамчысы жана бүткүл дүйнөлүк долбоор/курулуш бөлүмүнүн (БДДКБ) көзөмөлчүсү Роберт Лусиони Ыйык Китепке негизделген баяндама айтып, куруучуларды бекемдеп жатат. БДДКБ жаңы филиалдардын имараттарын долбоорлоо жана куруу ишин көзөмөлдөп, иштин натыйжалуу жүрүшүнө жана каражаттардын сарамжалдуу колдонулушуна кам көрөт.

Жумушчулар маалымат кору, газ жана электр түйүнү жайгаша турган коммуналдык комплекстин полун цементтеп жатышат. Оң жакта жумушчулар коммуналдык комплекстеги шаймандар иштегенде чыккан катуу үндү жутуп ала турган тосмо дубалдын пайдубалын куюп жатышат.

Архитекторлордун тобу болот рамалар орнотула турган жерлерди белгилегенге чейин чиймелерди карап жатышат.

Жумушчу сырткы дубалдар бекитиле турган болот рамаларды орнотуп жатат.

Жумушчулар сырткы дубалдарга тиешелүү иштерди кыла алышы үчүн, Е жатак үйүн тегерете курулуш текчелери орнотулду.

Жумушчу жаңы коюлган терезелерди коргой турган атайын каражат менен сырдап жатат. Ал кургаганда чел кабык сыяктуу болуп калат да, курулуш маалында айнекти коргоп турат. Курулуш бүткөндөн кийин аны сыйрып салышат.

Механиктердин тобу жатак үйдөгү бөлмөнүн полунун алдындагы жылыткыч системаны басым астында текшерүүдө. Зарыл өзгөрүүлөр кылынгандан кийин жылытуу системасынын түтүктөрү жаткан пол цементтелет.

Жашылдандыруу тобунун мүчөсү филиалдын негизги кире беришинин алдында айланма жолдун боюндагы жапайы гүлдөр өскөн чымды кесип жатат. Чымдын колдонулушу отоо чөптөрдүн өсүшүнө бөгөт коёт. Мунун аркасында унаалар көп өткөн жолдун боюндагы өсүмдүктөргө кам көрүүгө азыраак убакыт жана күч сарпталат.

Адис GPS шайманынын жардамы менен кеңселер жайгаша турган комплекстин кире бериши боло турган жерди белгилөөдө. Белгиленген жерге узун темир таяк сайып, так-айкын көрүнүп турушу үчүн, аны сырдап жатат. Комплекстин бул бөлүгүнө филиалдын тамак жасай турган жайы, ошондой эле ашкана жана чоң зал жайгаштырылат. Арт жакта жатак үйлөр көрүнүп турат.

Аялы менен күйөөсү жаандын суусун чогулта турган системанын бөлүгү болгон кудуктун опалубкасын орнотуп жатышат. Арт жакта кышкысын ар кандай аба ырайына карабай иштей берүүгө мүмкүндүк бере турган пластик жабуу менен оролгон E жана F жатак үйлөрү турат.

Үйрөнчүк вакуумдуу көтөргүч шайманды башкарганды үйрөнүп жатат. Мындай көтөргүчтөр ар биринин салмагы болжол менен 70 килограммдай болгон бордюрларды көтөрүп, орнотуу үчүн колдонулат. Бордюрлар туура орнотулгандан кийин, аларды бекитиш үчүн эки жагынан цемент куюлат.

Механиктер тобунун мүчөсү орнотулушу керек болгон жерге жаткырылган суу түтүгүн туура бурчта жаткыдай кылып кармап турат. Жаңы филиалдын аймагына узундугу болжол менен 5 чакырымга жеткен түтүктөр орнотулушу керек.

Имараттардын сырткы көрүнүшүн жасалгалоо тобунун мүчөсү электр араасы менен кыштарды кесип жатат. Жарым кыштар жатак үйлөрдүн сыртын фламанд стилинде кооздоо үчүн колдонулат. Жалпы жонунан жатак үйлөрдүн сыртына 300 000ден ашуун кыш коюлат.