Аргентинанын Сан-Луис провинциясында бир туугандарбыз катуу кайтарылган түрмөдө отургандар менен Ыйык Китепти изилдеп, жума сайынкы жыйналыш жолугушууларын өткөрүп жатышат. Аргентинада Кудай Сөзүндө камтылган билим түрмөдөгүлөргө биринчи жолу онлайн түрүндө бериле баштады.

Буга чейин көп жылдар бою ишенимдештерибиз түрмөгө барып, жыйналыш жолугушууларды, Ыйык Китепте эмнелер айтылганы жөнүндө билгиси келгендер менен изилдөөлөрдү өткөрүп турушчу. Бирок 2020-жылдын март айынан тарта бүтүндөй өлкө боюнча карантин чаралары киргизилгендиктен анте албай калышты. Ошон үчүн түрмөнүн башчыларына кайрылып, ал жактагылар менен видеобайланыш аркылуу пикирлешүүгө уруксат алышты.

Мындай сүйлөшүүлөр абактагыларга жакшы таасир этип жатканын байкаган түрмөнүн башчысы да аялы менен жолугушууларга катыша баштады. Ал мындай дейт: «Бул жолугушуулар темир тордун артында, коомчулуктан алыс жашагандардын руханий, эмоциялык саламаттыгына аябай эле жакшы таасир этет деп ойлойм. Жыйналыштар бул жактагыларга тил табыша билгенге, келишпестиктерди тынчтыкта чечкенге жардам берип жатканын байкап жатам. Ыйык Китептин негизинде берилген мындай билим абактагыларга кайрадан коомго пайда алып келе турган киши болуш үчүн оңолгонго жардам берери күмөнсүз».

Ошол түрмөдө жаткан бир киши изилдөөлөрдү, жыйналыштарды өткөргөн бир туугандарыбызга ыраазычылык билдирип мындай деген кат жазыптыр: «Жыйналыштарга катыша баштагандан тартып... көйгөйлөрүмдү, санаа тарттырган, жүрөк, көңүл ооруткан нерселерди, ал тургай, түрмөдө отурганымды да унута баштадым. Өзүмдү чындап бактылуу сезип калдым. Силерге чоң рахмат».

Пандемиянын дагы эле уланып жатканына карабай бир туугандарыбыздын Ыйык Китепти колдонуп, ар кандай жолдор менен көптөргө жардам берип жатканын көрүп кубануудабыз (Ышая 48:17, 18).