Токточудай түрү жок пандемияга карабай көптөгөн ишенимдештерибиз жакындарына, кошуна-колоңдоруна кат жолдоп, жубатарлык ойлор менен бөлүшүп келет. Лопарта Жозуэ менен жубайы Ванеса Испаниянын Барселона шаарындагы оорукананын медициналык кызматкерлерине жана COVID-19га чалдыккан бейтаптарга жылуу, бекемдээрлик сөздөр камтылган каттарды жазышкан. Бир медайым жооп кайтарып, ыраазычылыгын билдирген. Ал тийиштүү өзгөрүүлөр киргизилгенден кийин катынын коомчулукка жарыя кылынышына макул болду a.

Мен медайым болуп иштейм. . . Сиздерге 97 жаштагы апанын [ысымы атайын алынып салынды] атынан жазып жатам. Катыңызды бүгүн эртең менен окудук. Адатта, белгилүү бирөөгө жолдонбогон мындай каттарды бул жерде иштегендер бейтаптарга туш келди эле таратышат. Бирок сиздердин катыңыз биздин колубузга тийгени кокустук болгон эмес деп ойлойм. Анда жазылгандар бери дегенде эки кишиге: [бейтапка] жана мага жаркын келечектен үмүт үзбөөгө түрткү берди. [Бейтаптын] абалы өтө эле начар. Аны өзү да түшүнүп жаткандыктан, дүйнө менен кош айтышканга чейин Жозуэ, сизден: «97 жашымда Ыйык Китепте жазылган сонун нерселерди мен да көрө аламбы?» — деп сурагысы келерин билдирди.

Атайын он мүнөт таап [ага] сайтыңыздагы сиздер шилтеме кылган макаладан бир аз окуп бердим. Көзү жайнай, көңүлү көтөрүлө түшкөнү көрүндү. Жүзү нурданып, жаны жай алып калганы байкалды. Ага чейин такыр башкача болчу. Анан экөөбүз «Иса пайгамбар эмне үчүн өлгөн?» деген тасманы көрдүк.

Азыркы оор жагдайды кантип жеңе аларыбыз, стресс менен кантип күрөшсө болору жөнүндөгү журналды [«Ойгонгула!»] да окуп бердим. Өзүңүздөр деле көрүп турасыз, кыйналбаган жан жок.

Бул жерде иштегендер ичиндегисин чыгаргысы келет, бирок аларды уга турган психологдор жок. Сиздер сунуш кылган маалыматты болсо качан болбосун, күнү да, түнү да окуп, көрүп ой жүгүртсө болот. Баары тынчыганда дагы көбүрөөк билгим келет. Мага жардам бере аларыңызга, чыныгы жашоо али алдыда экенине ынандыра аларыңызга ишенем. Сиздердин катыңар так ошол мен иштеген күнү келгенине, мен аны [бейтапка] алып барганыма абдан кубанам. Кудайга миң мертебе ыраазымын.

Өзүңүзгө, үй-бүлө мүчөлөрүңүзгө ден соолук каалайм. Ушундай үмүткө ээ болгонуңуз үчүн, сиз бизге караганда азыркы оор кырдаалды бир аз болсо да жеңилирээк көтөрүп жатасыздар деп ойлойм. Убакыт таап бизге окшогон кишилерге [бейтапка], мага кат жазганыңыздарга чоң рахмат! Бизди тааныбасаңыздар да, жылуу сөздөрүңүз менен жүрөгүбүздү жылытып, көңүлүбүздү көтөрүп койдуңуздар. Болбосо, алты жумадан бери жылмайганды да унутуп калганбыз.

Сиздерге чын жүрөктөн ыраазымын!

Мындай ыраазычылык сөздөр ырайымсыз илдет дүйнөнү каптаган азыркы мезгилде жакшы кабар айта бергенге түрткү берет. Жахабадан башкаларды сооротуш үчүн жагымдуу сөздөрдү тапканга жардам беришин сурап тилене беребиз (Накыл сөздөр 15:23).