2021-жылы 21-июнда Еврей автономдук облусунун Биробижан райондук соту Евгенийди айыптуу деп таап, эки жарым жылга шарттуу соттоду.

Евгений Егоров

• Туулган жылы: 1991 (Биробижан)

• Кыскача таржымалы: Апасы менен таенеси тарбиялап, чоңойткон. Электротехника боюнча окуу жайын бүткөн. Темир уста болуп жана техниканы оңдоп-түзөп жан багат. Китеп окуганды, жазганды аябай жакшы көрөт. Роман жазган. Поэмаларды чогултат. 2005-жылы чөмүлүп, Жахабанын Күбөсү болгон. 2019-жылы Ксения деген кызга үйлөнгөн. 2020-жылы уулду болушкан.

2018-жылдын майында Федералдык коопсуздук кызматынын кызматкерлери Биробижан шаарындагы Жахабанын Күбөлөрүнүн көбүнүн үйүн тинтишкен. Үйлөнөрүнө аз калганда Евгенийге «диний иштерге катышты, Ыйык Китепти окуду» деген айып тагышкан. Ошонун айынан ага белгилүү аймактан чыгууга тыюу салынган. Евгений үйлөнгөндөн кийин эле апасы Лариса Артамоновага да каршы кылмыш иши козголгон. 2019-жылдын декабрында Евгенийге козголгон иш боюнча сот отурумдары башталган.

Башынан өтүп жаткан окуялардан улам Евгений Жахабага жакыныраак болуп калганын айткан. Ал: «Эң оор учурларда Жахаба жүрөгүмдү тынчтандырып, „адаттан тышкаркы күч“ берип жатты»,— дейт (2 Корунттуктар 4:7).

Евгений Жахабанын жардам берерине шектенбейт. Бирок ошентсе да алдыдагы кыйынчылыктарга бардык жактан, акыл-эс, эмоциялык жана рухий жактан, даярданышы керектигин билет. «Кандай жагдайга туш болбоюн, Жахаба менен болгон мамилемди бекемдей беришим керек. Бул мен үчүн баарынан маанилүү»,— дейт ал.

Куугунтукка карабай Евгений менен Ксенияга жана Орусиядагы ишенимдештерибизге Кудайдын рухунун жетеги менен жазылган Забур 10:17деги: «Оо, Жахаба, сен мүнөзү жумшактардын тилегин угасың, жүрөктөрүн даярдайсың. Аларга көңүл буруп, кулак саласың»,— деген сөздөр күч береринен шектенбейбиз.