Жахабанын Күбөлөрү 2019-жылдын 16-августунда «Жаңы дүйнө котормосунун» гуарани тилинде жарык көргөнүн региондук жыйында кулактандырышты. Ал жыйын Парагвайдын Капиата шаарында жайгашкан Бейтелден трансляцияланды. Ыйык Китептин жарык көргөнүн жыйындын биринчи күнүндө Парагвайдагы филиалдын комитетинин мүчөсү Даниел Гонсалес бир тууган кулактандырды. Жыйын 13 жерге трансляцияланып, ага жалпы жонунан 5 631 киши катышты.

Испан тили бүтүндөй Парагвайда кеңири колдонулса да, калктын 90дой пайызы жергиликтүү гуарани тилинде сүйлөйт. Парагвай Латын Америкасындагы тургундары бир эле жергиликтүү тилде сүйлөгөн жалгыз эле өлкө болуп эсептелет.

Котормочу болуп кызмат кылган бир бир тууган котормо иши баштала электе көптөгөн бир туугандардын Жахабага өз эне тили болгон гуарани тилинде кайрыларын байкаган. Ал мындай дейт: «Жахаба азыр бизге гуарани тилинде сүйлөп жатат. Анын бизди жакшы көрөрүн, кадыр-баркыбызды сыйлаарын сезип жатабыз. Жахабаны Атам катары мурдагыдан да көбүрөөк жакшы көрүп калдым».

Гуарани тилиндеги Ыйык Китептин Парагвайдагы гуарани тилинде сүйлөгөн 4 934 жарчыга жакшы таасир этерине, аларга Жахабага жана анын уюмуна болгон сүйүүсүн, ыраазычылыгын арттырганга жардам берерине бекем ишенебиз. Бул котормо окурмандарга Кудайдын баа жеткис ойлорунан пайда алууга көмөк кылары шексиз (Забур 139:17).