Күнү: 2019-жыл, 13—15-сентябрь

Өткөрүлгөн жери: «КИНТЕКС» эл аралык көргөзмө борбору, Сеул, Түштүк Корея

Жыйын өткөн тилдер: англис, вьетнам, индонезия, корей, кытай (мандарин), орус

Катышкандардын жогорку саны: 60 082

Чөмүлгөндөрдүн жалпы саны: 478

Эл аралык делегаттардын саны: 6 076

Чакырылган филиалдар: Бразилия, Вьетнам, Греция, Индонезия, Казакстан, Кошмо Штаттар, Малайзия, Скандинавия, Финляндия, Франция, Чехословакия

Жергиликтүү окуя: Делегаттарды түшкү тамак менен камсыз кылган азык-түлүк компаниясынын деректири Цой Жи-юң мындай деген: «Жумушчулардын бири бул жыйындын аркасында Жахабанын Күбөлөрүнүн табиятынан боорукер, жумшак экенин көрө алганын айткан. Чет өлкөдөн келген жана корей улутунан болгон жергиликтүү Жахабанын Күбөлөрү өмүрүндө биринчи жолу жолугушуп жатса да, бири-бирине сүйүү көрсөткөнүн көрүп, өзүм да аябай таасирлендим. Мен үчүн жакын достор кайрадан көрүшүп жаткандай эле болду. Буга чейин башка көптөгөн диндердин жолугушууларына катышып көргөм. Бирок Жахабанын Күбөлөрү тарабынан даярдалган бул жыйын өзгөчө өттү».

Экскурсия агенттигинин башкы деректири Эн Сан-жу мындай деп ой бөлүшкөн: «Жахабанын Күбөлөрүнүн канчалык жумшак экенин жана дайыма күлүп-жайнап жүрөрүн көрүп, айдоочуларга аларга окшоп күлүп-жайнап жүрүшү керектигин атайын кулактандырайын дедим. Башында мунун сыры эмнеде болду экен деп ойлонгом. Анан Жахабанын Күбөлөрү менен кызматташкандын аркасында алардын бири-бирин чындап жакшы көрөрүн, урматтап-сыйлаарын жана окутканына жараша жашаарын көрдүм. Ошондо жүрөгүм ушунчалык козголду. Ар биринин чын эле эч кандай акы албай эмгектенип жатканын көрүп, аябай таң калдым. Бири-бирин кунт коюп угуп, дайыма жылмайып жооп кайтарып жатканын байкаганда мен да алардай болуш үчүн эмне кылсам деп ойлоно баштадым. Мүмкүнчүлүк болсо, Жахабанын Күбөлөрү менен сөзсүз дагы бир жолу кызматташмакмын».

«МБС Мунгхуа» телестанциясына таандык «Тангем» сейил багынын башкы деректири Ким Жйо-Шик мындай деген: «Жахабанын Күбөлөрү уюштурган экскурсия укмуштуудай сонун болду. Өзүм католик динин тутсам да, бул окуядан Исанын чыныгы жолдоочуларынын жүрүм-туруму кандай болушу керектигин түшүндүм. Бул жакта иштегендердин баары, анын ичинде мен да Жахабанын Күбөлөрүнүн бири-бири менен канчалык мыкты кызматташарын, канчалык уюшулгандыкта иш алып барарын көрдүм. Алар башкаларга да жылуу-жумшак мамиле кылышат экен. Биздин комплекстен атүгүл кичинекей нерселерди да уруксат сурап алып жатышты. Өзүм да Жахабанын Күбөсүндөй болуп, алар менен аябай сыймыктанып жаттым».