2019-жылдын 16-августунда Намибиянын Ондангва шаарында өткөн Жахабанын Күбөлөрүнүн региондук жыйынында Грек Жазмаларынын «Жаңы дүйнө котормосу» кваньяма тилинде жарыкка чыкканы жарыяланды. Аны Ондангвадагы көргөзмө залында өткөн жыйындын биринчи күнүндө Түштүк Африкадагы филиалдын комитетинин мүчөсү Франко Дагостини бир тууган кулактандырды.

Котормо тобунда кызмат кылган бир ишенимдешибиз: «Окурмандар эми Грек Жазмаларынын „Жаңы дүйнө котормосун“ оңой окуп, айкын түшүнө алышат. Бир туугандардын Жахабанын ысмынын тийиштүү жерлердин баарында турганын көргөндө кубанары шексиз»,— деген.

Түштүк Африкадагы филиалдын аймагындагы 490го жакын жарчы кваньяма тилинде сүйлөйт. Алар кваньяма тилинде сүйлөгөн 1 400 000дей кишиге кабар айтышы керек. Ал адамдардын көбү, негизинен, Ангола менен Намибияда жашайт.

«Жаңы дүйнө котормосу» толугу менен же жарым-жартылай которулган тилдердин саны 184кө, анын ичинде 2013-жылдагы кайра каралган басылышы толугу менен которулган тилдердин саны 25ке жетти. Бир туугандарыбыздын эми Ыйык Китепти колдонуп, кваньяма тилинде сүйлөгөн көптөгөн адамдарга Кудайдын сөздөрүн жеткире аларына сүйүнүп жатабыз (Элчилер 2:37).