«Асмандагы Кудай даңкталсын! Жер үстүндө, анын ырайымына ээ болгондордун арасында тынчтык болсун!» (Лука 2:14, «Жаңы дүйнө котормосу»).

 «Асмандагы Кудайга даңк! Жер үстүндө, Кудайга жаккан адамдар арасында тынчтык болсун» (Лука 2:14, «Үмүт нуру» котормосу).

 Кудайды даңктаган бул сөздөрдү Иса жаңы төрөлгөндө периштелер айтышкан. Мындан Иса Машаякка ишенгендер Кудайдын ырайымына ээ болорун жана тынчтыкка бөлөнөрүн билсек болот.

 «Асмандагы Кудай даңкталсын!» Периштелердин бул сөздөрү Кудай бардык даңктын ага ыйгарылышына татыктуу экенин баса белгилеп турат. Ошондой эле периштелердин айткандарынан бир нерсени айкын көрсөк болот: Исанын ымыркай болуп төрөлүшү, жерде кызмат кылышы Жахаба a Кудайдын даңкталышына чоң салым кошмок. Мисалы, Иса окуткан нерселери, насаат сөздөрү Кудайдан экенин дайыма айтчу. Ал: «Мен окутуп-үйрөткөн нерселер меники эмес, мени жиберген Кудайдыкы»,— деп көп айта турган (Жакан 7:16—18). Мындан тышкары, Иса кереметтерди жасаганда, аны көргөндөр «Кудайды даңктай башташчу» (Лука 5:18, 24—26; Жакан 5:19). Керек болсо Исанын өлүмү да Кудайды даңктаган. Кандайча? Кудай жерде адил, тынчтыкты сүйгөн адамдардын жашашын ниет кылган. Исанын өлүмү Кудайдын ошол ниетинин ишке ашышына жол ачкан (Башталыш 1:28).

 «Жер үстүндө... тынчтык болсун!» Тынчтык тек гана согуштун жоктугун билдирбейт. Ал өз ичине жан дүйнө бейкуттугун да камтыйт. Киши мындай бейкуттукка, тынчтыкка Жахабанын ырайымын сезгенде гана ээ болот. Иса өз өмүрүн бергендин аркасында адам баласында Кудай менен ушундай тынчтык мамиледе болууга мүмкүнчүлүк түзүлгөн (Жакыптын каты 4:8). Иса Кудайдын Падышалыгынын Падышасы катары жер бетине тынчтык орнотуп, ал түбөлүккө созулгудай кылат (Забур 37:11; Лука 1:32, 33).

 «Анын ырайымына ээ болгондор». Бул сөздөр Кудайга жана ал жиберген Иса Машаякка чын жүрөктөн ишенгендиктен Кудайдын ырайымына ээ болгондорго тиешелүү. Ал эми маанайы жана иш-аракеттери Кудайга жакпагандарга тиешелүү эмес. Бул ой грек тилиндеги байыркы ишеничтүү кол жазмаларда «Жаңы дүйнө котормосундагыдай» жана башка акыркы котормолордогудай берилген. Тагыраак айтканда, ал кол жазмаларда Кудайдын ырайымына ээ болгондордун арасында тынчтык болсун деген ой камтылат ( Лука 2:14тү башка котормолордон карап көргүлө.)

 Лука жазган Инжилдин 2-бөлүмүндө Исанын жердеги жашоосунун башталышы баяндалат. Ал төрөлгөндө «талаада түнөп, түнкүсүн малын кайтарган койчуларга» b бир периште көрүнгөн (Лука 2:4—8). Ал «баарына чоң кубаныч тартуулай турган жакшы кабар жарыялап»: «Бүгүн Дөөтүнүн туулуп-өскөн шаарында силерди куткара турган бирөө — Мырзаңар Машаяк — төрөлдү»,— деген (Лука 2:9—11). Ошондой эле койчуларга жаңы төрөлгөн ымыркайдын каякта экенин айткан. Андан соң койчулар Кудайды даңктаган көптөгөн периштелерди көрүшкөн. Алар Бетлехемге барып, Мариямды, Жусупту жана ымыркай Исаны табышкан (Лука 2:12—16). Аларга периштенин көрүнгөнүн, эмне дегенин айтып бергенден кийин «уккан-көргөндөрүнүн баары өзүлөрүнө айтылгандай болуп чыкканы үчүн Кудайды даңктап-мактап, артка жол тартышкан» (Лука 2:17—20).

 «Эң жогорудагы Кудай даңкталсын жана жер үстүндө, ал ырайым кылгандарга тынчтык болсун» (Лука 2:14, «Эл аралык жаңы котормо»).

 «Асмандагы Кудай даңкталсын жана жер үстүнө, Кудайга жаккандарга тынчтык консун!» (Лука 2:14, «Жакшы кабар котормосу»).

 «Асмандагы Кудайга даңк! Жер үстүндө, Кудайга жаккан адамдардын арасында тынчтык болсун» (Лука 2:14, «Жакшыртылган англис котормосу»).

 Лука китеби тууралуу жалпы маалымат алыш үчүн бул видеону көргүлө.