«Эмне иш кылба, аны Жахабага тапшыр, ошондо ой-максатың жүзөгө ашат» (Накыл сөздөр 16:3, «Жаңы дүйнө котормосу»).

 «Иштериңди Теңирге тапшыр, ошондо ойлогон ойлоруң ишке ашат» (Накыл сөздөр 16:3, «Үмүт нуру» котормосу).

 Бул аят чыныгы Кудайга сыйынгандарды бир нерсеге ынандырат. Эгер алар ага таянып, андан жетекчилик издеп, ошого ылайык иш кылса, ой-максаты жүзөгө ашат.

 «Эмне иш кылба, аны Жахабага тапшыр». Жахабага a сыйынгандар чечим чыгарганга чейин момундук менен андан жетекчилик сурашат (Жакыптын каты 1:5). Эмне үчүн? Мунун бир себеби адамдар жашоосуна таасир эткен нерселерди бир аз эле көзөмөлдөй алат же такыр эле көзөмөлдөй албайт (Насаатчы 9:11; Жакыптын каты 4:13—15). Андан тышкары, аларга ой-максатын ишке ашырганга акылмандык жетпеши мүмкүн. Ошол себептен көптөр ой-максатын, иштерин Кудайга тапшырып, акылдуулук кылышат. Алар муну андан жетекчилик сурап тиленип, анын Сөзүндө — Ыйык Китепте — жазылган эркине ылайык иш кылып көрсөтүшөт (Накыл сөздөр 3:5, 6; Тиметейге 2-кат 3:16, 17).

 «Иштериңди Теңирге b тапшыр» деген сөздөр түзмө-түз «иштериңди Теңирге тоголотуп барып арт» деген маанини камтыйт. Бир эмгекке ылайык, бул сөздөр «кимдир бирөөнүн өз жонундагы жүктү көтөрө ала турган, күчтүүрөөк бирөөгө артканын» билдирет. Момундук менен Кудайга таянгандар анын жардам береринен, колдоорунан шектенбесе болот (Забур 37:5; 55:22).

 «Эмне иш кылбагыла» деген сөздөр Кудай кимдир бирөөнүн бардык ой-максатын туура көрүп, батасын бере берет дегенди билдирбейт. Жахаба ой-максаттарга батасын бериши үчүн, алар анын мыйзам-принциптерине, эркине ылайык келиши керек (Забур 127:1; Жакандын 1-каты 5:14). Кудай баш ийбегендерге батасын бербейт. Ал «ыймансыздардын ойлогон оюн ойрон кылат» (Забур 146:9). Ал эми Ыйык Китебине жаздырып койгон мыйзам-принциптерине баш ийип, аны урматтагандарды колдойт (Забур 37:23).

 «Ой-максатың жүзөгө ашат». Айрым котормолордо бул сөздөр «ойлогон ойлоруң бекем орнотулат» деп берилген. Еврей Жазмаларындагы (көптөр Байыркы Келишим деп коюшат) «жүзөгө ашат» деген сөз айкашы англис тилине «бекем орнотулат» деп которулган. Бул «пайдубал тургузуу» деген ойду камтыйт жана Кудайдын колунан бүткөн нерселердин туруктуулугуна карата колдонулат (Накыл сөздөр 3:19; Жеремия 10:12). Ошол сыңары, Кудай анын көз алдында туура иштерди кылгандардын ой-максатын «бекем орнотот». Башкача айтканда, алардын жашоосун коопсуз, туруктуу кылып, бакытка бөлөйт (Забур 20:4; Накыл сөздөр 12:3).

 Бул накыл сөз Накыл сөздөр китебинин көбүн жазган Сулайман пайгамбарга таандык. Кудай акылмандык бергендиктен ал миңдеген накыл сөздөрдү жазган (Падышалар 1-китеп 4:29, 32; 10:23, 24).

 Сулайман 16-бөлүмдүн башында Кудайды акылмандыгы үчүн даңктап, анын текеберлерди канчалык жек көрөрүн баса белгилейт (Накыл сөздөр 16:1—5). Андан соң окурманга маанилүү бир бүтүмгө келгенге жардам берет. Адамдар момун болуп, Кудайдын жетегине моюн сунганда гана чындап акылдуу болуп, ийгиликке жете алат. Мына ушул ой Накыл сөздөр китебинде улам-улам кайталанат (Накыл сөздөр 16:3, 6—8, 18—23). Бул маанилүү чындык Ыйык Китепте кайра-кайра баса белгиленет (Забур 1:1—3; Ышая 26:3; Жеремия 17:7, 8; Жакандын 1-каты 3:22).

 Накыл сөздөр китеби тууралуу жалпы маалымат алыш үчүн бул видеону көргүлө.